Read tetala 2 Samuele 6 Bible Online

2 Samuele 6 - tetala bible

2 Samuele 6

¹Davidi akasanganya apami tshe wakawasonola lʼatei wa Isariyele ntu, yediko ya antu nunu akumi asatu.

²Ku Davidi akunela ndi la antu tshe waki kame la ndi, akatshu la ntosa oshete wa Unyashungu uma la Bala-Juda. Vo mbetaka oshete ako lukumbu la Latuyalaka, Kanga Elui wʼAlimbi, latudjaseka lʼasa akeruba[11] ladiku diʼoshete wa sheki.

³Vo wakatundja oshete a Unyashungu uma lu luudu la Abinadaba laki ladiku dia dikuna;[12] wakawahe ladiku dia pusupusu kʼuyuyu. Uza la Ahiyo, ana apami wa Abinadaba, wakasukuya pusupusu kako.

⁴Vo wakatundja oshete a Unyashungu uma lu luudu la Abinadaba laki lu dikuna. Ku Ahiyo aketi la ntundu kʼoshete.

⁵Davidi la wa lu luudu tshe la Isariyele wakayanokaka la ntundu ka Latuyalaka wayahumi wehu tshe wa dihumahuma diʼetamba, sese, akembi, ngomo, tusaka, la ekokoloko.

⁶Lamʼakawakumi lu dihuli diʼesuswelu kʼepunga dia Nakona, Uza akasimbula lunya, akakimela oshete a Unyashungu, ne dia ngombe yakayangi mbokosha.

⁷Kele ka Latuyalaka kakayala wulu le Uza. Unyashungu akokomola kʼaku ne dia munga kandi, ku ndi akavu lasuki lʼoshete wa Unyashungu.

⁸Davidi akanyangi wulu, ne dia Latuyalaka akudiaki osoku. Vo mbetaka dihuli diako edja ndu elo vati: Pereze-Uza (kitshimudi ati: Ekhunguswelu le Uza).

⁹Davidi akuki Latuyalaka woma lushi loso. Ndi akati ati: Ukundi ayukuma oshete wa Latuyalaka lakami?

¹⁰Okone Davidi kunanga nsekola oshete wa Latuyalaka utsha lakandi, lʼusumba wa Davidi. Ndi aketola la wo utsha lu luudu la Obede-Edome, usi Ngata.

¹¹Oshete wa Latuyalaka akatshikala lu luudu la Obede-Edome, usi Ngata, ngondo shatu. Ku Latuyalaka akatshokola Obede-Edome ndi la wa lu luudu landi tshe.[13]

¹²Wakatutela khumʼekanga Davidi vati: Latuyalaka ambotshokola luudu la Obede-Edome la kene tshe keli la ndi, dikambu diʼoshete wa Unyashungu. Ku Davidi akatshu, akatosa oshete wa Unyashungu uma lu luudu la Obede-Edome. Ndi akawela uya lʼusumba wa Davidi lʼongenongeno.

¹³Lamʼakakendakenda amembi wʼoshete wa Latuyalaka wanya asamalu Davidi akulambula ngombe la yana ya ngombe yʼununyi.

¹⁴Davidi akayanokaka la ntundu ka Latuyalaka la wulu andi tshe, olotshi ukutu wa nemo wa linene.

¹⁵Osoku mbakela Davidi la wa lu luudu la Isariyele tshe oshete wa Latuyalaka wayadji aelu wʼongenongeno, wayadi amama.

¹⁶Lamʼakakumi oshete wa Latuyalaka lʼusumba a Davidi, Mikale, onʼa Saulu, akendaka lu didishi, enyi ku khumʼekanga Davidi ayalimbolimbo, ayano la ntundu ka Latuyalaka. Ku ndi akawonyola lʼutema.

¹⁷Vo wakela oshete wa Latuyalaka, wakukitsha lu dihuli diawo, lʼetei a luudu la dipema, lakuhikela Davidi. Ku Davidi akalambula elambu wa lutshumba ndu elambu wa ki la ntundu ka Latuyalaka.

¹⁸Lamʼakashidiya Davidi nambula elambu wa lutshumba la elambu wa ki, ndi akatshokola antu lu lukumbu la Latuyalaka, Kanga Elui wʼAlimbi.

¹⁹Ndi akakahanya ukama wa ma, funda ka nyama, la ukati le untu lʼuntu lʼatei ului tshe wa Isariyele ndu apami ndu amantu. Ku antu tshe wakatshu, untu lʼuntu utsha lu luudu landi.

²⁰Davidi akakalula dia ntotshokola wa lu luudu landi.[14] Ku Mikale, onʼa Saulu, akatumbi dia ntulungula. Ndi akati ati: Ndi nemo diakayadi la khumʼekanga ka Isariyele dia nkulula ahondo lu ashu a wadi wʼekambi andi, uku atukululaka fumbo sonyi li!

²¹Davidi akakaluya Mikale diui ati: Dimi laki lu ndjano la ntundu ka Latuyalaka lakansonola dia dimi ndjala ladiku dia sho, ndu ladiku dia wa lu khumbu kandi tshe, dia mbidjami uwandji wa Isariyele, wudja wa Latuyalaka. Dimi layutetemalaka no la ntundu ka Latuyalaka.

²²Dimi layulanga ntsha uleki laku, ku layuyakitshakitsha lu ashu aye. Keli dimi layuyala kanga nemo lu ashu wa ekambi ene wʼamantu wutshiye.

²³Mikale, onʼa Saulu, akatshikala ekumba edja ndu lushi la nyoi.