Read tetala 1 Khumi ya Dikanga 2 Bible Online

1 Khumi ya Dikanga 2 - tetala bible

1 Khumi ya Dikanga 2

¹Lamʼakasukana etena ka Davidi mvo, ndi akasha onʼandi Solomona okende, ata ati:

²Dimi lutsha ntsho utsha lu mbuka kʼantu tshe. Okone ukikitali, uyali pami!

³Embaki okende wakakusha Latuyalaka, Unyashungu aye, dia ndjela mbuka yandi la dia nama adjangu andi, aui andi, elembe andi, la alaka andi uku akawafundi lu elembe wa Mose, mbayuyuluwanaka lu akambu tshe wayuyutshaka lu ahuli tshe wayuyutshok ka.

⁴Dia Latuyalaka nshikike diui liakandamvutela ati: Naka anʼaye wayuluwanya akambu awo, dia nkendakenda la ntundu kami lu mete la nyumu yawo tshe, ndu la etema awo tshe, we hahumbaki ukito wa mbidjase lu kiti ka diulelu ka Isariyele.

⁵We mbeyaka uku akantshela Joaba onʼa Zeruya, ndu uku akandatshela elombodi ehendi wʼalimbi wa Isariyele: Abinere,[3] onʼa Nere, la Amasa,[4] onʼa Jetere, wakandadiaki. Lu nshi ya ki, ndi akasomboya dikila diakawatshulula lu nshi ya ta. Ndi akakiti dikila diʼuntu iaha la unungu lʼuya waki lu lukendi lami, la lu sabata yaki lʼekulu ami.

⁶Kutsheli uku yimba yaye, tetawoki divu diandi dia ndjui ntsho la ki utsha lʼudimu a pengandu.

⁷Keli kutsheli ana wa Barazilai, usi Ngiliyade,[5] ololo. Vo kawuyali kame la waku watolekaka ma lakaye, ne dia vo wakankimanyia lamʼakamalawo onʼanyo Abisaloma.

⁸Enda, untu omotshi eko la ye, lukumbu landi Shimei, onʼa Ngera, usi Bendjamina, uma la Bakurima. Ndi akambidji mananu ka wulu lushi lakamatshu utsha la Mahanayima.[6] Keli ndi akayi dia ndjuhumana la mi la Jorodana. Ku dimi lakutshebela le Latuyalaka nti: Dimi hakudiaki la yombo.[7]

⁹Okone, tuwendaki uku untu laha la unungu, ne dia we eli kanga yimba. We ayeya kene keli ololo we mbutshela. We ayuhuluya ote andi wa ndjui lu dikila utsha lʼudimu a pengandu.

¹⁰Davidi akayeli washi, ku wakukhunde lʼusumba wa Davidi.

¹¹Davidi akulela deku akumi anei lu Isariyele. Ndi akatuledi deku esambeli la Heberona, la deku akumi asatu la satu la Jerusalema.[8]

¹²Solomona akadjase lu kiti ka diulelu ka Davidi, shi,[9] ku diulelu diandi diakashikikala wulu.

¹³Adonidja, onʼa nangita, akatshu le Batesheba, nyangu Solomona. Batesheba akawumbula ati: Undi la aui wa ki mbuyeye? Ku ndi akûkaluya diui ati: Elu.

¹⁴Ndi akahe diui dikina ati: Dimi la diui dia nkutela. Ku ndi akûkaluya diui ati: Otekete!

¹⁵Adonidja akawutela ati: We mbeyaka wati: Diulelu diaki diami ndu ashu wa Isariyele tshe waki le mi dia vo mbidjami khumʼekanga. Keli diulelu diakakadimo, djakayala le onalingu, ne dia Latuyalaka akawushadio.

¹⁶Kakiane dimi nangaka nkolomba engo kemotshi, tunyimaketo. Ku ndi akûkaluya diui ati: Otekete!

¹⁷Adonidja akosengasenga ati: Utonombele khumʼekanga Solomona (ne dia ndi hutuna diui diaye), dia ndi mbishami Abishange, usi Shunema, wadi.

¹⁸Batesheba akûkaluya diui ati: Kawo, dimi layutukoteketela le khumʼekanga.

