Read tetala Etatelu 48 Bible Online

Etatelu 48 - tetala bible

Etatelu 48

¹Lʼokongo wʼakambu aso, wakayutela Josefu vati: Sho ambuyala la kandji. Ku ndi akose anʼandi wʼapami ahendi, Manase la Efarayima, akatshu la wo utsha le ndi.

²Wakatela Jakoba vati: Enda, onʼaye Josefu uyayi uya le ye. Ku Isariyele akayakikitsha, akasungukala la tangi kandi.

³Ku Jakoba akatela Josefu ati: Unyashungu, Kanga-Wulu-Tshe, lakene le mi la Luza lu kete ya Kanana, akantshokola.

⁴Ndi akamvutela ati: Ulungi, dimi layukusha diwutshi, layukufudia, layutunga ului a wuki wʼantu uma le ye. Dimi layusha tukanula taye kete nye dia yo ndjala yawo pundju.[113]

⁵Ana apami ahendi, Efarayima la Manase, wakayuti lʼEdjibitu la ntundu dimi latayi weli anʼami; Efarayima la Manase wayuyala anʼami, uku Rubena la Simeyona.

⁶Keli ana wayuyuta lʼokongo awo, mbayuyala anʼaye. Vo wayalema kame la anengewo lu ukito awo.

⁷Lamʼakamayakalulaka uma la Padana, Ratshele akayuvo lu mbuka lu kete ya Kanana, eki tshalula uma lʼEfarate.[114] Ku dimi lakukhunde lu mbuka kʼutsha lʼEfarate (we-tawo vati: Betelehema).

⁸Isariyele akendi ana apami wa Josefu, akawumbula ati: Wa na ane?

⁹Ku Josefu akakaluya shi diui ati: Vo weli anʼami wʼapami wakambisha Unyashungu lindu. Ku Isariyele akosengasenga ati: Unsukanyiawo, keli mbatshokole.

¹⁰Ashu wa Isariyele wakayala enguli, ne dia ndi aki usumbi a lukusumbi, hayudja mena ololo. Josefu akasukanya la le ndi. Ndi akanonana la wo, akakhumbatela.

¹¹Isariyele akatela Josefu ati: Dimi kunungamela nti: Dimi lukena elundji kaye ntu, ku enda, Unyashungu ambomenya ndu anʼaye.

¹²Josefu akanya anʼandi uma lu dihelo dia shi, akakhusamia la ntundu kandi.

¹³Josefu akawaeme vo ahendi okone: Efarayima lu lunya la pami, lakelanedi la lunya la lomoso la Isariyele; ku Manase lu lunya landi la lomoso, lakelanedi la lunya la pami la Isariyele. Ndi akasukanya utsha le ndi.

¹⁴Isariyele akasimbula lunya landi la pami, akalahe Efarayima, laki kushi, lʼote; ku lunya landi la lomoso lʼote a Manase, laki enundu. Jakoba akeyi dikambu diakandalangi ntsha, mbakandawahe anya osoku.

¹⁵Ndi akatshokola Josefu, ata ati: Unyashungu lakakendakendaka wapapa Abarahama la Isaka la ntundu kandi, Unyashungu latundeshaka nshi tshe ya lumu lami edja ndu elo,

¹⁶ondjelo lakantshungula uma lu kolo tshe, atshokole ana ane. Vo kawetami lukumbu lami ndu kumbu ya wapapa Abarahama la Isaka. Kawufulaneli otekoya la kete.

¹⁷Josefu kongenangena lamʼakandenyi shi ambahe lunya landi la pami lʼote wa Efarayima. Ndi akakimela lunya la shi, akalangi lahula uma lʼote wa Efarayima, dia lahe lʼote wa Manase.

¹⁸Josefu akatela shi ati: Papa, aha ukuku, ne dia ona one keli enundu. Uwahe lunya laye la pami.

¹⁹Keli shi kunanga; akati ati: Dimi mbeyaka, onʼami, dimi mbeyaka. Ndu ndi kayuyala wudja omotshi a wuki, keli kushendi ayuleka wuki. Wedja efula wayutumba uma le tukanula tandi.

²⁰Ku ndi akatshokola[115] lushi lako, ati: Uma le ye mbayotshokolaka Isariyele antu ata ati: Unyashungu anyutsheli uku akandatshela Efarayima la Manase. Ku ndi aketsha Efarayima la ntundu ka Manase.

²¹Isariyele akatela Josefu ati: Dimʼone utsha mvo. Keli Unyashungu ayuyalaka la ye, ayukukaluya ntu lu kete ya watsheye.

²²Dimi lambukusha leke lomotshi la kete luleki la ananyo, kete yakamahotola asi Amore dime la yombo yami la uta ami.