Read tetala 2 Samuele 15 Bible Online

2 Samuele 15 - tetala bible

2 Samuele 15

¹Lʼokongo diku, Abisaloma akakundja pusupusu, falasa, la apami akumi atanu wakatalawoka la ntundu kandi.

²Abisaloma akunela kʼolomo la pindju, akatemala lʼumamu a mbuka lu eotwelo kʼusumba. Lamʼakayakaka untu la dikambu dia memala la ntundu ka khumʼekanga lʼelumbwelu, Abisaloma akaweti, akawumbula ati: Uma lʼusumba akona ayayayi? Ku ndi mbukaluya diui ati: Dimi ukambi aye leko usi wudja kapanda uma lʼatei a wedja wa Isariyele.

³Ku Abisaloma akawutela ati: Nduku untu lambosonama le khumʼekanga lukuki nsambula dikambu.

⁴Ku Abisaloma akawutela ntu ati: Utunduyala wambumbete usambudi wa kete nye, tshiki dimi lutusambulaka akambu wa untu tshe laya le mi la sambu kʼololo!

⁵Okone lamʼakayakaka untu dia ndjukhusamela la ntundu kandi, ndi akasimbula lunya, akukimela, akukhumbatela.

⁶Osoku mbakatshelaka Abisaloma asi Isariyele tshe wakayakaka le khumʼekanga lʼelumbwelu. Osoku mbakandakadimula etema wʼasi Isariyele uya le ndi.

⁷Lamʼaketi deku nei, Abisaloma akasengasenga khumʼekanga ati: Unkimo ntshu la Heberona la ntushidiya dokoloko diakamatshiki le Latuyalaka.

⁸Dimiukambi aye lakatatshiki dokoloko le Latuyalaka lamʼakamadjashi la Ngeshure ka lʼArama nti: Naka latuyalaka ayunkaluya la Jerusalema, dimi layotemolaka.

⁹Khumʼekanga akûkaluya diui ati: Utshu la ki. Ku ndi akunela, akatshu la Heberona.

¹⁰Keli Abisaloma akatumi atopi lu wedja tshe wa Isariyele dia ntataka vati: Lamʼayunyuka lundju lʼamama, kanyuti nyati: Abisaloma aya khumʼekanga la Heberona.

¹¹Abisaloma aketi apami kama hyendi wa la Jerusalema. Ku vo wakuyeli uyelayela, kumbeya nduku dikambu.

¹²Lamʼakalambula Abisaloma elambu, ndi akatumi dikendji dia nteta Ahitofele, undaki a Davidi, uma lʼusumba a wo Ngilo. Sheki yakayala wulu, ne dia antu efula wakatakolamelaka mbekama Abisaloma.

¹³Untu omotshi akayutela Davidi ati: Etema wʼasi Isariyele wambukadimo utsha le Abisaloma.

¹⁴Davidi akatela ekambi andi tshe waki la Jerusalema ati: Nyuneli tulawo, ne dia hateyi mpanda la ntundu ka Abisaloma. Nyusamanya tutshu. Naka aha osoku ndi ayutunda esadi, ayututshela kolo, ndu ayulanya usumba la yombo.

¹⁵Ekambi wa khumʼekanga wakûkaluya diui vati: Enda, shu, ekambi aye, tayutsha kene tshe kayuyulanga, we khumesu khumʼekanga.

¹⁶Ku khumʼekanga akatumbi; wa lu luudu landi wakuyeli. Ndi akatshiki esika andi dikumi dia nama luudu.

¹⁷Khumʼekanga akunela, ku antu tshe wakuyeli. Vo wakatemala la luudu lʼekumelu.

¹⁸Ekambi andi tshe, asi Kerete tshe, asi Pelete tshe, ndu asi Ngata tshe wakulekana. Apami kama shamalu wakayuyelaka uma la Ngata, waketi la ntundu kandi.

¹⁹Ku khumʼekanga akambula Itai, usi Ngata, ati: Okoko wana wayayayi ndu we? Ukaluli, utudjase la khumʼekanga, ne dia ongendangenda mbeye ndu wakakutshanya uma lu kete yanyu.

