Read tetala Etatelu 9 Bible Online

Etatelu 9 - tetala bible

Etatelu 9

¹Unyashungu akatshokola Noa la anʼandi wʼapami. Ndi akawatela ati: Nyutani, nyufulaneli, nyuludia kete. [28]

²Nyama tshe ya la kete, ndu fudu tshe ya lʼulungu, diango tshe diayakutula, ndu nsi tshe ya lu ashi a waki yayunyukaka woma la lukumba, ne dia lambuyikimo lu anya anyu.

³Dikendakenda tshe dieli la lumu diayuyala mbu ya nde yanyu. Dimi lambunyushadio uku akamanyusha tumbatumba tshe.

⁴Dikambu otoi, ku tanyuyilekaki esenyu, ndu lamʼekiyo la dikila.[29]

⁵Nyeyi ndu dikambu ne nyati: Dimi layolomba dikila dia nyumu yanyu; layudilomba le nyama la nyama. Layolomba dikila diʼuntu uma le untu, ndu dikila diʼuntu uma le onangu.

⁶Lamʼatundja untu tshe dikila dia untu omotshi,[30] wayutundja ndu dikila diandi lu dikambu dia untu ako, ne dia Unyashungu akatungi untu lu efanelu kandi.[31]

⁷Nyutani, nyufulaneli, nyukukaneli la kete.[32]

⁸Unyashungu akatela Noa la anʼandi ati:

⁹Enda, dimi lambushikike daka diami le ye, ndu le tukanula taye,

¹⁰ndu le dikendakenda tshe dieli la lumu kame la ye: fudu, dungalunga, ndu nyama tshe ya la kete. Le yako tshe yakatumbi la ye uma lu watu a luudu, le nyama tshe ya la kete kamumushikike daka ne.

¹¹Dimi lambudja la nyu sheki nti: Elula kʼashi hayudiaka diango tshe dieli la lumu ntu. Ndu elula hayalaki pundju dia nanya kete.

¹²Unyashungu akati ati: Djimbitelu nye mbeli daka diamumukimo le nyu, ndu le dikendakenda tshe dieli la lumu kame la nyu, ndu le nonga la nonga pundju.

¹³Dimi lambukitsha ngulu lʼulungu. To kayali djimbitelu ya daka diami lʼasami la kete.

¹⁴Okone lamʼayumomotshaka wangi lʼulungu, ngulu kayenamaka lu dingi.

¹⁵Ku dimi layuhoka daka diami lʼasami la nyu ndu lʼasami la dikendakenda tshe dieli la lumu. Ndu ashi hawuyuyala elula ntu dia nanya diango tshe dieli la lumu.

¹⁶Ngulu kayuyalaka lʼulungu. Ku lamʼayumukienaka, to kayumbuhulaka daka diami dia pundju lʼasami la dikendakenda tshe dieli la lumu la kete.

¹⁷Ku Unyashungu akatela Noa ati: Oso eli djimbitelu ya daka diakamadji lʼasami la dikendakenda dia la kete.

¹⁸Ana wa Noa wakatumbi uma lu watu a luudu ane: Sheme, Hama la lafeta. Hama akayala lotshetshe lʼasi Kanana.

¹⁹Uma le ana asatu wa Noa ane, mbakayaia wedja tshe wa lʼandja.

²⁰Noa akatatela nkamba kete. Ndi akune kuno yʼekodi wa vinyo.

²¹Ndi akano wanu awo, akadjo. Ndi akatshikala utakataka lʼatei a luudu landi la dipema.

²²Ku lamʼakenyi Hama, lotshetshe lʼasi Kanana, utakataka wa shi, ndi akatumbi lʼandja, akatutela anangu ahendi dikambu diako.

²³Ku Sheme la lafeta wakose dihondo, wakadiahe lu aheka awo, wakoto la dio ekongokongo. Vo wakadikumbi shewo laki utakataka. Vo komena utakataka wa shewo, ne dia vo wakediya dundji diawo amʼakina.

²⁴Ku lamʼakemo Noa uma lʼedjwelu ka wanu, ndi akeyi dikambu diakatshi onʼandi la kushi.

²⁵Ku Noa akati ati: Mananu kayali le Kanana. Ndi ayali ukambi wuleki tshitshe lʼatei wʼekambi wʼanangu.

²⁶Ku ndi akati ati: Latuyalaka, Unyashungu a Sheme, atumbwami. Kanana ayali ukambi a Sheme.

²⁷Unyashungu afudia ongonyi wa lafeta. Ndi adjase lu mvudu yʼapema ya Sheme. Ku Kanana ayali ukambi awo.

²⁸Noa akalumbi deku kama shatu la akumi atanu lʼokongo wʼelula.

²⁹Nshi ya lumu tshe ya Noa yaki deku kama divwa la akumi atanu, ku ndi akavu.