Read tetala 1 Khumi ya Dikanga 16 Bible Online

1 Khumi ya Dikanga 16 - tetala bible

1 Khumi ya Dikanga 16

¹Dʼui dia Latuyalaka diakayi le Jehu, onʼa Hanani, lu dikambu dia Basha ati:

²Dimi lakakedia uma lu ditshu, ku lakakudji uwandji wa wudja ami Isariyele. Keli ne dia we akakendakendaka lu mbuka ka Jeroboama, ndu ne dia we akanganyia wudja ami Isariyele dia vo mbutshami kele lu kolo yawo,

³uki, dimi layomombia Basha la khumbu kandi, layete khumbu kaye uku khumbu ka Jeroboama, onʼa Nebate.

⁴Usika Basha layuvo lʼusumba, fo yayuwole; la one tshe layuvo lʼusui, fudu yayuwole.

⁵Undi, etsha ekina wa Basha, akambu wakandatshaka, la wulu andi wʼata, hawufundami lu Buku diʼEkondo wa Khumi ya dikanga ya Isariyele?

⁶Basha akayeli washi, wakukhunde la Tiriza. Ela, onʼandi, akulela lu dihuli diandi.

⁷Diui dia Latuyalaka diakayi uma lʼunyo wʼumvutshi Jehu, onʼa Hanani, lu dikambu dia Basha la luudu landi, ne dia kolo tshe kakandatshaka la ntundu ka Latuyalaka, dia mbukia kele lʼulimu wakandatshi lamʼakandafani la wa lu khumbu ka Jeroboama; ndu ne dia ndi akadiaki khumbu ka Jeroboama.

⁸Lʼeleku ka akumi ahendi la asamaiu ka diulelu dia Asa, khumʼekanga ka Juda, kakatatela Ela mbulela Isariyele lu Tiriza. Ndi aki lela deku pendi.

⁹Ukambi andi Zimiri, olombodi wa etenyi ka hendi kʼului andi wa pusupusu, akawudjela sheki. Etena kako Ela aki lu mbidjo wanu la Tiriza lu luudu la Areza, laki olombodi wa luudu la khumʼekanga la Tiriza.

¹⁰Zimiri akoto, akatokomola, akudiaki lʼeleku ka akumi ahendi lʼesambeli ka diulelu dia Asa, khumʼekanga ka Juda. Ku ndi akulela lu dihuli diandi.

¹¹Lamʼakandayala khumʼekanga, ndi akadjase lu kiti ka diulelu, akadiaki wa lu luudu la Basha tshe. Ndi kuntshika nduku ona pami otoi lʼatei a khumbu kandi, kuyanga lʼatei wʼengenyi andi.

¹²Osoku mbakadiaki Zimiri wa lu luudu la Basha tshe, uku diui diakati Latuyalaka lu dikambu dia Basha uma lʼunyo wʼumvutshi Jehu,

¹³lu dikambu dia kolo tshe yakatshi Basha la onʼandi Ela, ndu yakawanganyia Isariyele dia mbukia Latuyalaka, Unyashungu wa Isariyele, kele lu dikishi diawo.

¹⁴Undi, etsha ekina wa Ela, la akambu tshe wakandatshaka, hawufundami lu Buku diʼEkondo wa Khumi ya dikanga ya Isariyele?

¹⁵Lʼeleku kʼakumi ahendi lʼesambeli ka diulelu dia Asa, khumʼekanga ka Juda, Zimiri akulela nshi esambeli la Tirizi. Laso ku wudja wa Isariyele waki lu mpika wumbe wa ndosha Ngibetona, kaki lu anya wʼasi Filistiya, ta.

¹⁶Lamʼaki wudja lu wumbe wa ta, vo wakuki lukumu vati: Zimiri akadjela khumʼekanga sheki, akudiaki! Ku lushi lako, Isariyele tshe waki lu wumbe wa ta, wakadji Omiri, olombodi wʼalimbi khumʼekanga ka Isariyele.