²⁰Lui kakayakumi, ku elo dimi ndjukosa dia ntakekekuya kame la mi lamʼahameye dime lene atamatshu? Ukaluli, ndu ukaluya ananyo. Latuyalaka anyutsheli la ketshi la mete.

²¹Keli ndi akakaluya khumʼekanga diui ati: Uku eli Latuyalaka la lumu, ndu uku weye, we khumemi khumʼekanga la lumu! lu dihuli tshe diayuyutsho lu nyoi kana lu lumu, leko kayumuyala ndu dimi ukambi aye.

²²Ku Davidi akûkaluya diui ati: Kawo, eti la ntundu. Itai, usi Ngata, aketi la ntundu, ndi la antu andi tshe waki la ndi.

²³Asi wudja uku tshe wakatundo lʼalelu, wakadi tukuku ta wulu lamʼakatehoka antu tshe. Ndu khumʼekanga akateho Kiderona, ndi la antu tshe, waketi lu mbuka kʼutsha lʼusui wa shenga.

²⁴Zadoka, ndi la asi Lewi tshe waki la ndi wakayi wayembe oshete wa sheki wa Unyashungu. Vo wakayukitsha oshete ako. Lamʼakashili antu tshe ntumba uma lʼusumba, Abiyatara akunela.

²⁵Khu-mʼekanga akatela Zadoka ati: Ukaluya oshete wa Unyashungu utsha lʼusumba. Naka dimi layuhumo lukulu lʼolo lu ashu wa Latuyalaka, ndi ayunkaluya, ayomenya oshete ndu edjaselu kandi ntu.

²⁶Keli naka ndi ambuta ati: Dimi handjukongenangena, dimi one, kantsheli uku ayundulanga.

²⁷Khumʼekanga akambula olombedi Zadoka ati: Aha omenyi wʼakambu wahatayi mbeye? Lkaluli la ki lʼusumba, we la Abiyatara, kame la ana anyu wʼapami ahendi, Ahimaze, onʼaye, la Jonatana, onʼa Abiyatara.

²⁸Enda, dimi layutukunga lʼukidi wʼusui wa shenga, edja ndu lamʼayumulungula lukumu la shikaa uma le ye.

²⁹Zadoka la Abiyatara wakakaluya oshete wa Unyashungu la Jerusalema. Vo wakatudjase leko.

³⁰Davidi akambela lu dikuna dia eweli. Ndi akade ataleli, ote ukumbami, la ekulu hwe. Antu tshe waki la ndi wakakumbi ete, wakatambelaka wataleli.

³¹Wakayutela Davidi vati: Ahitofele ambuyala kame la Abisaloma lʼului wʼasi sheki. Ku Davidi akalombe Latuyalaka ati: Latuyalaka li! ete alaku wa Ahitofele anyanya.

³²Lamʼakakumi Davidi lʼote a dikuna, lene akawatemolaka Unyashungu, enyi ku Hushai, usi Araka one ayayi la ndjuhumana la ndi, ukutu betshi betshi la nete too lʼote.

³³Davidi akawutela ati: Naka we ayulanga ntsho la mi, we ayuyala wutshu le mi.

³⁴Keli naka we ayukalula lʼusumba, ayututela Abisaloma wati: Khumʼekanga li! dimi layuyala ukambi aye uku akimi ukambi a sho nshi kina, osoku mbamumuyala ukambi aye kakiane. Ku we ayunkimanyia dia shu nfutanyaka alaku wa Ahitofele.

³⁵Undi, we huyala la elombedi Zadoka la Abiyatara leko? Okone aui tshe wayuyukaka uma lu luudu la khumʼekanga, kututelaki elombedi Zadoka la Abiyatara.

³⁶Okone Hushai, ongenyi a Davidi, akayi lʼusumba. Ndu Abisaloma akakumi la Jerusalema. Enda, anʼawo ahendi wʼapami, Ahimaze, onʼa Zadoka, la Jonatana, onʼa Abiyatara, weko la wo. Osoku uma le wo kayuwuntumelaka aui tshe wayuyukaka.

³⁷Okone Hushai, ongenyi a Davidi, akakalula lʼusumba. Ku Abisaloma akoto lu Jerusalema.