Read tetala Etatelu 45 Bible Online

Etatelu 45 - tetala bible

Etatelu 45

¹Josefu kumbeya ndjakimela ntu la ntundu kʼantu tshe wakudingi. Ndi akahangohango ati: Nyutundja antu tshe! Nduku untu akatshikala la Josefu lamʼakandayashula le anangu.[107]

²Ndi akatundo la delu, akaleli wulu. Asi Edjibitu ndu wa lu luudu la Farayo wakuki delu diandi.

³Josefu akatela anangu ati: Dimi Josefu one; papa eki la lumu ntu? Ku anangu kumbeya mbukaluya diui ne dia wakate asulu, wakakasana la ntundu kandi.

⁴Josefu akasengasenga anangu ati: Nyusukani lasuki la mi. Ku vo wakasukana la le ndi. Ndi akawatela ati: Dimi leli Josefu, onengenyu, lakanyasundja le antu wakambela lindu lʼEdjibitu.

⁵Tanyunyangaki ndu tanyuyatshumuyaki ne dia nyakansundja dia vo mbelami lindu. Mete Unyashungu kakantumi la ntundu kanyu dia nshimbela nyumu yʼantu.

⁶Ndjala ka kasha kaya deku pendi lu kete nye, ndu deku tanu diekiko diaheyi untu nkamba kana muna.

⁷Unyashungu akantumi la ntundu kanyu dia dimi nyuleshaka la kete, dia nyu ntshikala la lumu uma lu etshungwelu ka wuki.

⁸Nyu kuntumami lindu, keli Unyashungu kakantumi. Ndi akambete shi Farayo, ndu uwandji a luudu landi, la umbuledi a kete yʼEdjibitu.

⁹Nyusamanya, nyutshu le papa; nyutuwuteli nyati: Onʼaye Josefu kata ati: Unyashungu akambete umbuledi wʼEdjibitu tshe. Okone usamanya, uhulo uya lindu le mi, tutshimbatshimbaki.

¹⁰Kuyudjase lu kete ya Ngoshena dia we ndjala lasuki la mi, we la anʼaye, la ekambi aye, la dungalunga diaye, ndu diango diaye tshe.

¹¹Dimi layukushaka mbu ya nde ne dia ndjala ka kasha keki deku tanu; utukuyala usi wula, we la wa lu luudu laye tshe, diango diaye diatukushila.[108]

¹²Nyame ndu kushemi Bendjamina nyeko lu menami nyati: Josefu ndame kateketa la su.

¹³Okone nyutusanyia papa dia lutumbu lami tshe lu kete yʼEdjibitu la akambu tshe wambunyuyena lindu. Kanyuyi la papa esadi uya lindu, tanyutshimbatshimbaki.

¹⁴Ku ndi akakhumbatela kushendi Bendjamina lu kingu, akaleli. Ndu Bendjamina akaleli ukhumbatedi lu kingu.

¹⁵Ndi akanonana la anangu tshe alela. Lʼokongo diku anangu wakasawula la ndi.

¹⁶Lukumu lakadiangana lu luudu la Farayo ati: Anangu Josefu wambuya. Dikambu so diakangenyangenya Farayo la ekambi andi.

¹⁷Ku Farayo akatela Josefu ati: Uteli ananyo wati: Nyutshi okone, nyahe wetshu anyu ladiku dia nyama yanyu, nyutshu utsha lu kete ya Kanana.

¹⁸Nyutose shenyu la khumbu yanyu, kanyuyi la wo le mi. Dimi layunyusha dihuli diuleki ololo lu kete yʼEdjibitu. Ku nyayolekaka dilele diʼololo dia lu kete yasu.

¹⁹Dieli la ye dia mbatela kakiane wati: Nyose pusupusu ya lu kete yʼEdjibitu dia ntemba anʼanyu wa tshitshe la wadienyu. Nyutose shenyu, kanyuyi la ndi.

²⁰Tanyunyangaki ne dia diango dianyu diayutshikala, ne dia engo tshe kuleki ololo lu kete yʼEdjibitu kayuyala kanyu.

²¹Ana apami wa Isariyele wakatshi osoku. Josefu akawasha pusupusu uku diui dia Farayo. Ndi akawasha ndu pamba ya vo ntalekaka lu mbuka. Ndi akawasha ahondo vo tshe.

²²Keli ndi akayusha Bendjamina tenyi dia fesa kama shatu la ahondo atanu.

²³Ndi akatumela shi diango ne: punda dikumi yakawalonge diango diʼololo dia lʼEdjibitu ladiku diayo, ndu punda ya wadi dikumi kina yakawalonge pamba ya shi ndjalekaka lu mbuka ladiku diayo.

²⁴Ndi akalakana la anangu, akawatela ati. Tanyuwanaki lu mbuka. Ku vo wakatshu.

²⁵Vo wakamo uma lʼEdjibitu, wakakumi le shewo Jakoba, lu kete ya Kanana.

²⁶Vo wakawutela vati: Josefu eki la lumu. Ndame keli umbuledi wa kete yʼEdjibitu tshe. Utema wa Jakoba akayala konya, ne dia ndi kumbetawo aui awo.

²⁷Vo wakusanyia aui tshe wakawatela Josefu. Ku lamʼakandenyi pusupusu yakatumi Josefu la ndjuwemba, utema we shewo Jakoba wakakalangana.

²⁸Ku Isariyele akati ati: Laso nkukaka. Onʼami Josefu eki la lumu. Dimi layutsho, kantawenyi ntundu latavu.