¹⁷Omiri akunela ndi la asi Isariyele tshe waki la ndi uma la Ngibetona, wakatudinga Tiriza.

¹⁸Lamʼakenyi Zimiri ati: Usumba ambulembiama, ndi akoto lu luudu la khumʼekanga, akayatshumbi la luudu, akavu. Osoku mbakandavu,

¹⁹ne dia akambu wa kolo wakandatshi, waki kolo lu ashu wa Latuyalaka lamʼakandakendakendaka lu mbuka ka Jeroboama, lamʼakandayakimo lu kolo yakatshaka Jeroboama dia munganyia Isariyele.

²⁰Undi, etsha ekina wa Zimiri la sheki yakandadji, hawufundami lu Buku diʼEkondo wa Khumi ya dikanga ya Isariyele?

²¹Wudja wa Isariyele wakatana beke pendi: leke lomotshi lakayeli Tibini, onʼa Nginate, wakalangi mbudja khumʼekanga; leke lukina lakayeli Omiri.

²²Keli leke lakayeli Omiri lakalembia leke lakayeli Tibini, onʼa Nginate. Okone Tibini akavu, ku Omiri akulela.

²³Lʼeleku kʼakumi asatu lʼotoi ka diulelu dia Asa, khumʼekanga ka Juda, kakatatela Omiri mbulela lu Isariyele. Ndi akulela deku dikumi la pendi. Ndi akulela deku samalu la Tiriza.

²⁴Ndi akasumbi ukungu wa Samariya uma le Shemere lʼushinga wa talata hyendi ya fesa. Ndi akahiki usumba waki la lungeli la ta lʼukungu, akawole ati: Samariya, uma lu lukumbu la Shemere kanga ukungu.

²⁵Omiri akatshaka kene kaki kolo lu ashu wa Latuyalaka, akaleki wane tshe waki la ntundu kandi ntsha kolo.

²⁶Ndi akakendakendaka lu mbuka tshe ka Jeroboama, onʼa Nebate. Ndi akuyelaka lu kolo yandi tshe yakandanganyia Isariyele dia mbukia Latuyalaka, Lʼnyashungu wa Isariyele, kele lu dikishi diawo.

²⁷Undi, etsha ekina wa Omiri wakandatshaka la wulu andi wʼata, hawufundama lu Buku diʼEkondo wa Khumi ya dikanga ya Isariyele?

²⁸Okone Omiri akayeli washi, wakukhunde la Samariya. Ku Ahaba, onʼandi, akulela lu dihuli diandi.

²⁹Lʼeleku ka akumi asatu lʼenanei ka diulelu dia Asa, khumʼekanga ka Juda, kakatatela Ahaba, onʼa Omiri, mbulela lu Isariyele. Ahaba, onʼa Omiri, akulela Isariyele lu Samariya deku akumi ahendi la pendi.

³⁰Ndi akaleki tshe waki la ntundu kandi ntsha kolo lu ashu wa Latuyalaka.

³¹Dia ndjela akambu wa kolo tshe wakatshaka Jeroboama, onʼa Nebate, aki dikambu dia tshitshe lu ashu andi. Ladiku diʼakambu ane, ndi akatshuki Jezebele, onʼa Etibala, khumʼekanga ka Sidona, akatshu, akatukambela Bala ulimu, akatotemola.

³²Ndi akatshela Bala ediakelu lu luudu lakanduhikela la Samariya.

³³Ahaba akasele ekishi kʼAshera. Ahaba akaleki khumi ya dikanga tshe ya Isariyele yaki la ntundu kandi mbukia Latuyalaka, Unyashungu wa Isariyele, kele.

³⁴Lu nshi yandi, Hiyele, usi Betele, akahiki Jeriko. Lamʼakandatshi etshina kʼusumba, Abirame, onʼandi la pami lʼenundu, akavu; lamʼakandeme kuki ya suku diʼusumba, Sengube, onʼandi la pami la kushi, akavu, uku diui dia Latuyalaka, diakandati uma lʼunyo wa Jashua, onʼa Nuna.[62]