Read tetala 1 Khumi ya Dikanga 13 Bible Online

1 Khumi ya Dikanga 13 - tetala bible

1 Khumi ya Dikanga 13

¹Nyulungi, umvutshi a Unyashungu omotshi akakumi la Betele uma la Juda, uma lu diui dia Latuyalaka lamʼakemadi Jeroboama lʼediakelu dia ntshumba ntsho.

²Ndi akahangohangwela ediakelu uma lu diui dia Latuyalaka ati: Ediakelu! ediakelu li! Latuyalaka kata okone ati: Ulungi, ona pami omotshi ayuto lu luudu la Davidi, lukumbu landi Josiya. Ndi ayulambula elombedi wa lʼalunga ladiku diaye, wako watshumba tsho ladiku diaye. Ndu wayutshumba weka wʼantu ladiku diaye.[51]

³Umvutshi akakimo djimbitelu lushi lako ati: Onʼeli djimbitelu yakati Latuyalaka ati: Nyulungi, ediakelu kayate, ku utuku wʼuma ladiku diato wayudiangana.

⁴Lamʼakuki khumʼekanga diui dia umvutshi a Unyashungu lakahangwelaka ediakelu ka la Betele, ndi akasimbula lunya ladiku diʼediakelu ata ati: Nyuwundi! Ku lunya lakasimbula Jeroboama lakumi tu, ku ndi kumbeya lukaluya uya le ndi ntu.

⁵Ediakelu kakate, ku utuku waki ladiku diato wakadiangana, uku djimbitelu yakakimo umvutshi a Unyashungu uma lu diui dia Latuyalaka.

⁶Khumʼekanga akatela umvutshi a Unyashungu ati: Osengesengele Latuyalaka, Unyashungu aye, ndu onombele dia lunya lami nka-langana. Umvutshi a Unyashungu akosengasengela Latuyalaka, ku lunya landi lakakalangana, lakayala uku akilo ntundu.

⁷Khumʼekanga akatela umvutshi a Unyashungu ati: Yeti tutshu lakami, utukutumuya yema, layutukusha wedi.

⁸Keli umvutshi akûkaluya diui ati: Kuyanga we ayumbisha etenyi ka hendi ka luudu laye, dimi hatshu la ye. Dimi halole kuyanga no ashi lu dihuli ne.

⁹Ne dia olembe one mbakambidjangela Latuyalaka ati: Tolekaki ma, tonokaki ashi, ndu ntukalulaki lu mbuka kakayayi.

¹⁰Okone ndi akatshu lu mbuka kekina, kunkalula lu mbuka kakandayi uya la Betele.

¹¹Umvutshi omotshi wʼusumbi akadjashi ia Betele. Onʼandi a pami omotshi akatusanyia akambu tshe wakatshi umvutshi a Unyashungu la Betele lushi lako, wakatela shewo ndu aui tshe wakandatela khumʼekanga.

¹²Ku ndi akawambula ati: Lu mbuka kakona kakandatshwe? Anʼandi wakenyi mbuka kakatshu umvutshi a Unyashungu lakayi uma la Juda.

¹³Ndi akatela anʼandi ati: Nyukitshiya edye ladiku dia punda. Vo wakukitshiya edye ladiku dia punda. Ku ndi akahemaladiku diato,

¹⁴akayeli umvutshi a Unyashungu, ku ndi akatutana udjashi la tshina diʼuwamba. Ndi akawumbula ati: We keli umvutshi a Unyashungu, lakayi uma la Juda? Ndi akûkaluya ati: Elu, dimi.

¹⁵Ku ndi akawutela ati: Yeti tutshu lakami, litali yema ya ma.

¹⁶Keli ndi akûkaluya diui ati: Dimi haleyi nkalula la ye kuyanga ntsho lakaye. Dimi halole la ye ma, kuyanga no la ye ashi lu dihuli ne.

¹⁷Ne dia diui dia Latuyalaka diakamvutela ati: Tolekaki ma leko kuyanga no ashi, ndu tukalulaki lu mbuka kakayuyutsho.

¹⁸Ndi akûkaluya diui ati: Ndu dimi, umvutshi mbemi uku we. Ondjelo akamvutedi uma lu diui dia Latuyalaka ati: Utuyi la ndi lakaye, keli ayuli ma ndu ayono ashi. Osoku mbakandukesi.

¹⁹Umvutshi a Unyashungu akakalula landi, akatole ma, ndu akatono ashi lu luudu la pami kako.

²⁰Kamʼakawadjashi lu mesa, diui dia Latuyalaka diakayi le umvutshi wakûkaluya.

²¹Ku ndi akalelela umvutshi a Unyashungu lakayi uma la Juda ati: Latuyalaka kata ati: Ne dia we akahedia diui dia Latuyalaka, kunkitanyia olembe wakakudjela Latuyalaka, Unyashungu aye,

²²keli we akakaludi amuoyole ma, ndu ambuyono ashi lu dihuli diakandakutela ati: Tolekaki ma, tonokaki ashi, udu aye hawukundama lu diumbu dia washo.

²³Lamʼakashidiya umvutshi wakandatukaluya nde ma la no ashi, ndi akukelekela edye lu punda.

²⁴Umvutshi a Unyashungu akunela, ndi akatuhumana la tambwe. Ku to kakudiaki. Udu andi akakalema lu mbuka, punda kakatshikala la le wo, ndu tambwe kakemadi lasuki la wo.

²⁵Antu waketi laawo, wakenyi udu wukalemi lu mbuka, la tambwe kemadi lasuki la wo. Ku vo wakatuta dikambu so lʼusumba wakadjashi umvutshi wʼusumbi.

²⁶Lamʼakuki umvutshi wʼusumbi, la katukaluya uma lu mbuka dikambu so, ndi akati ati: Umvutshi a Unyashungu, lakahedia diui dia Latuyalaka oso. Diako mbakukimwi Latuyalaka.

²⁷Ndi akatela anʼandi wʼapami ati: Nyunkelekele edye lu punda, ku vo wakakikeleka.

²⁸Ndi akatshu, akatutana udu andi wukalemi lu mbuka. Ku punda la tambwe wemadi lasuki lʼudu. Tambwe konde udu, ndu kundjaka punda.

²⁹Umvutshi ako akunyia udu wʼumvutshi a Unyashungu, akawahe ladiku dia punda, akakalula la ndi lʼusumba dia ntukhunde ndu dia ntutsha utanda andi.

³⁰Ndi akatukhunde lu wuku andi wa diumbu, akuleli, ati: Yee! onalingu!

³¹Lamʼakandashili mbukhunde, ndi akatela anʼandi ati: Lamʼayumuvo, kanyunkhunde lu wuku one wambukhundema umvutshi a Unyashungu. Kanyukitsha weka ami lasuki la weka andi.

³²Ne dia diui diʼuma le Latuyalaka diakandahangwela ediakelu ka la Betele ndu mvudu tshe ya lu alunga weli lʼesumba wa la Samariya, diayu shidiyama.

³³Lʼokongo a dikambu ne, Jeroboama kumumo uma lu mbuka kandi ka kolo. Ndi akadji elombedi wa lu alunga wakandasonola uma lʼatei a wudja ntu. Untu tshe lakalangi, ku ndi mbukidia olombedi wa lu alunga.

³⁴Uma lu dikambu dia kolo ne, mbakashili luudu la Jeroboama ushiki, mbakalashisho uma ladiku dia kete.