Read tetala 1 Khumi ya Dikanga 14 Bible Online

1 Khumi ya Dikanga 14 - tetala bible

1 Khumi ya Dikanga 14

¹Lʼetena keso Abidja, ona pami a Jeroboama, akayala la kandji.

²Jeroboama akasengasenga wadendi ati: Olote ahondo akina waheya antu vati: Wadi a Jeroboama keye, uneli utshu la Shilo. Leko keli umvutshi Anidja, lakamvutela ati: We kayuyala khumʼekanga ka wudja one.

³Ose ekama dikumi wa ma, ekati, la puki kʼusanga, utshu le ndi. Ndi ayutukutela dikambu diayuyala le ona.

⁴Wadi a Jeroboama akatshi osoku, akunela, akatshu utsha la Shilo, akatukuma laka Ahidja. Ahidja komenaka ntu, ashu andi wakayala enguli, ne dia ndi aki usumbi.

⁵Latuyalaka akatela Ahidja ati: Ulungi, wadi a Jeroboama one ayayi dia ndjukumbula dikambu dia onʼandi, ne dia ona eko la kandji. Kuyuwuteli wuhu one la wuhu one. Lamʼayundukuma, ndi ayuyafanya la umuntu ukina.

⁶Okone lamʼakuki Ahidja kindu yandi lamʼakandasukana la suku, ndi akawutela ati: Wadi a Jeroboama, oto, ukundi alangaye ndjafanya la umuntu ukina? Lambosengwama dia nkutela aui wa wulu.

⁷Tshoka kututeli Jeroboama wati: Latuyalaka, Unyashungu wa Isariyele, kata ati: Dimi lakakedia umi lʼatei wʼantu, lakakudji uwandji a wudja ami Isariyele.

⁸Dimi lakahotola diulelu uma lu khumbu ka Davidi, lakakushadio. Keli we, kundjala uku aki ukambi ami Davidi, lakalamaka elembe ami ndu lakandjelaka lʼutema tshe, lakatshaka paka akambu wʼusimbwi lu ashu ami.

⁹We akatshi kolo ndeka antu tshe waki la ntundu kaye, we akayatshela ditemolatemola la dikishi dia lolelola, dia mbukiami kele. We akambikadja lʼokongo aye.

¹⁰Uma lu dikambu so mbayangami ntuma elanyelu lu luudu la Jeroboama. Layudiaka usika pami tshe leli lu diuhu dia Jeroboama, one leli fumbi ndu one luyadjasedi lu Isariyele. Dimi layomba khumbu ka Jeroboama uku atombaka untu tumi, edja ndu khumbu kako kambushila.[52]

¹¹Usika Jeroboama tshe layuvo lʼusumba, fo yayuwole; la one layuvo lʼusui, fudu ya lʼulungu yayuwole, ne dia Latuyalaka kata.

¹²Okone uneli, ukaluli lakaye. Kamʼayuyukuma lʼeotwelo kʼusumba, ona ayuvo.

¹³Isariyele tshe wayulela, wayukhunde. Paka ndame utu kayukhundema lu diumbu uma lu diuhu dia Jeroboama, ne dia paka ndame utu yema yʼololo la ntundu ka Latuyalaka, Unyashungu wa Isariyele.

¹⁴Latuyalaka ayudja khumʼekanga lu Isariyele, kayushila khumbu ka Jeroboama ushiki lushi lako. Aha elo kayutshama dikambu diako?

¹⁵Latuyalaka ayusutshasutsha Isariyele uku atusutshasutshaka ashi sopo. Ndi ayukhundula Isariyele uma lu kete yʼololo nye yakandasha washewo. Ndi ayutahandjula la wedi wa Eyufarate ne dia vo wakayatshela dikishi dia mbukia Latuyalaka kele.

¹⁶Ndi ayukimo Isariyele ne dia kolo ya Jeroboama, yakandatshi ndu yakandanganyia Isariyele.

¹⁷Wadi a Jeroboama akunela, akatshu. Ndi akakumi la Tiriza. Lamʼakandakumi la suku dia luudu, ona akavu. Ku Isariyele tshe wakukhunde, wakuleli,

¹⁸uku diui diakati Latuyalaka lʼunyo wʼukambi andi, umvutshi Ahidja.

¹⁹Enda etsha ekina wa Jeroboama, uku akandalokaka ata, ndu uku akandulela, wambufundama lu Buku diʼEkondo wa Khumi ya dikanga ya Isariyele.

²⁰Jeroboama akulela deku akumi ahendi la pendi, ndi akayeli washi. Ku onʼandi Nadaba akulela lu dihuli diandi.

²¹Rehoboama, onʼa Solomona, akulela Juda. Ndi aki la deku akumi anei la otoi lamʼakandayala khumʼekanga. Ndi akulela deku dikumi la esambeli la Jerusalema, usumba wakasonola Latuyalaka lʼatei a wauhu tshe wa Isariyele dia nkitsha lukumbu landi. Lukumbu la nyangu Rehoboama laki Nama, usi Amona.

²²Asi Juda wakatshi akambu waki kolo lu ashu wa Latuyalaka, wakawukia kandjema la kolo yakawatshaka, yuleki nye yakatshaka washewo.

²³Ndu vo wakayahikela alunga kame la dimeta, la dikishi ladiku dia akuna tshe wʼetali, ndu latshina diʼutamba tshe wʼuyuyu.[53]

²⁴Ndu apami, akanga a luseka,[54] wakunanaka lʼasekawo apami waki lu kete. Vo wakukuyaka ditshelu tshe dia wononyi dia wedja wakatshanya Latuyalaka uma la ntundu kʼasi Isariyele.

²⁵Lʼeleku ka tanu ka diulelu dia Rehoboama, Shishake, khumʼekanga ka Edjibitu, akayi dia ndjolosha Jerusalema.[55]

²⁶Ndi akose ekundji wa lu luudu la Latuyalaka ndu wa luudu la khumʼekanga, akatole tshe. Ndi akose dingawu tshe dia paunyi diakatshi Solomona.[56]

²⁷Khumʼekanga Rehoboama akatshi dingawu diʼohotela lu dihuli diadio, akadikimo lʼanya wʼelombodi wʼandawi wakalamaka luudu la khumʼekanga.

²⁸Tena tshe lamʼakotoka khumʼekanga lu luudu la Latuyalaka, undawi akadiembaka, akadikaluyaka lu luudu lʼandawi.

²⁹Undi, etsha ekina wa Rehoboama la akambu tshe wakandatshaka hawufundami lu Buku diʼEkondo wa Khumi ya dikanga ya Juda?

³⁰Ta diakayalaka lʼasa Rehoboama la Jeroboama tena tshe.

³¹Rehoboama akayeli washi, ku wakukhunde la le washi, lʼusumba wa Davidi. Lukumbu la nyangu laki Nama, usi Amona. Ku onʼandi Abidjame akulela lu dihuli diandi.