Read tetala 1 Khumi ya Dikanga 11 Bible Online

1 Khumi ya Dikanga 11 - tetala bible

1 Khumi ya Dikanga 11

¹Khumʼekanga Solomona akalangaka amantu wʼasi wedja efula,[46] kame la onʼa Farayo: wʼasi Moaba, wʼasi Amona, wʼasi Edome, wʼasi Sidona, wʼasi Hiti.

²Oso eli wedja wakatelaka Latuyalaka asi Isariyele ati: Tanyutshukaki la vo, ndu vo tawutshukanaki la nyu, watukukadimula etema anyu dia nyu ndjela ditemolatemola diawo.[47] Keli Solomona akamamemaka uma lu ngandji kakandawaukaka.

³Ndi akose ana wa khumi ya dikanga kama esambeli wadi, la esika kama shatu. Ku wadiendi wakakadimula utema andi.

⁴Lu etena kakayala Solomona usumbi, wadiendi wakenge utema andi utsha le ditemolatemola. Ku utema andi kundjala tshe le Latuyalaka, Unyashungu andi, uku aki utema wa Davidi, shi.

⁵Solomona akayeli Ashetarota, etemolatemola kʼasi Sidona, ndu Milikome, engo ka wononyi kʼasi Amona.

⁶Solomona akatshi kene kaki kolo lu ashu wa latuyalaka. Ndi kundjela Latuyalaka lʼutema tshe uku akatshaka Davidi, shi.

⁷Ku Solomona akatshi Kemoshe, engo ka wononyi kʼasi Moaba, la Moleka, engo ka wononyi kʼasi Amona lʼukungu weli lu leke lʼehutwelu la Jerusalema.

⁸Ndi akatshela wadiendi tshe wʼasi wedja, wakatshumbelaka ditemolatemola diawo tsho ndu wakadilambulaka elambu, pupu.

⁹Latuyalaka akumalela Solomona kele, ne dia ndi akanya utema andi le Latuyalaka, Unyashungu wa Isariyele, lakene le ndi tena pendi.

¹⁰Ndi akawudjela olembe lu dikambu ne, diaha ndjela ditemolatemola. Keli Solomona kunama aui wakawutela Latuyalaka.

¹¹Ku Latuyalaka akawutela ati: Ne dia we akatshi okone, kunama daka diami la elembe wakamakudjela, layunya diulelu uma lʼanya aye, layudisha ukambi aye.

¹²Dikambu otoi, dimi haludiosa lamʼeniye la lumu, dikambu dia sho Davidi. Keli layudihotola uma lʼanya wʼonʼaye.

¹³Dimi halohotola diuleu tshe. Dimi layutshikela onʼaye wudja otoi dikambu dia ukambi ami Davidi, ndu dia Jerusalema yakamasonola.

¹⁴Latuyalaka akatundjiya Solomona utunyi Hadada, uma lu diuhu dia khumʼekanga ka Edome, dia ndo la ndi.

¹⁵Lu etena kakaloshaka Davidi Edome, Joaba, olumbodi wʼalimbi, akatshu dia ntukhunde wane wakavu. Ndi akatudiaka apami tshe waki la Edome.

¹⁶(Ne dia Joaba akatshikala leko ngondo shamalu ndi la Isariyele tshe, edja ndu lamʼakandashili apami tshe waki la Edome ushiki).

¹⁷Lʼetena kako, kakalawo Hadada ndi la ekambi wa shi, asi Edome, utsha lʼEdjibitu, laso Hadada eki djongo ya hyami.

¹⁸Vo wakunela uma la Midiyana, wakatshu utsha la Parana. Vo wakatosa apami wʼasi Parana, wakatshu utsha lʼEdjibitu, wakakumi lʼEdjibitu le Farayo, khumʼekanga ka Edjibitu. Farayo akasha Hadada luudu, akukimanyiaka la mbu ya nde ndu akawusha kete ya nkamba dikambo.

¹⁹Hadada akahumo lukulu lʼolo lu ashu wa Farayo. Osoku ndi akawusha onangu wadendi wadi, onangu wadendi Tapenese.

²⁰Ndi akuti la ndi ona pami, Ngenubata. Tapenese akukidia awele lu luudu la Farayo. Ku Ngenubata akayalaka lu luudu la Farayo, lʼatei wʼana wa Farayo.

²¹Lamʼakuki Hadada lukumu lʼEdjibitu ati: Davidi akayeli washi, ndu Joaba, olombodi wʼalimbi, akavu, ndi akatela Farayo ati: Ukimo ntshu lu kete yami.

²²Ku Farayo akawumbula ati: Kakona kahumbaye la le mi, kalangaye ntsho lu kete yaye? Ndi akûkaluya diui ati: Nduku engo, keli ukimo ntshu.

