Read tetala 2 Samuele 8 Bible Online

2 Samuele 8 - tetala bible

2 Samuele 8

¹Lʼokongo diku, Davidi akalo lʼasi Filistiya, akawele. Ndi akose Metenge-Ama uma lʼanya wʼasi Filistiya.

²Ndi akalembia asi Moaba. Akawaetamia lu kete, akawaedika lʼokodi. Ndi akawaedika ekodi ehendi wa mbadiaka, la okodi otoi wa mbatshika la lumu. Asi Moaba wakayala lʼokongo wa Davidi, wakuiambulaka ulambu.

³Davidi akawele ndu Hadadezere, onʼa Rehobe, khumʼekanga ka Zoba, lamʼakandatatshokaka la ntushikike diulelu diandi lu ndiali ka Eyufarate.

⁴Davidi akohotola ambahemi wa falasa kinunu la kama esambeli, alimbi wakakendakendaka lʼekulu nunu akumi ahendi. Ndi akahimbula falasa tshe yakakutulaka pusupusu eshisha ayo wa lʼekulu. Ndi akatshiki paka falasa yukuki nkutula pusupusu lukama.

⁵Lamʼakayi asi Suriya uma la Damaseke dia ndjukimanyia Hadadezere, khumʼekanga ka Zoba, Davidi akadiaki asi Suriya nunu akumi ahendi la pendi.

⁶Ku Davidi akakitsha malu la Arama wa la Damaseke. Asi Suriya wakayala lʼokongo wa Davidi, wakulambulaka ulambu. Latuyalaka akete Davidi onembishi lu ahuli tshe wakandatatshokaka.

⁷Davidi akose dingawu dia paunyi diakakimelaka ekambi wa Hadadezere, akadiela uya la Jerusalema.

⁸Khumʼekanga Davidi akose ehotela efula uma la Beta la Berotai, esumba wa Hadadezere.

⁹Lamʼakuki Toi, khumʼekanga ka Hamata, ati: Davidi ambowela ului wʼalimbi wa Hadadezere,

¹⁰Toi akatumi onʼandi Jorama le khumʼekanga Davidi, dia ntuwemula ndu la ntuwandula, ne dia ndi akalo la Hadadezere, ku akowele, ne dia Hadadezere akalokaka la Toi. Jorama akawela alonga wa fesa, wa paunyi, la wʼehotela.

¹¹Khumʼekanga Davidi akakidia ndu diango diako le Latuyalaka, uku akandakidia fesa la paunyi yakandose uma lu wedja tshe wakandalembia,

¹²uma lʼEdome, Moaba, asi Amona, asi Filistiya, asi Amaleke, la diango dia dimbu diakandambi Hadadezere, onʼa Rehobe, khumʼekanga ka Zoba.

¹³Davidi akayaenya lukumbu. Lamʼakandakalula, ndi akadiaki asi Edome nunu dikumi la enanei lʼUkidi a Leho.[16]

¹⁴Ndi akakitsha malu lu Edome. Ndi akakitsha malu lu Edome tshe, ku asi Edome tshe wakayala lʼokongo wa Davidi. Latuyalaka akete Davidi onembishi lu ahuli tshe wakandatatshokaka.

¹⁵Davidi akulela Isariyele tshe. Ndi akalombolaka wudja la sambu kʼololo ndu lʼakambu wʼusimbwi.

¹⁶Joaba, onʼa Zeruya, aki olombodi wʼului wʼalimbi. Jehoshafata, onʼa Ahilude, aid okondodi.

¹⁷Zadoke, onʼa Ahitube, la Ahimeleke, onʼa Abiyatara, waki elombedi. Seraya aki ufundji.

¹⁸Benaya, onʼa Jehoyada, aki uwandji wʼasi Kerete la asi Pelete. Ku ana apami wa Davidi waki elombedi.