Read tetala 2 Samuele 17 Bible Online

2 Samuele 17 - tetala bible

2 Samuele 17

¹Ahitofele akatela Abisaloma ntu ati: Etawo dimi nsonola apami nunu dikumi la pendi. Kamuneli utshu one, dia ndjelana la Davidi.

²Dimi layutuwunda lamʼambundokomo dimba ndu lamʼayundutola anya; layutuwutsha woma. Antu tshe weli la ndi, wayulawo. Ku dimi layutudiaka paka khumʼekanga ndame.

³Dimi layela antu tshe le ye, uku atuyakaka usekaseka a umuntu le umendi. Okone antu tshe wayuyala la ki.

⁴Aui aso wakangenyangenya Abisaloma ndu dihangamendi dia Isariyele tshe.

⁵Ku Abisaloma akati ati: Nyeti ndu Hushai, usi Araka, kakiane. Tuyuki aui wayunduta ndu ndi.

⁶Lamʼakayi Hushai le Abisaloma, Abisaloma akawutela ati: Ahitofele akatutedi okone. Undi, ololo shu ndjela alaku andi? Naka kema, otekete!

⁷Hushai akakaluya Abisaloma diui ati: Alaku wambukulaka Ahitofele etena kene kema dimena.

⁸Hushai akawutela ntu ati: We nimbitelaka sho la antu andi, apami a wulu mbewo. Vo wambukiyana uku laundu lambohotwama ana lʼusui. Sho eko kanga ata, ndi hudjase kame la antu.

⁹Kakiane ndi mbishama lu difuku dimotshi kana lu dihuli kapanda. Okone lamʼayuwudiaka antu amotshi lʼetatelu, untu tshe layuka lukumu, ayuta ati: Andjedi wa Abisaloma wambudiakema efula.

¹⁰Okone ndu kanga dihunga leli lʼutema uku tambwe ayuka woma. Ne dia Isariyele tshe mbeyaka vati: Sho eli ondoshi wa ta a wulu ndu wane tshe weli itame la ndi weli akanga a dihunga.

¹¹Daku diami le ye ne nti: Usanganya asi Isariyele tshe uma la Dane pulu ndu la Bere-Sheba la le ye. Efula kawo kayali uku seke ya losenga la lʼumamu wʼashi a waki. Ndu weme, kutshu ia wo lu ta.

¹²Okone lamʼayutukuma lu dihuli diayututana sho, tayolwela uku atolokaka lopopo la kete. Okone hatahandja ndu ndi ndu asikandi weli la ndi nduku otoi.

¹³Ntu, naka ndi ayutoto lʼusumba omotshi, asi Isariyele tshe wayotola ekodi utsha lʼusumba ako. Ku shu tayukutula usumba lʼatei a ashi, edja ndu nduku yet shi ya dive yayutanema laawo.

¹⁴Abisaloma la apami tshe wa Isariyele wakati vati: Daku dia Hushai, usi Araka, diambuleka daku dia Ahitofele ololo. Latuyalaka akasanguya nfutanya daku diʼololo dia Ahitofele dia Latuyalaka mpumuya Abisaloma lukulu lʼengeno.

¹⁵Ku Hushai akatutela elombedi Zadoka la Abiyatara ati: Okone mbakalaki Ahitofele Abisaloma la dihangamendi dia Isariyele, keli dimi lakalaki okone la okone.

¹⁶Okone utumi untu esadi le Davidi la ntuwutela ati: Tetamaki elo lu tehu dia lʼusui a shenga. Ateho, atshu etali! khumʼekanga la antu tshe weli la ndi watukudiakema.

¹⁷Jonatana la Ahimaze wakakungaka la Ene-Rongele. Ku ukambi a umuntu omotshi akatshokaka dia ntuwatela kumu, ne dia vo kumbeya mboto lʼusumba. Vo wakatshu la ntutela khumʼekanga Davidi.

¹⁸Keli olongo a pami omotshi akawaenyi, akayutela Abisaloma dikambu so. Vo wakatshu esadi, wakatukuma laka untu omotshi la Bakurima. Difuku dimotshi diaki lu lukumbu la luudu lako, ku vo wakatushama loko.

¹⁹Ku umuntu kanga luudu akafe unyo a difuku, akatela efushi wʼahoho laawo. Ku dikambu kumbeyama.

²⁰Ekambi wa Abisaloma wakakumi laka umuntu ako, wakawumbula vati: Lendʼeli Ahimaze la Jonatana? Ku umuntu ako akawatela ati: Vo waketshi, wakatehwi okedi. Vo wakâyangi, keli kumbatana. Okone vo wakakaluya la Jerusalema.

²¹Lamʼakunela ekambi wa Abisaloma, vo wakatumbi uma lu difuku, wakatshu le Davidi. Vo wakatuwutela vati: Nyuneli, nyusamanya dia nteho ashi, ne dia okone la okone mbakalaki Ahitofele lu dikambu dianyu.

²²Ku Davidi akunela, ndi la antu tshe waki la ndi, wakateho Jorodana. Okone la hyu-tshihutshi nduku otoi akatshikala, atateho Jorodana.

²³Lamʼakenyi Ahitofele ati: Hawuyeli daku diami, ndi akahe edie lu punda kandi, akunela, akatshu lakawo. Ndi akatolongosola luudu landi, akayadji kyodi, akavu. Ku wakukhunde lu wuku wa diumbu dia shi.

²⁴Davidi akakumi la Mahanayima. Abisaloma akateho Jorodana, ndi la apami wa Isariyele tshe waki la ndi.

²⁵Abisaloma akadji Amasa olombodi wʼalimbi lu dihuli dia Joaba. Amasa aki onʼa pami kemotshi, usi Isariyele, lakawetaka vati: Itira lakatshuki Abingale, onʼa umuntu a N hashi, onangu Zeruya nyangu Joaba.

²⁶Isariyele la Abisaloma wakatuhanga lu kete ya Ngiliyade.

²⁷Lamʼakakumi Davidi la Mahanayima, Shobi, onʼa Nahashi, usi Amona, uma la Raba, Makira, onʼa Amiyele, usi Lo-Debare, la Barazilai, usi Rongeline ka la Ngiliyade,

²⁸wakela atuhu, alonga, mbaka, epunga wa menge, epunga wa yelela, shima kʼahoho, nanula, konde, ahoho wa lufumba,

²⁹usanga, iso, ekoko, awele wʼekama wa dungalunga le Davidi ndu le antu waki kame la ndi dia vo nde. Ne dia vo wakati vati: Antu ane wambusuwa la ndjala la pusa, wambokomo lʼusui wa shenga.