Read tetala Etatelu 49 Bible Online

Etatelu 49 - tetala bible

Etatelu 49

¹Jakoba aketi anʼandi wʼapami tshe: akati ati: Nyusukani, nyuteli akambu wayuyala le nyu lu nshi yayayi.

²Nyusukani nyu ana apami wa Jakoba. Nyulungi, nyuki aui wa shenyu Isariyele.

³Rubena, we keli onʼami lʼenundu. We keli etatelu ka wulu ami. We kakaminya ekumba; we keli lu dihuli dia ladiku lu akambu wa nemo ndu lu akambu a wulu.

⁴We ndjalaka numbululo; laso we huyala lu dihuli dia ntundu, Ne dia we aketama lu dihuli diatetamaka sho. We akadilanya lamʼakayetama la wademi, dimi sho.

⁵Simeyona la Lewi, weli ana wʼutema otoi. Dihumo dia diesa dieko lu mvudu yawo.

⁶Utema ami totoki lu sheki yawo. Nyuma kami tayalaki lʼului awo. Uma lu kele kawo mbakawadiaki antu. Ndu uma lu usihi awo, mbakawahimbulaka waumi wa ngombe eshisha.

⁷Kele kawo kadjami mananu, ne dia to kakayala wulu otekoya; Ndu ududu awo, ne dia vo kema la ketshi. Dimi layamamitula uma lu Jakoba. Layadianganya lu Isariyele.

⁸Juda, ananyo wayukolemiaka. Lunya laye layusukuya kotshi yʼatunyi aye. Ana wa sho wayukukhusamelaka.

⁹Juda eli osongo a tambwe. Onʼami, we ambukalula uma lu nyama yakayadiaki. Ndi atukhuseka adui, atuhulamaka uku tambwe, uku tambwe ka wadi. Ayuwemadia na?[116]

¹⁰Danga dia diulelu hadiumoki uma le Juda. Kuyanga ukalimba a khumʼekanga uma lʼatei ekulu andi, Edja ndu lamʼayuya Shilo. Wedja tshe wayukitanyiaka aui andi.

¹¹Ndi ayukeleka punda kandi lʼokodi wa vinyo, Ndu ona punda kandi ka wadi lʼokodi wuleki dimena. Ndi nsulaka ahondo andi la wanu, La koti diandi la ashi wʼelua wa tilili.

¹²Ashu andi wayeloka la wanu, Ndu anyu andi wayuyalaka wema lʼenwelo kʼawele.

¹³Zebuluna, ayudjaseka lʼumamu wʼashi a waki. Ndi ayudjaseka lʼumamu atetetaka mashua. Ulelu andi ayukuma lu leke la Sidona.

¹⁴Isakara, eli punda ka wulu, Katetamaka lʼatei wʼekutu.

¹⁵Ndi menaka ati: Dihuli diatumetamaka ololo mbedio; Ndu wudja ati: Dimena efula mbewo. Ndu ndi atukututeka diheka diandi dia memba wutshu. Atukitanyiaka nfuta wudja.

¹⁶Dane, ayusambulaka akambu wʼasikandi, Uku diuhu dimotshi lʼatei wa Isariyele.

¹⁷Dane ayuyala ului lu mbuka, Tshula lu vuka ya tshitshe, Diayulumataka sanga ya falasa, Dia umbahemi ato nko ekalikali.

¹⁸We Latuyalaka, dimi lambulungamela panda kaye.

¹⁹Ngada, atomboki wayukhunguswela. Keli ndi ayakhunguswela ndu vo, ayuyelana la wo.

²⁰Ashere, ayuyalaka la mbu ya nde yʼololo. Ndi ayuyalaka la mbu ya nde yuleki ololo yatolekaka khumi ya dikanga.

²¹Nafetali, eli lufumbo lambutshungo. Ndi nteketaka aui wʼamena efula.

²²Josefu, eli lukuno lʼutamba a lumu wuleki nto elua, Lukuno lʼutamba wa nto elua lasuki lʼeteko. Tahi yawo yatulaka etali, ndekanaka lukumbu la ngelu.

²³Ambuki wʼeta wakohenyahenyaka; Vo wakawukaka pitu, Watuyelaka, ne dia vo mbuhetshaka.

²⁴Keli uta andi akatshikala wulu, Ndu anya andi wakakikitala, Uma lu lunya la Kanga Wulu la Jakoba (uma lu lukumbu lʼulami, Dive dia wuki dia Isariyele).

²⁵Unyashungu a sho, ayukukimanyia, Kanga-Wulu-Tshe, ayukotshokola La etshoko wa la tshina diʼashi, La etshoko wʼawele wa wali, Ndu wa diwutshi.

²⁶Etshoko ami, dime sho, wambediama Ladiku diʼetshoko a wapapa, Edja ndu ladiku dia ete wa akuna wa pundju. Etshoko ene wayali lʼote wa Josefu, Ladiku dia lufule la one leli uwandji wa anangu.

²⁷Bendjamina, eli laundu latatshatshaka nyama, La pindju ku ndi nde nyama kakandandji, La dikolo ku ndi ndjukikaha.

²⁸Aso tshe weli wauhu dikumi la ahendi wa Isariyele. Aui aso tshe mbakateketa shewo lamʼakandatshokolaka. Ndi akatshokola untu lʼuntu uku otshoko andi.

²⁹Ndi akakokomiya ati: Dimi luyanga ntsho le wapapa, kanyutunkhunde lasuki la wumbu a wapapa, lu wuku weli lʼekambo ka Eferona, usi Hiti,

³⁰lu wuku weli lʼekambo ka la Makipela kelanedi la Mamare, lu kete ya Kanana. To keli ekambo kakasumbi Abarahama uma le Eferona, usi Hiti, dia ndjala dihuli diʼekhundelu kʼasi khumbu kandi.[117]

³¹Leko kakawakhunde Abarahama[118] la wadendi Sara. Ndu leko kakawakhunde Isaka[119] la wadendi Rebeka. Leko kakamakhunde ndu Lea.

³²Ekambo la wuku weli loko wakasumbama uma le ana wa Hiti.

³³Lamʼakashidiya Jakoba ndakana la anʼandi, ndi akakutula ekulu andi uya lu tangi, akakitshiya,[120] akatshu utsha le washi.