Read tetala 2 Samuele 22 Bible Online

2 Samuele 22 - tetala bible

2 Samuele 22

¹Davidi akimbela Latuyalaka usambu la aui ane lamʼakutshungula Latuyalaka uma lʼanya wʼatunyi andi tshe ndu uma lu anya wa Saulu,

²ati: Latuyalaki eli dive diami dia wuki, wumbe ami wa ta, la utshungudi ami.

³Unyashungu eli Dive diami dia wuki, lene atumushamaka, Engawu kami, wulu wa panda kami, Lungeli lami la wuki, la eshamelu kami. We Ushimbedi ami, we katunshimbelaka uma lu akambu wa wulu.

⁴Dimi layuhangohangoka nti: Latuyalaka atumbwami! Ku layushimbamela uma le atunyi ami.

⁵Asukhu wa nyoi watonkomolaka, La dula diʼelanyelu diatumbutshaka woma.

⁶Ekodi wa diumbu watunyingaka, Tulunga ta nyoi tatuntshimbaka.

⁷Lamʼakimi la asui, laketi Latuyalaka, Ee, Lakalelela, Unyashungu ami. Uma lu luudu landi lʼekila, ndi akuki diui diami. Ndu delu diami diakukema lu atui andi.

⁸Ku kete yakasukasuka, yakadidima. Atshina wʼulungu wakayekayeka, Wakasutshasutshama, ne dia ndi akumala.

⁹Dinga diakatumbi uma lʼehembe andi, La lumbi la dja la dikita uma lʼunyo andi, Akalanga wakahete la lumu lako.

¹⁰Ndi akahuluya ulungu, akakiti, Dingi dia tshududu diaki la tshina diʼakaka andi.

¹¹Ndi akahema ladiku dia okeruba, akafumbo, Ndi akenama, atafumbo lu lopepe.

¹²Ndi akete udjima luudu la dipema lʼutshimba andi, Emotelo kʼashi la angi wʼedima wakudingi.

¹³Uma lu ngaingai kakatetaka la ntundu kandi, Kakafukofukoka akalanga wa dja.

¹⁴Latuyalaka akakhungula lʼulungu, Khumʼulungu akadikitsha diui diandi,

¹⁵Ndi akuki atunyi ami pitu, akahandjula. Ndi akahenyahenya la ndjadi.

¹⁶Kete ya la tshina diʼashi yakenama, Atshina wʼandja wakashwama Uma lu luhangu la Latuyalaka, Ndu uma lu lundju lʼefufelu kʼehembe andi.

¹⁷Ndi akasimbula lunya landi uma lʼulungu, akankimela. Ndi akantundja uma lʼashi a waki.

¹⁸Ndi akantshungula uma le utunyi ami a wulu, Uma le ampetshi ami wakandeki wulu.

¹⁹Vo wakayi le mi lama akimi la pa, Keli Latuyalaka aki usuko ami.

²⁰Ndi akanombola uya lu dihuli dia hwe. Ndi akanshimbela, ne dia ndi ngenangenakami.

²¹Latuyalaka akantshela uku ololo ami, Ndi akanfuti uku pudipudi kʼanya ami.

²²Dimi lakatakolamelaka lu mbuka ya Latuyalaka, Dimi kundjala la dikambu dia kolo dia minyami uma le Unyashungu ami.

²³Adjangu andi tshe waki la ntundu kami, Dimi kombetola uma lʼelembe andi.

²⁴Ndu dimi laki ololo uma lʼelembe andi, Dimi lakayalamt uma lu kolo.

²⁵Okone Latuyalaka akanfuti uku ololo ami, Ndu uku pudipudi kami lu ashu andi.

²⁶Le kanga kolamelu, we ndjaenyaka kanga kolamelu; Le one laha la unungu, we ndjaenyaka aha la unungu.

²⁷Le kanga pudipudi, we ndjaenyaka kanga pudipudi; Le one lahasimbwi, we atuyaenyaka kanga ngala.

²⁸We atushimbelaka akanga a ndjakitshakitsha, Keli ashu ave watendaka akanga wʼutaku dia mbakitshakitsha.

²⁹Ee, We Latuyalaka keli usasi ami, Latuyalaka atuminyiyaka udjima.

³⁰Uma lu wulu aye mbatumolembiaka alimbi, Uma lu wulu wa Unyashungu mbatumulimboka eheli ka lukumbu.

³¹Mbuka ka Unyashungu katuyalaka ololo tshe, Alaka wa Latuyalaka weli mete. Ndi eli engawu ka wane tshe watuwekamaka.

³²Akona eli Unyashungu, naka aha Latuyalaka? Ndu akona eli Dive dia Wuki, naka aha Unyashungu asu?

³³Unyashungu eli lungeli lami la wulu, Ndi atonombolaka lu mbuka kʼusimbwi.

³⁴Ndi ateteka ekulu ami usadi uku lufumbo.[35] Ndi atunkitshaka lu ahuli wa ladiku.

³⁵Ndi atukalanganyaka anya ami dia ndo ta, Ku anya ami wateyaka nema uta wʼohotela.

³⁶We ambumbisha engawu ka panda kaye, Memakana kaye kambumbete wuki.

³⁷We atokokwelaka ekulu ami mbuka, Ku akaka ami hawutoseloka.

³⁸Dimi lakayelaka atunyi ami, lakalanyaka. Dimi kunkalulaka ntundu vo watalanyema.

³⁹Dimi lakawediawedia edja ndu hawuyeya munela, lakatshumbi. Vo wakako la tshina diʼakaka ami.

⁴⁰We atunkikitshaka lu ta, We atonembiyaka wane watondoshaka.

⁴¹We atukadimulaka ekongo wʼatunyi ami uya le mi, Ku dimi latushilaka wane watumpetshaka ushiki.

⁴²Vo watendaka, ku nduku untu lâshimbela! Watulelaka le Latuyalaka, ku ndi hatakaluyaka nduku diui.

⁴³Dimi latatshutshunaka uku ditshu dia Kete, Lâtadianganyaka, latahotshahotshaka uku loteke la lu esese.

⁴⁴We atuntshungulaka uma lu tamu ta wudja ami. We atunkitshaka ladiku dia wudja tshe, Ku wudja wakimi kumbeya watunkambelaka ulimu.

⁴⁵Asi wedja watuyakitshakitshaka la ntundu kami, Vo watukitanyiaka aui ami kamʼateketami.

⁴⁶Asi wedja watuyalaka etema ashi atu, Watutumbaka uma lu ahuli awo wʼeshamelu wayadidima.

⁴⁷Latuyalaka eko la lumu; Dive dia Wuki atumbwami! Unyashungu, Dive dia Wuki dia panda kami ediami.

⁴⁸We Unyashungu katosomboyaka lu dikambu diami, Katunkitshikitshiyaka wedja.

⁴⁹We keli one latuntshungulaka uma le atunyi ami, We atumbediaka ladiku dia waku watondoshaka. We atunshimbelaka uma le akanga a ngala.

⁵⁰Okone mbayumukukaka lusaka lʼatei a wedja tshe, we Latuyalaka! Dimi layimbaka esambu wa diandu lu lukumbu laye.[36]

⁵¹Ndi atushaka khumʼekanga kandi atshungwelu wa mamba. Ndi atukaka one lakandakiti iso ketshi, Ee, Davidi, la tukanuia tandi pundju.