Read tetala 2 Samuele 1 Bible Online

2 Samuele 1 - tetala bible

2 Samuele 1

¹Lʼokongo a nyoi ka Saulu, lamʼakakalula Davidi uma la ntudiaka asi Amaleka, ndi akadjase nshi hyendi la Zikilange.

²Ku lushi la satu, pami kemotshi akakumi uma lu pangu ka Saulu, ahondo andi betshi betshi, la kete lʼote. Lamʼakandakumi la ntundu ka Davidi, ndi akayahumanya la kete, akukhusamela.

³Davidi akawumbula ati: Uma lendi ayayi? Ku ndi akûkaluya diui ati: Uma la pangu ka Isariyele kayamalawo.

⁴Davidi akawumbula ntu ati: Na dikambu diakayadi leko? Umvuteli! Ku ndi akûkaluya diui ati: Antu wakalawo uma lu wumbe wa ta, ku antu efula wakako, wakavu; ndu Saulu la onʼandi Jonatana wakavu.

⁵Davidi akambula olongo a pami lakayi la lukumu ati: Dkundi weyaye wati: Saulu la onʼandi wakavu?

⁶Ku olongo a pami lakawela lukumu akûkaluya diui ati: Dimi laki lʼukungu wa Ngiliboa. Ku lakenyi Saulu ekami lu dikonga diandi, menyi ku pusupusu ya ta la ambahemi wa falasa ane wayuyeli.

⁷Lamʼakandakadimo, ndi akamenyi, ku ndi akambete. Ku dimi laketawo nti: Dimʼone!

⁸Ndi akamumbula ati: We na? Dimi lakûkaluya diui nti: Usi Amaleka kemi.

⁹Ku ndi akamvutela ati: Usukani, uyundjaki; ne dia sasi diambumunda, kuyanga mbemi la lumu.

¹⁰Dimi lakasukana la le ndi, lakudiaki, ne dia dimi lakeyi shikaa nti: Ndi heyi ntshikala la lumu ntu lʼokongo wʼekwelo kandi. Dimi lakose dembo dia kusu diaki Vote andi, la okoma waki lu lunya landi, mbukelamidio, we khumemi.[1]

¹¹Davidi akakimela ahondo andi, akatshatsha. Ndu apami tshe waki kame la ndi wakatshatsha ahondo awo.

¹²Vo wakayala la utanda wa Saulu, wʼonʼandi Jonatana, wa wudja wa Latuyalaka, ndu wa khumbu ka Isariyele ne dia vo wakadiakema la tombo. Vo wakaleli, wakakili mbu ya nde edja ndu la dikolo.

¹³Davidi akambula olongo a pami ako wakawela lukumu ati: Usi na eye? Ku ndi akûkaluya diui ati: Dimi leko onʼa ongendangenda wʼusi Amaleka.

¹⁴Davidi akawumbula ati: Ukundi akiye kumbuka woma wa mbahe ukitami wʼiso wa Latuyalaka lunya dia mbudiaka?

¹⁵Davidi aketi olongo omotshi a pami, akawutela ati: Usukani, uwumameli! Pami kako akakomola usi Amaleka, ku ndi akavu.

¹⁶Okone Davidi akawutela ati: Dikila diaye diayali lʼote aye, ne dia unyo aye mbakakosongwedi, mbakatshi ati: Dimi lakadiaki ukitami wʼiso wa Latuyalaka.

¹⁷Onʼeli usambu wʼutanda wakalongosola Davidi lu dikambu dia Saulu la onʼandi Jonatana.

¹⁸Ndi akadjanga dia vo mbetsha asi Juda. Nyulungi, vo wambufunda lu Buku dia Jashara[2] (kitshimudi ati: Lusimbwi). Ndi akati ati:

¹⁹Lutumbu la Isariyele akavu lu ahuli aye wa ladiku! Ngandi akako akanga a wulu!

²⁰Tanyutaki dikambu diako la Ngata, Tanyudianganyaki lukumu ladio lu esese wa la Ashikelona, Ne dia ana amantu wʼasi Filistiya watukongenangena, Ne dia ana amantu a waku wahatahemaka ehekeli watukuyasema.

²¹Ekungu wa Ngiliboa le! Dihohe kana mvula tawuyalaki ladiku dianyu, Kuyanga dikambu dia ndjala la elonga wa nkimo elambu! Ne dia leko kakakadjema dingawu diʼakanga a wulu, Engawu ka Saulu, Uku untu laki kunkitama iso lʼote.

²²Uma lu dikila diʼandjakemi, uma lu wata wʼakanga a wulu, Uta wa Jonatana kunkalulaka ekongokongo, Ndu yombo ya Saulu kunkalulaka ukalulakalula.

²³Saulu la Jonatana, ambukami ngandji la anangemi! Lu nshi ya lumu ndu la nyoi, vo kunkakitwana; Vo wakalawoka esadi uleki pungu, Vo waki la wulu ndeka tambwe.

²⁴Ana amantu wa Isariyele, nyuleli Saulu. One lakanyolotshaka ahondo wa tilili wa lukumu, One lakanyolengelaka ahondo anyu la dengalenga dia paunyi.

²⁵Ngandi akako akanga a wulu lu ta! Ngandi akavu Jonatana lu ahuli aye wa ladiku!

²⁶Dimi la lokonyo lu dikambu diaye, we onalingu Jonatana We akalekaka ngenyangenyami otekoya. Ngandji kaye le mi aki dikambu dia mamba, To kakaleki ngandji kʼamantu.

²⁷Ngandi akako akanga a wulu! Ngandi akashisho dihumo diawo dia ta!