Read tetala 1 Khumi ya Dikanga 19 Bible Online

1 Khumi ya Dikanga 19 - tetala bible

1 Khumi ya Dikanga 19

¹Ahaba akasanyia Jezebele akambu tshe wakatshi Elidja, ndu uku akandadiaki amvutshi tshe la yombo.

²Ku Jezebele akatumi dikendji le Elidja ata ati: Ditemolatemola kadiundjaki naka lui lʼushidi one dimi hakutshedi uku akayatshela otoi lʼotoi lʼatei wʼamvutshi aku.

³Lamʼakanduki dikambu so, ndi akunela, akalawo dia nshimbela lumu landi. Ndi akatukuma la Bere-Sheba ka la Juda, akatutshika ukambi andi leko.

⁴Keli ndi ndame akatshu lokendo la lushi otoi lʼusui wa shenga, akatudjase la tshina dia lokonga. Ndi akakumbula nyoi, akalombe ati: Latuyalaka, ambukuka! Ose lumu lami, ne dia dimi handeki wa papa ololo.

⁵Ndi aketama la tshina dia lokonga, akalali. Ku ondjelo akayunyinginya, akawutela ati: Eto, uli.

⁶Ndi akendi, ku ukati wa lufumba la uhundi wʼashi waki lasuki la ote andi. Ndi akali, akano, aketama ntu.

⁷Ondjelo akayi le ndi etena ka hendi, akayunyinginya, akawutela ati: Uneli, uli, ne dia mbuka katayatshu keki etali.

⁸Ndi aketo, akali, akano. Uma lu wulu wa ma diako mbakandatakendakendaka tanyi akumi anei la etshu akumi anei. Ndi akatukuma la Horeba, ukungu a Unyashungu.

⁹Ndi akatoto lu wuku leko, akatetama. Ku diui dia Latuyalaka diakayi le ndi ati: Elidja, katshaye lane na?

¹⁰Ku ndi akûkaluya diui ati: Lakafudia saki kami lu dikambu dia Latuyalaka, Unyashungu, Kanga lulimbilimbi ne dia asi Isariyele wakaseke daka diaye, wakahandjula diakelu diaye. Vo wakadiaki amvutshi aye la yombo, tshikima dime utu kambutshikala. Ku vo wambuyanga ndjakami.[67]

¹¹Ku Latuyalaka akûkaluya diui ati: Utshu, utemali lʼukungu la ntundu kami. Ku Latuyalaka aketi. Lopepe la wuiu la mamba lakayala, lakati ekungu, lakatshatsha ave la ntundu ka Latuyalaka. Keli Latuyalaka taki lʼatei a lopepe. Lʼokongo wa lopepe, edidimelu ka kete kakayala, keli Latuyalaka taki lʼatei a edidimelu ka kete.

¹²Lʼokongo wa edidimelu ka kete, dja yakayala, keli Latuyalaka taki lʼatei a dja. Ku lʼokongo a dja, diui diʼokoke dia yoyo diakukema.

¹³Lamʼakadiuki Elidja, ndi akakumbi dihondo lʼelundji, akatumbi, akatema la suku dia wuku. Ku ndi akuki diui diawumbula ati: Elidja, katshaye lane na?

¹⁴Ku ndi akakaluya diui ati: Lakafudia saki kami lu dikambu dia Latuyalaka, Unyashungu, Kanga lulimbilimbi tshe, ne dia asi Isariyele wakaseke daka diaye, wakahandjula diakelu diaye. Vo wakadiaki amvutshi aye la yombo, tshikima dime utu kambutshikala. Ku vo wambuyanga ndjakami.[68]

¹⁵Latuyalaka akawutela ati: Uneli, ukimeli mbuka lʼusui wa shenga wa la Damaseke. Lamʼayuyukuma, kutukiti Hazaele iso dia ndi ndjala khumʼekanga ka Suriya.[69]

¹⁶Kutukiti ndu Jehu, onʼa Nimishi, iso dia ndi ndjala khumʼekanga ka Isariyele[70] Kutukiti ndu Elisha, onʼa Shafata, usi Abele-Mehola, iso dia ndi ndjala umvutshi lu dihuli diaye.

¹⁷Okone one layuhanda yombo ya Hazaele, Jehu ayudiaka. La one layuhanda yombo ya Jehu, Elisha ayudiaka.

¹⁸Keli layuyatshikela antu nunu esambeli lu Isariyele wahatakhusela Bala adui[71] ndu wahatakitemola.

¹⁹Elidja akunela uma loko, akatutana Elisha, onʼa Shafata, afusa difusa. Ngombe akumi ahendi la nyei yaki hyendi hyendi yakatakutulaka lungu. Ku Elisha aki kame la hyendi nye ya lʼokongo. Elidja aketola utsha le ndi, akawahe koti diandi.

²⁰Elisha akatshiki ngombe, akayeli Elidja la luwangu, akatusengasenga ati: Etawo dimi talakanyi la papa la nyomi, keli ndjukuyeli. Elidja akawutela ati: Ukaluli, utukani yimba lu kene kamumukutshela.

²¹Ndi akakalula uma lene akandatayelaka Elidja, akose ngombe hyendi, akayidiaki, akayikati la koho yaki lu kingu yayo; akasha antu, ku vo wakali. Lʼokongo diku ndi akunela, akayeli Elidja, akatuyala ukimanyidi andi.