Read tetala Etatelu 8 Bible Online

Etatelu 8 - tetala bible

Etatelu 8

¹Unyashungu akuho Noa, nyama tshe, la dungalunga tshe diaki kame la ndi lu watu a luudu. Okone Unyashungu akapepia lopepe la kete, ku ashi wakakitakita.

²Teko diʼohongo la adidishi wa lʼulungu wakadihama, ndu mvula kaki lu ndo uma lʼulungu kakahimbo.

³Ashi wakatatela mumo la nyongomela yema yema lu kete. Ku lʼokongo a nshi lukama la akumi atanu, ashi wakakitakita.

⁴Okone lu lushi la dikumi lʼesambeli la ngondo kʼesambeli, watu wakayemala lʼatei wʼekungu wʼArarata.

⁵Ashi wakatakolamelaka nkitakita edja ndu lu ngondo ka dikumi. Ku lu lushi la ntundu la ngondo kako, ete wʼekungu wakenama.

⁶Lamʼaketi nshi akumi anei, Noa akadihula didishi diakandatshiki lu watu a luudu wakandatshi.

⁷Ku ndi akatumi dingwangwa. Dio diakatafumbofumboka lu leke la leke edja ndu lamʼakumi ashi la kete.

⁸Ku ndi akayutuma ndu enga dia ntenda kana ashi wambuma ladiku dia kete.

⁹Enga kako kuntana hyuli ya nkitsha ekulu, ne dia ashi waki ladiku dia kete tshe. Okone to kakakalula le Noa lu watu. Ku ndi akasimbula lunya, akakiose, akakiotshiya lasuki la ndi lu watu.

¹⁰Ndi akakungi nshi esambeli ntu, ku ndi ndjutuma enga etena ka hendi lʼandja a watu.

¹¹Enga kakakalula le ndi la dikolo. Ku to kakayi la dikatshi diakahahwama uma lʼutamba a mbeli lʼolomo ato. Diako mbakeyi Noa ati: Ashi wambuma la kete.

¹²Okone ndi akamuyukunga nshi esambeli kina, ku ndi ndjutuma enga etena ka satu. Keli etena kako to kunkalula le ndi ntu.

¹³Okone lushi la ntundu la ngondo ka ntundu ka lu eleku ka kama shamalu la otoi, ashi wakumi uma la kete. Noa akakumbula ote a watu a luudu. Ku ndi akenyi ati: Kete yambuma.

¹⁴Lushi la akumi ahendi lʼesambeli la ngondo ka hendi, kete yakumi tu.

¹⁵Unyashungu akatela Noa ati:

¹⁶Nyutumbi uma lu watu, we, wadeye, la anʼaye wʼapami, ndu wadi wa anʼaye.

¹⁷Utundja ndu nyama tshe yeli la lumu: fudu, dungalunga, ndu diango tshe diayakutula la kete. Kawutani, kawufulaneli, kawukukaneli la kete tshe.

¹⁸Ku Noa akatumbi uma lu watu, ndi la anʼandi wʼapami, la wadendi, la wadi wa anʼandi.

¹⁹Ndu nyama tshe, diango tshe diayakutula, fudu tshe, ndu diango diatokendakendaka la kete, diakatumbi uku wehu adio.

²⁰Noa akatshela Latuyalaka ediakelu. Ku ndi akose nyama motshi uma lʼatei a nyama tshe yeli ololo nde, ndu fudu motshi lʼatei a fudu tshe yeli ololo nde, akayilambula lʼediakelu.

²¹Lamʼakuki Latuyalaka upumu wʼololo wʼulambu, ndiakati lʼutema andi ati: Dimi handjudja kete mananu ntu dikambu dia kolo kʼuntu. Mete, tukanyi tʼutema wʼuntu mbatuyalaka kolo umaka nshi yandi ya dikenda. Dimi handjulanya diango tshe dieli la lumu ntu uku akamatshi.

²²Lamʼayutshikalaka kete, akambu ane hawushilaki pundju: diunelu la dinela, tshitshi la luhaladi, owo la diye, ndu yanyi la utshu.