Read tetala 1 Khumi ya Dikanga 12 Bible Online

1 Khumi ya Dikanga 12 - tetala bible

1 Khumi ya Dikanga 12

¹Rehoboama akatshu la Shekeme, ne dia Isariyele tshe wakatshu la Shekeme dia ntuwudja khumʼekanga.

²Lamʼakuki Jeroboama, onʼa Nebate, lukumu (ndi aki lʼEdjibitu, lene akandalawo khumʼekanga Solomona), ku ndi akakalula uma lʼEdjibitu.

³Vo wakatumi antu dia ntuweta. Ku Jeroboama la ului tshe wa Isariyele wakatshu le Rehoboama, wakatuwutela vati:

⁴Sho akete lokoho lasu wutshu, ku kakiane we ukitshakitsha lohombo lone la wulu ndu lokoho lone la wutshu lakatatahi sho, ku shu tayuyala antu aye.

⁵Ndi akawatela ati: Nyutshu, keli kanyukaluli le mi lʼokongo wa nshi shatu. Ku vo wakatshu.

⁶Khumʼekanga Rehoboama akambula esumbi waki lasuki la Solomona, shi, lamʼakindi la lumu, ati: Wuhu akona wayumukaluya wudja one diui?

⁷Ku vo wakawutela vati: Naka we ayukimanyia wudja one elo, ayakambela ulimu, ndu naka we ayakaluya aui wʼololo, vo wayuyala antu aye pundju.

⁸Keli Rehoboama akatshiki daku diakulaki esumbi, akatshu dia ntumbula elongo wʼapami wakuli kame la ndi, ndu waki lasuki la ndi.

⁹Ndi akawambula ati: Diui diakona diayumiʼtukaluya wudja one wakamvutela vati: Ukitshakitsha lokoho lakatatahi sho?

¹⁰Ku elongo wʼapami wakuli kame la ndi, wakawutela vati: Okone mbayuyutela wudja wakakutela vati: Sho akete lokoho lasu wutshu, keli we, utahulilo! Okone kuwateli wati: Luhita lami la tshunguthungu ndeka lukendi la papa wuki.

¹¹Papa akanyahe lokoho la wutshu, ku kakiane, dimi layulete wutshu wuleki le nyu. Papa akanyokomolaka eshingo, keli dimi layunyulumatsha kutu.

¹²Jeroboama la wudja tshe wakakalula lushi la satu le khumʼekanga Rehoboama, uku akandawatela ati: Kanyukaluli le mi lʼokongo a nshi shatu.

¹³Khumʼekanga akakaluya wudja diui dia wulu. Ndi akatshiki daku diakulaki esumbi,

¹⁴akateketa la wo uku akawutela elongo wʼapami ati: Papa akete lokoho la nyu wutshu, keli dimi layutamanya lete wutshu le nyu. Papa akanyokomolaka eshingo, keli dim layunyulumatsha kutu.

¹⁵Okone khumʼekanga kumbukela wudja, ne dia dikambu so diakayi uma le Latuyalaka, dia nshidiya diui diakandati le Ahidja, usi Shilo, lu dikambu dia Jeroboama, onʼa Nebate.

¹⁶Ku lamʼakenyi Isariyele vati: Khumʼekanga hatukedi, vo wakûkaluya diui vati: Etenyi kakona kesu la to kame la Davidi? Shu kema la ukito kame la onʼa Jese. Isariyele li, nyutshu lu mvudu yanyu yʼapema.[48] Davidi li! kakiane ulami khumbu kaye. Ku Isariyele wakatshu lu mvudu yawo yʼapema.

¹⁷Asi Isariyele wakadjashi lʼesumba wa Juda atu, mbakulela Rehoboama.

¹⁸Ku khumʼekanga Rehoboama akatumi Adorama, laki olombodi a wane wakakambiaka antu elimu la wulu. Keli Isariyele tshe wakuki Adorama ave, ku ndi akavu. Okone khumʼekanga Rehoboama akasamanya dia mbahema lu pusupusu kandi, dia nd wo utsha la Jerusalema.

¹⁹Osoku mbakakakito Isariyele uma le khumbu ka Davidi edja ndu elo.

²⁰Isariyele tshe wakuki lukumu vati: Jeroboama akakalula, vo wakatumi antu dia ntuweta, dia ndi ndja lu lusanganya. Ku vo wakayuwudja khumʼekanga ka Isariyele tshe. Nduku untu lakayeli khumbu ka Davidi, tshikima diuhu dia Juda tu.

²¹Lamʼakakumi Rehoboama la Jerusalema, ndi akatusanganya khumbu tshe ka Juda la diuhu dia Bendjamina, andoshi wa ta nunu lukama la akumi enanei wakeyaka ndo ta ololo dia vo ntolosha khumbu ka Isariyele, dia mbakaluya ludiulelu dia Rehoboama, onʼa Solomona.

²²Keli diui dia Unyashungu diakayi le Shemaya, umvutshi a Unyashungu, ati:

²³Otekete la Rehoboama, onʼa Solomona, khumʼekanga ka Juda, la khumbu tshe ka Juda, ka Bendjamina, ndu le antu wakatshikala wati:

²⁴Latuyalaka kata okone ati: Tanyutshokaki, ndu tanyoloshaki anengenyu asi Isariyele, nyu tshe, untu lʼuntu akaluli lakandi, ne dia uma le mi mbuyi dikambu ne. Vo wakakitanyia diui dia Latuyalaka. Ku vo wakakalula la wakawo, uku akandawatela.

²⁵Jeroboama akahiki usumba wa Shekeme lu leke lʼakuna wa Efarayima, akadjase leko. Ku ndi akatumbi uma leko, akatuhika Penuele.

²⁶Ku Jeroboama akati lʼutema ati: Kakiane diulelu diayukalula le khumbu ka Davidi.

²⁷Naka antu ane wayutshokaka la Jerusalema dia ntulambula elambu lu luudu la Latuyalaka, etema awo wayukadimo utsha le khumewo Rehoboama, khumʼekanga ka Juda. Vo wayutandjaki, ku vo nkalula le Rehoboama, khumʼekanga ka Juda.

²⁸Lamʼakashili khumʼekanga nkana yimba, ndi akatshi tana ta ngombe tuhendi ta paunyi; akatela Isariyele ati: Isariyele li! ndi etali katunyutshokaka la Jerusalema li! Isariyele, nyendi ditemolatemola dianyu, diakanyutundja uma lu kete ya Edjibitu.[49]

²⁹Ndi akakitsha yana ya ngombe motshi la Betele, ku kina la Dane.

³⁰Dikambu so diakayala kolo. Antu wakatshu la Dane dia ntotemola yana ya ngombe motshi.

³¹Jeroboama akahiki mvudu lu ahuli wa ladiku, akadji antu wakandose uma lʼatei a wudja tshe elombedi, waki kundjala asi Lewi.

³²Jeroboama akadjanga dia vo ndjalaka la lushi la wuki lu lushi la dikumi lʼatanu, lu ngondo kʼenanei, uku lushi la wuki laki la Juda. Ku ndi akalambulaka elambu lʼediakelu. Osoku mbakandatshaka la Betele, dia vo nambulaka tana ta ngombe takandatshi. Ndi akakitsha elombedi lu alunga wakandatshi la Betele.

³³Ku ndi akambela lʼediakelu kakandatshi la Betele lushi la dikumi lʼatanu la ngondo kʼenanei, ngondo kakandasonola uku lulangu landi.[50] Ndi akadjangela asi Isariyele dia vo ndjala la lushi la wuki, akambela lʼediakelu dia ntutshumba tsho.