Read tetala 2 Samuele 11 Bible Online

2 Samuele 11 - tetala bible

2 Samuele 11

¹Lʼetatelu kʼeleku, lʼetena kakatshokaka khumi ya dikanga lu ta, Davidi akatumi Joaba, ndi la ekambi andi la Isariyele tshe. Vo wakatolembia asi Amona, wakadingi Raba. Keli Davidi akatshikala la Jerusalema.[19]

²Lʼushidi wa dikolo, Davidi aketo uma lu tangi, akatetetaka lʼote wa luudu landi la khumʼekanga. Uma leko ladiku diʼote a luudu, mbakandenyi umuntu omotshi oka ashi. Umuntu ako aki dimena diahangone.

³Davidi akatumi dikendji dia nteya na umuntu ako. Ku wakawutela vati: Aha Batesheba, onʼa Eliyame, wadi a Uriya, usi Hiti kendi?

⁴Davidi akatumi akendji dia ntuwosa. Vo wakayi la ndi, ku Davidi akeyana la ndi. (Ndi akayaedia uma lu mindu kandi.) Ku ndi akakalula utsha lakandi.

⁵Umuntu ako akatshu diemi. Ndi akatumi dikendji dia ntutela Davidi ati: Dimi laya la diemi.

⁶Davidi akatumi dikendji le Joaba ati: Untumeli Uriya, usi Hiti. Ku Joaba akutumela Uriya.

⁷Lamʼakakumi Uriya le Davidi, ndi akawumbula uku atsha Joaba, uku weli antu, ndu uku weli ta.

⁸Davidi akatela Uriya ati: Utshu lakaye, utotsha ekulu. Uriya akatumbi uma lu luudu la khumʼekanga, ku khumʼekanga akuyedia ushasha omotshi.

⁹Keli Uriya aketama la suku dia luudu la khumʼekanga kame la ekambi tshe wa khumendi. Ndi kuntsho lakandi.

¹⁰Lamʼakawatela Davidi vati: Uriya hatshwi lakandi, Davidi akambula Uriya ati: Aha uma lu lokendo kayayayi? Dikambu kuna diahayatshwi lakaye?

¹¹Uriya akakaluya Davidi diui ati: Oshete wa sheki, Isariyele, ndu Juda mbidjase lu tutumbutumbu; ndu khumi Joaba la ekambi wa khumemi wambuhanga lʼusui wa tshekele. Ku dimi ntoto lu luudu lami dia ntole, dia ntono, ndu dia ntetama la wademi? Uku weye la lumu, ndu uku eli utema aye la lumu! dimi hatshi dikambu so.

¹²Davidi akatela Uriya ati: Utshikali lindu elo la lui, ku layukukimo. Okone Uriya akatshikala la Jerusalema lushi lako ndu wedi a pindju.

¹³Davidi akaweti, akawusha mbu ya nde ndu dia no, akawudjuya. Ku la dikolo Uriya akatshu la ntetama lu tangi kandi, kame la ekambi wa khumendi. Keli ndi kuntsho utsha lakandi.

¹⁴Ku la pindju, Davidi akafundela Joaba mukanda, akutumelawo le Uriya.

¹⁵Ndi akafundi mukanda ako ati: Kukitsha Uriya lu dihuli diuleki ta wulu, kumo la le ndi. Ndi kahumo, kavu.

¹⁶Lamʼakadingi Joaba usumba, ndi akakitsha Uriya lu dihuli diakandeyi ati: Ahuka wa wulu weko laawo.

¹⁷Asi usumba wakatumbi, wakalo la Joaba, ku asi Isariyele amotshi, ekambi wa Davidi, wakavu. Ndu Uriya usi Hiti, akavu kame la wo.

¹⁸Joaba akatumi dikendji le Davidi dia ntuwutela akambu tshe wakatshama lu ta.

¹⁹Ndi akatela dikendji diako ati: Lamʼayuyushidiya nsanyia khumʼekanga dikambu la dikambu dia lu ta,

²⁰undu ndi ayudanganela la kele, ayukumbula ati: Okoko wana wakanyasukana lʼusumba dia ntolo ta? Nyu kumbeya nyati: Vo mbeyaka nyuka pitu uma ladiku diʼeheli?

²¹Akona akadiaki Abimeleke, onʼa Jerubeshete? Aha umuntu kakasukuya dive diʼohelo uma ladiku dia eheli, ku dio diakudiaki la Tebeze?[20] Ukundi akanyasukana lʼeheli kʼusumba na? Kuwuteli wati: Ndu ukambi aye Uriya, usi Hiti, akavu.

²²Dikendji diakatshu. Lamʼakandakumi, ndi akatela Davidi akambu tshe wakui umi Joaba.

²³Dikendji akatela Davidi ati: Antu wakâyangi ntolembia, wakatumbi uya le su lʼusui. Keli shu takatshindjiya edja ndu lʼeotwelo kʼusumba.

²⁴Ambuki wʼeta wakuki ekambi aye pitu uma ladiku diʼeheli. Ku ekambi emotshi wa khumʼekanga wakavu; ndu ukambi aye, Uriya, usi Hiti, akavu kame la wo.

²⁵Davidi akatela dikendji ati: Kututeli Joaba wati: Tuyahenyahenyaki lu dikambu ne, ne dia yombo ndjakaka antu udiakadiaka. Olosha usumba wulu, uhandjuli. Osoku mbayuyutukeketsha.

²⁶Lamʼakuki wadi a Uriya ati: Umtndi Uriya ambuvo, ndi akuleli.

²⁷Lamʼakashili utanda, Davidi akatumi antu dia ntuwosa uya lakandi. Ku ndi akayala wadendi, akuti la ndi ona. Keli dikambu diakatshi Davidi kongenyangenya Latuyalaka.