²³Unyashungu akatundjiya Solomona utunyi ukina wa ndo la ndi, Rezona, ona pami Eliyada, lakalawo uma laka khumendi Hadadezere, khumʼekanga ka Zoba.

²⁴Ndi akasanganya antu la le ndi, ku ndi akayala olombodi wʼului wamvuwi wa mbu ya nde, lʼokongo a lamʼakadiakaka Davidi asi Zoba. Vo wakatshu la Damaseke, wakatudjase leko, ku wakatuwudja khumʼekanga la Dameseke.

²⁵Ndi aki utunyi wa Isariyele lu nshi tshe ya lumu la Solomona; akatshaka kolo uku akatshaka Hadada. Ndi akahetshaka asi Isariyele; akulela la Suriya.

²⁶Ku Jeroboama, onʼa Nebate, ukambi wa Solomona, usi Efarayima wa Zereda, onʼa Zerua, wadi aki udu, akedia lunya le khumʼekanga.

²⁷Dikambu ne mbakandeme lunya le khumʼekanga. Solomona akahiki Milo, ndu akadihi ahuli wakalana lʼusumba wa Da vidi, shi.

²⁸Jeroboama aki la wulu ndu la dihunga. Solomona akenaka ulimu wakakambuka pami kako la wulu nau la dihunga. Ku ndi akukitsha olombodi wʼantu wakawakambiaka elimu la wulu wa lu luudu la Josefu.

²⁹Lʼetena keso, Jeroboama akayatumbaka uma la Jerusalema, akayuhumana la umvutshi Ahidja, usi Shilo, lu mbuka olote ukutu wʼuyuyu. Vo ahendi atu mbaki lʼusui.

³⁰Ahidja akose ukutu wʼuyuyu wakandalote, akawati betshi dikumi la pendi.

³¹Ku ndi akatela Jeroboama ati: Ose betshi dikumi ne dia okone mbata Latuyalaka, Unyashungu wa Isariyele, ati: Enda, lutsha mpotola diulelu uma lʼanya wa Solomona, ku layukusha wauhu dikumi.

³²(Keli ndi ayuyala la diuhu otoi dikambu dia ukambi ami Davidi, ndu ne dia Jerusalema, usumba wakamasonola lʼatei a wauhu tshe wa Isariyele).

³³Ne dia vo wakanseke, wakatemola Ashitoreta, etemolatemola ka umuntu kʼasi Sidona; Kemoshe, etemolatemola kʼasi Amona, ndu ne dia vo konkendakenda lu mbuka yami, dia ntsha akambu wʼusimbwi lu ashu ami, ndu dia nama elembe ami la adjangu ami, uku akatshaka Davidi, shi Solomona.

³⁴Dimi halunya diulelu tshe uma lʼanya andi. Keli layuwete umbuledi lu nshi ya lumu landi tshe lu dikambu dia ukambi ami Davidi, lakamasonola ndu lakalamaka elembe ami la adjangu ami.

³⁵Keli dimi layunya diulelu una lʼanya wa onʼandi, ku layukusha wauhu dikumi.

³⁶Dimi layutshika diuhu otoi le onʼandi, dia ukambi ami Davidi ndjala la tala nshi tshe la ntundu kami, la Jerusalema, usumba wakamasonola dia nkitsha lukumbu lami leko.

³⁷Dimi layukosa, ku we ayulela kene tshe kayulanga utema aye, we ayuyala khumʼekanga ka Isariyele.

³⁸Naka we ayukitanyiaka kene tshe kayumukutelaka, naka we ayokendakendaka lu mbuka yami ndu ayutshaka kene kusimbwi lu ashu ami dia nama elembe ami la adjangu ami, uku akatshaka ukambi ami Davidi, dimi layuyala la ye. Dimi layukuhikela luudu lushikikadi, uku akamahikela Davidi, ndu layukusha Isariyele.

³⁹Uma lu dikambu ne mbayumusuya tukanula ta Davidi, keli aha pundju.

⁴⁰Solomona akayangi dia ndjaka Jeroboama. Ku Jeroboama akunela, akalawo utsha lʼEdjibitu le Shishake, khumʼekanga ka Edjibitu. Ndi akatutshikala lʼEdjibitu edja ndu lamʼakavu Solomona.

⁴¹Undi, etsha ekina wa Solomona, akambu tshe wakandatshaka ndu yimba yandi kunfundama lu buku diʼetsha wa Solomona?

⁴²Solomona akulela Isariyele tshe deku akumi anei la Jerusalema.

⁴³Ndi akayeli washi; akakhundema lʼusumba wa Davidi, shi. Ku onʼandi Rehoboama akulela lu dihuli diandi.