Read tetala 2 Samuele 2 Bible Online

2 Samuele 2 - tetala bible

2 Samuele 2

¹Lʼokongo a dikambu so, Davidi akambula Latuyalaka ati: Ntshu lʼusumba omotshi wa Juda? Latuyalaka akûkaluya diui ati: Tshoka. Davidi akawumbula ntu ati: Lʼusumba akona wayumutsho? Ku Latuyalaka akûkaluya diui ati: La Heberona.

²Davidi akatshu leko, ndi la wadiendi ahendi, Ahinoama, usi Jezerele, la Abingayili, usi Karamele, wadi aki Nabala.[3]

³Davidi akatshu ndu la antu waki la ndi, untu lʼuntu la wa lu luudu landi. Vo wakatudjase lu esumba wa la Heberona.

⁴Asi Juda wakatshu leko, wakatukita Davidi iso dia ndi ndjala khumʼekanga ka khumbu ka Juda. Vo wakatela Davidi vati: Asi Jabeshe-Ngiliyade mbakakhunde Saulu.[4]

⁵Ku Davidi akatumi akendji le asi Jabeshe-Ngiliyade, dia ntuwatela vati: Latuyalaka anyotshokole, ne dia nyu nyakenya khumenyu Saulu kolamelu yanyu, nyakukhunde.

⁶Kakiane Latuyalaka anyenya ngandji ka shikaa la kolamelu. Ndu dimi layunyutshela ololo, ne dia nyu nyakatshi dikambu diku.

⁷Okone anya anyu wakeketali, nyuyali la dihunga. Khumenyu Saulu akavu. Ku khumbu ka Juda wakankiti iso ka dimi ndjala khumʼekanga kawo.

⁸Lʼetena keso Abinere, onʼa Nere, olombodi wʼului wʼalimbi wa Saulu akose Ishi-Boshete, onʼa Saulu la pami, akutehuya la Mahanayima.

⁹Ndi akawudji khumʼekanga ka Ngiliyade, kʼasi Ngeshure, ka Jezerele, ka Efarayima, ka Bendjamina, ndu ka Isariyele tshe.

¹⁰Ishi-Boshete onʼa Saulu, aki la deku akumi anei, lamʼakandayala khumʼekanga ka Isariyele. Ndi akulela deku pendi. Keli khumbu ka Juda wakayeli Davidi.

¹¹Davidi akulela khumbu ka Juda deku esambeli la ngondo shamalu lu Heberona.

¹²Abinere, onʼa Nere, la ekambi wa Ishi-Boshete, onʼa Saulu, wakatumbi uma la Mahanayima, wakatshu utsha la Ngibeyona.

¹³Joaba, onʼa Zeruya, la ekambi wa Davidi, wakayi ndu vo dia ndjuhumana la wo lʼuduwa wa Ngibeyona. Ku vo wakemala amotshi wedi one wʼuduwa, la akina wedi ukina.

¹⁴Abinere akatela Joaba ati: Elongo wʼapami ene, wuneli, wakenya la ntundu kasu. Joaba akûkaluya diui ati: Kawo, wuneli!

¹⁵Ku vo wakunela, wakahumana antu dikumi la ahendi uma lu leke la Bendjamina la Ishi-Boshete, onʼa Saulu, la ekambi dikumi la ehendi wa Davidi.

¹⁶Vo tshe untu lʼuntu akakimela utunyi andi lʼote, akawuki yombo lu luhandju, ku vo ahendi wakako kame. Diako mbakawole dihuli diako dieli lasuki la Ngibeyona lukumbu vati: Helekate-Hasurima (kitshimudi ati: Ta dia tombo).

¹⁷Lushi lako, ta diaki wulu; ekambi wa Davidi wakalembia Abinere la asi Isariyele.

¹⁸Ana apami asatu wa Zeruya waki leko ane: Joaba, Abishai, Asahele. Asahele akadjaka luwangu efula uku lufumbo.

¹⁹Asahele akayelana la Abinere, aha nkadimo lu lunya la pami kana lu lunya la lomoso.

²⁰Abinere akewo lʼokongo, akambula ati: Asahele uku? Ku ndi akûkaluya diui ati: Dimi.

²¹Abinere akawutela ati: Etole lu lunya la pami kana lu lunya la lomoso, undi olongo a pami omotshi, ohotole diango diandi dia dimbu. Keli Asahele kunanga mbetola, akakolamela mbuvela.

²²Abinere akatela Asahele ntu ati: Etole, takuyandjeli. Okoko wana wukukimi nkokomola la nkuhumanya la kete? Ukundi ayumeya munyia elundji la ntundu ka onanyo Joaba?

²³Keli Asahele akatuni mbetola. Uma lu dikambu diako mbakusukuya Abinere ekumbu ka dikonga ka sodi lu dikundju. To kakatumbi lʼokongo. Ku ndi akako, akavu kʼaku. Wane tshe wakakumaka lu dihuli diakakalemi Asahele udu, wakemala laawo.

²⁴Keli Joaba la Abishai wakayelana la Abinere, ku unya akatuwadjela lamʼakawakumi lu dikuna dia Ama, dielanedi la Ngiya, lu mbuka kʼutsha lʼusui wa shenga wa Ngibiyona.

²⁵Asi Bendjamina wakamote lʼokongo wa Abinere, wakayala ului otoi, ku wakatemala lʼote wa dikuna dimotshi.

²⁶Abinere aketi Joaba, akawumbula ati: Undi, yombo yayokolamela ndjaka antu pundju? We heyi wati: Lunyangu lavuyala lʼekumelu? Edja ndu kandi ayuyukimo ntshimbatshimba dia mvutela wudja aye dia vo nkimo ndjela anengewo?

²⁷Joaba akûkaluya diui ati: Uku eli Unyashungu la lumu! utunduyala we hamvutedi, wudja tutuwukimo ndjelana la anengewo ntundu unya atahuto.

²⁸Osoku Joaba akadi dimama, ku antu tshe wakemala. Vo kundjela Isariyele, ndu kondo la wo ntu.

²⁹Abinere la antu andi wa ta wakakendakenda utshu ako tshe Araba. Vo wakateho Jorodana, wakatenanya pindju tshe, ku wakakumi la Mahanayima.

³⁰Lamʼakakalula Joaba uma lene akandatayelanaka la Abinere, ndi akasanganya antu tshe. Ku ekambi dikumi la divwa wa Davidi, la Asahele mbaki kema.

³¹Kele ekambi wa Davidi wakadiaki asi Bendjamina la asika Abinere apami kama shatu la akumi asaimalu.

³²Vo wakembe Asahele, wakatukhunde la Betelehema lu diumbu dia shi. Joaba la antu andi wakakendakenda utshu tshe. Ku unya akatahutwela lamʼakawakumi la Heberona.