Read tetala 2 Samuele 13 Bible Online

2 Samuele 13 - tetala bible

2 Samuele 13

¹Abisaloma, onʼa Davidi, aki la kadiyo ka dimena, lukumbu landi Tamara. Lʼokongo a etena kemotshi, Aminona, onʼa Davidi, akûlangi.

²Aminona akaleki nyanga lu dikambu dia kadiyendi Tamara, edja ndu ndi akayala la kandji. Laso ku Tamara eki emuma, akenamaka wulu le Aminona dia ndi mbutshela dikambu dimotshi.

³Keli Aminona aki la ongenyi lukumbu landi Jonadaba, onʼa Shimeye, onangu Davidi. Ndi aki kanga lukesu efula.

⁴Ndi akawumbula ati: We onʼa khumʼekanga, okoko wana watumukenaka wondju la lushi la lushi? We hetawo mvutelami? Ku Aminona akawutela ati: Dimi na-ngaka kadiya onalingu Abisaloma efula.

⁵Jonadaba akawutela ati: Etami lu tangi, udimbiya kandji. Lamʼayuya sho dia ndjukenda, kosengesenge wati: Etawo dia kadiemi Tamara ndja dia ndjumbisha mbu ya nde. Ndi ayukati ma lu ashu ami, dia dimi diena la dile uma lu anya andi.

⁶Okone Aminona aketama, akadimbiya kandji. Lamʼakayi khumʼekanga la ndjuwenda, Aminona akosengasenga ati: Etawo kadiemi Tamara ndjunkatela ekati ehendi lu ashu ami. Ku dimi layele uma lu anya andi.

⁷Davidi akatumi untu lakandi la ntutela Tamara ati: Utshu kakiane laka onanyo Aminona, utukateli ma.

⁸Ku Tamara akatshu laka Aminona, onangu, akutani etami. Ndi akose shima, akakisohanya, akatshi ekama la ntundu kandi, akekati.

⁹Lʼokongo diku, ndi akose panu, akekitsha la ntundu kandi. Keli Aminona akatuni nde; akawutela ati: Utundja antu tshe. Ku antu tshe wakatumbi.

¹⁰Aminona akatela Tamara ati: Ela ma lu luudu la mbetama, keli ndjuli uma lu anya aye. Ku Tamara akose ekati wakandakati, akawela Aminona, onangu, lu luudu la mbetama.

¹¹Lamʼakandusukanyia ekati dia mbulesha, Aminona akawumamela; akawutela ati: Yaka tuyetami, kadiemi.

¹²Ku Tamara akûkaluya diui ati: Kema, onalengu, tumbetamaki la wulu. Dikambu dia wuhu one hadiukuki ntshama lu Isariyele. Tutshaki dikambu ne dia sonyi.

¹³Lendi ayumutsho dimi la sonyi kami? Ndu we ayuyala uku otoi a dinginya lu Isariyele. Kakiane lambukosengasenga nti: Utumbuli khumʼekanga. Ku ndi hoseka mbishamiye.

¹⁴Keli Aminona kunanga mbukela. Ndi akuleki wulu, aketama la ndi ia wulu, akeyana la ndi.

¹⁵Ku Aminona akuhetsha utamanya uleki ngandji kakandawukaka. Ndi akawutela ati: Eto, tshoka!

¹⁶Keli Tamara akawutela ati: Kema, kolo ka mbitshanyami kambuleka kene kakayantshedi wuki. Keli ndi kunanga mbukela.

¹⁷Ndi aketi ukambi wakukambelaka ulimu, akawutela ati: Umanganyia umuntu one lasuki la mi. Otundja lʼandja, udihi lukuki.

¹⁸Tamara aki la ukutu wʼawadi awadi, ne dia osoku mbakalotaka ana amantu wa khumʼekanga wa dimuma. Ukambi a Aminona aki undja lʼandja, akadihi lukuki.

¹⁹Tamara akatela utuku Vote, akatshatsha ukutu andi wʼawadi awadi. Ndi akahe anya Vote, akatshu atadi tukuku.

