Read tetala 1 Khumi ya Dikanga 15 Bible Online

1 Khumi ya Dikanga 15 - tetala bible

1 Khumi ya Dikanga 15

¹Lʼeleku ka dikumi lʼenanei ka diulelu dia Jeroboama, onʼa Nebate, kakatatela Abidjame mbulela Juda.

²Ndi akulela deku satu la Jerusalema. Lukumbu la nyangu laki Maka, onʼa Abisaloma.

³Ndi akayakimo lu kolo tshe yakatshaka shi la ntundu kandi. Utema andi tshe kundjala le Latuyalaka, Unyashungu andi, uku aki tshendi Davidi.

⁴Keli lu dikambu dia Davidi, mbakawusha Latuyalaka, Unyashungu andi, tala la Jerusalema[57] dia mbedia kanula yandi lʼokongo andi, la dia nshikike Jerusalema.

⁵Ne dia Davidi akatshaka akambu wʼusimbwi lu ashu wa Latuyalaka, ndi kombetola lu kene tshe kakawudjangela Latuyalaka lu nshi ya lumu landi tshe tshikima lu dikambu dia Uriya, usi Hiti.[58]

⁶Ta diakayalaka lʼasa Rehoboama la Jeroboama lu nshi tshe yaki Rehoboama la lumu.[59]

⁷Etsha ekina wa Abidjame, la kene tshe kakandatshaka, kunfundama lu Buku diʼEkondo wa Khumi ya dikanga ya Juda? Ta diakayalaka lʼasa Abidjame la Jeroboama.

⁸Abidjame akayeli washi, wakul hunde lʼusumba wa Davidi. Ku onʼandi Asa akulela lu dihuli diandi.

⁹Lʼeleku ka akumi ahendi ka Jeroboama, khumʼekanga ka Isariyele, kakatatela Asa mbulela Juda.

¹⁰Ndi akulela deku akumi anei la otoi la Jerusalema. Lukumbu la tshendi laki Maka, onʼa umuntu a Abisaloma.

¹¹Asa akatshaka akambu wʼusimbwi lu ashu wa Latuyalaka, uku akatshaka tshendi Davidi.

¹²Ndi akanya apami, akanga a luseka, wakunanaka la anyawo apami uma lu kete. Ndi akanya dikishi tshe diakatshaka washi.[60]

¹³Ndi akanya diulelu dia khu mʼekanga ka umuntu le tshendi Maka, ne dia ndi akatshi ekishi ne dia Ashera. Asa akatshatsha ekishi lasuki la kyoko ya Kidirona.

¹⁴Keli alunga kunshila, kuyanga utema wa Asa tshe waki le Latuyalaka lu nshi ya lumu landi tshe.

¹⁵Ndi akakitsha diango diakatakitshisha shi, ndu diakandakidia ndame, dia fesa, dia paunyi la puki, lu luudu la Latuyalaka.

¹⁶Ta diakayala lʼasa Asa la Basha, khumʼekanga ka Isariyele, lu nshi yawo ya lumu tshe.

¹⁷Basha, khumʼekanga ka Isariyele, akayi dia ndjolosha Juda. Ndi akayuhika Rama dia nshimba asika Asa, khumʼekanga ka Juda, ntumba la mboto.

¹⁸Asa akose fesa tshe, la paunyi tshe yakatshikala lu aumbelu wa lu luudu la Latuyalaka, ndu wa lu luudu la khumʼekanga, akayisha ekambi andi wakandatumi le Bene-Hadada, onʼa Tabirimona, onʼa Heziyona, khumʼekanga ka Suriya, lakadjashi la Damaseke. Khumʼekanga Asa akutumela diui ati:

¹⁹Shu ahendi, tudji sheki uku akatadji papa la sho. Kakiane lambukutumela ushasha wa fesa la wa paunyi. Tshoka tudiaki sheki yakayadji, we la Basha, khumʼekanga ka Isariyele, mbayundumpiko.

²⁰Bene-Hadada akukela khumʼekanga Asa. Ndi akatumi elombodi andi wʼalimbi dia ntolosha esumba wa Isariyele, ku ndi akalembia Idjona, Dane, Abele-Bete-Maka, Kinerote tshe, ndu kete tshe ya Nafetali.

²¹Lamʼakuki Basha lukumu, ndi akakimo mpika Rama. Ndi akatshikala la Tiriza.

²²Khumʼekanga Asa aketi Juda tshe, kuntshika nduku untu. Vo wakatosa ave la etamba wakatshaka Basha elimu wa mpika Rama. Ku khumʼekanga Asa akatshi la wo ulimi wa mpika Ngeba ka la Bendjamina la Mizipa.

²³Undi, etsha ekina tshe wa Asa, wulu andi la akambu tshe wakandatshaka ndu esumba wakandahiki, hawufundami lu Buku diʼEkondo wa Khumi ya dikanga ya Juda? Ndi aki la kandji lu akaka tena tshe lu nshi yandi yʼusumbi.

²⁴Asa akayeli washi, akakhundema la le washi, lʼusumba wa Davidi tshendi. Ku onʼandi Jehoshafata akulela lu dihuli diandi.

²⁵Nadaba, onʼa Jeroboama, akulela Isariyele lu eleku ka hendi ka Asa, khumʼekanga ka Juda. Ndi akulela Isariyele deku pendi.

²⁶Ndi akatshi kene kaki kolo lu ashu wa Latuyalaka; akakendakenda lu mbuka ka shi, akayakimo lu kolo yakanganyia shi Isariyele.

²⁷Basha, onʼa khidja, uma lu khumbu ka Isakara, akutshwela sheki. Ku ndi akudiaki la Ngibetona, lu kete yʼasi Filistiya, lu etena kakadingi Nadaba la Isariyele tshe Ngibetona.

²⁸Basha akudiaki lu eleku ka satu ka Asa, khumʼekanga ka Juda, ku ndi akulela lu dihuli diandi.

²⁹Lamʼakandayala khumʼekanga, ndi akadiaki khumbu tshe ka Jeroboama, kumpandja nduku untu. Ndi akadiaki wane tshe waki la lumu uku diui diakatela Latuyalaka ukambi andi Ahidja, usi Shilo,[61]

³⁰ne dia kolo yakatshi Jeroboama, ndu ne diakandanganyia Isariyele dia mbutsha Latuyalaka, Unyashungu wa Isariyele, kele.

³¹Undi, etsha wa Nadaba, la akambu tshe wakandatshaka, hawufundami lu Buku diʼEkondo wa Khumi ya dikanga ya Isariyele?

³²Ta diakayalaka lʼasa Asa la Basha, khumʼekanga ka Isariyele, lu nshi ya lumu lawo tshe.

³³Lu eleku ka satu ka Asa, khumʼekanga ka Juda, Basha, onʼa Ahidja, akulela Isariyele tshe la Tiriza. Ndi akulela deku akumi ahendi la nei.

³⁴Ndi akatshi kene kaki kolo lu ashu wa Latuyalaka, akakendakendaka lu mbuka ka Jeroboama, akayakimo lu kolo yakanganyia Jeroboama Isariyele.