²⁰Abisaloma, onangu, akawumbula ati: Onanyo kakayadi la ye? Kakiane, utshikali ki kadiyemi. Onanyo kendi, tudjaki dikambu ne lʼutema. Ku Tamara aki la utshutshumalu, akatshikala lu luudu la Abisaloma onangu.

²¹Keli lamʼakuki khumʼekanga Davidi akambu aso tshe, ndi akuki kele ka wulu.

²²Abisaloma konteketa diui diʼololo kana dia kolo le Aminona. Keli ndi akuhetsha, ne dia ndi aketama kadiyendi Tamara la wulu.

²³Lʼokongo wa deku pendi, lamʼaki Abisaloma la ahimbudi wa diosa la Bala-Hazora, lasuki la Efarayima, ndi aketi ana apami tshe wa khumʼekanga lu dambu.

²⁴Abisaloma akayi le khumʼekanga, akayuwutela ati: Ulungi, ukambi aye eko la ahimbudi wa diosa. Dimi lambukosengasenga nti: We khumʼekanga, utshu, we la ekambi aye utsha laka ukambi aye.

²⁵Khumʼekanga akakaluya Abisaloma diui ati: Kema, onʼami, shutshe hatutsho tutukutukukitshiya wutshu. Ndi akosengasenga, ku Davidi kuntsho, keli ndi aketshokola.

²⁶Abisaloma akosengasenga ati: Naka we hatshu, etawo onalingu Aminona ntsho la su. Ku khumʼekanga akawumbula ati: Dikambu kuna diahumbandi ntsho la ye?

²⁷Keli Abisaloma akosengasenga wulu. Okone khumʼekanga aketawo Aminona la anʼandi wʼapami tshe ntsho la ndi.

²⁸Ku Abisaloma akatela ekambi andi ati: Nyendi ololo. Lamʼayongenangena utema wʼAminona la wanu, ndu lamʼayumunyutela nti: Nyokomole Aminona, kanyudiaki, tanyukaki woma. Aha dime kambunyutela? Nyukikitali, nyuyali la dihunga.

²⁹Ekambi wa Abisaloma wakatshela Aminona uku akawatela Abisaloma. Ku ana apami tshe wa khumʼekanga wakunela, untu la untu akahema lu punda kandi, akalawo.

³⁰Lamʼakiwo lu mbuka, lukumu lakakumi pulu le Davidi ati: Abisaloma ambudiaka ana apami tshe wa khumʼekanga, nduku otoi ambutshikala.

³¹Khumʼekanga akunela, akatshatsha ahondo andi, aketama lu kete. Ndu ekambi andi tshe waki la le ndi, wakatshatsha ahondo awo betshi, betshi.

³²Jonadaba, onʼa Shimeya, onangu Davidi, akahula diui ati: We khumemi, tukanaki wati: Wambudiaka elongo wʼapami tshe, ana wa khumʼekanga. Paka Aminona kakadiakemi. Abisaloma akasanguya dikambu ne umaka lushi laketama Aminona kadiyendi Tamara la wulu.

³³Kakiane we khumemi, khumʼekanga, tunyangaki wati: Ana apami tshe wa khumʼekanga mbakavwi. Paka Aminona utu kuvwi.

³⁴Keli Abisaloma akalawo. Olongo a pami laki lu nama ngelu, akedia ashu, enyi ku ului a wuki wʼantu one wayahulo uma lu ukungu, lu mbuka lʼokongo andi.

³⁵Jonadaba akatela khumʼekanga ati: Enda ana apami wa khumʼekanga wambuya. Uku akamakutedi, dimi ukambi aye, osoku mbedio.

³⁶Kamʼakandashili nteketa, ku ana apami wa khumʼekanga wambuiuma. Vo wakatundo lʼalelu, wakaleli. Ndu khumʼekanga la ekambi andi wakakedia asoi.

³⁷Keli Abisaloma akalawo, akatshu laka Talamai, onʼa Amihure, khumʼekanga ka Ngeshure.[23] Ku Davidi akalelaka onʼandi nshi tshe.

³⁸Osoku mbakalawo Abisaloma. Ndi akatudjase la Ngeshure deku satu.

³⁹Khumʼekanga Davidi akakumbula ntsho le Abisaloma. Ndi akakimo ndela Aminona, ne dia ndi akenyi ati: Ndi ambuvo.