¹⁹Batesheba akatshu le khumʼekanga Solomona dia ntoteketela Adonidja. Khumʼekanga akunela, akatshu dia ntuhumana la ndi, akatukhusamela, ku ndi akayudjase ntu lu kiti kandi ka diulelu. Wakelela nyangu khumʼekanga edie, ku ndi akadjase lu lunya landi la pami.

²⁰Batesheba akawutela ati: Dimi nangaka nkolomba yango ya tshitshe: Tunyimakeyo. Ku khumʼekanga akawutela ati: Nyomi, olombe, dimi halukudima.

²¹Ndi akawutela ati: Usha onanyo Adonidja, Abishange, usi Shunema, wadi.

²²Khumʼekanga Solomona akakaluya nyangu diui ati: Okoko wana walombeye Adonidja Abishange, usi Shunema? Olombele ndu diulelu, ne dia ndi eko enundu ami; ndu le dia olombedi Abiyatara la Joaba, onʼa Zeruya, weko kame la ndi.

²³Ku khumʼekanga Solomona akatshibi le Latuyalaka ati: Unyashungu antsheli la ngala naka Adonidja kumvuta dikambu so dia nshisha lumu landi!

²⁴Mete, uku eli Latuyalaka la lumu! lakankikitsha ndu lakambisha lu kiti ka diulelu ka papa Davidi, ndu lakambete khumbu uku daka diandi, Adonidja, ayuvo elo!

²⁵Khumʼekanga Solomona akatumi Benaya, onʼa Jehovada. Ndi akatokomola Adonidja, ku ndi akavu.

²⁶Lʼokongo diku, khumʼekanga akatela olombedi Abiyatara ati: Unela utsha la Anatota lu dikambo dianyu, ne dia we nkukaka mvo Dimi halukudiaka elo, ne dia we ikembaka oshete wa sheki wa Khumemi Latuyalaka, la ntundu ka papa Davidi,[10] ndu ne dia we akasuwi la papa lu asui andi tshe.[11]

²⁷Osoku mbakanya Solomona Abiyatara uma lʼulimu andi wʼolombedi a Latuyalaka, dia ndi nshidiya diui diakati Latuyalaka la Shilo dikambu dia khumbu ka Eli.[12]

²⁸Lukumu lakakumi le Joaba, ne dia ndi akekama lu leke la Adonidja, kuyanga mbakindi kombekama Abisaloma. Ku Joaba akatushama lu luudu la dipema la Latuyalaka, akatutamela seki yʼediakelu.

²⁹Wakatutela khumʼekanga Solomona vati: Joaba akalawi utsha lu luudu la dipema la Latuyalaka. Ndi eko leko lasuki lʼediakelu. Ku Solomona akatumi Benaya, onʼa Jehoyada, ati: Tshoka, utudiaki.

³⁰Benaya akakumi lu luudu la dipema la Latuyalaka, akatela Joaba ati: Khumʼekanga ati: Utumbi. Ndi aku-kaluya diui ati: Kema, dimi nangaka mvo paka lane. Benaya akatutela khumʼekanga aui aso ati: Osoku mbata Joaba.

³¹Khumʼekanga akûkaluya diui ati: Ututsheli uku utshindi, utudiaki, utukhunde. Uminyia, dimi la wa lu luudu la papa, dikila diakatshulula Joaba utshululatshulula.

³²Latuyalaka ayukitsha unungu a dikila diandi lʼote andi ndame, ne dia ndi akadiaki antu a endi wakuleki ololo ndu wusimbwi. Ndi akadiaki antu ane ahendi la yombo lamʼuki papa Davidi kumbeya: Abinere, ouʼa Nere, olombodi wʼalimbi wa Isariyele, la Amasa, onʼa Jetere, olombodi wʼalimbi wa Juda.

³³Dikila diawo diayuyalaka lʼote a Joaba ndu lʼete wa tukanula tandi pundju. Keli ki kayuyalaka pundju uma le Latuyalaka le Davidi, tukanula tandi, wa lu luudu landi, ndu kiti kandi ka diulelu.

³⁴Ku Benaya, onʼa Jehoyada, akatshu, akatudiaka. Wakatukhunde lakandi lʼusui wa shenga.

³⁵Khumʼekanga akadji Benaya, onʼa Jehoyada, olombodi wʼalimbi lu dihuli diaki Joaba. Ndi akadji Zadoka olombedi lu dihuli dia Abiyatara.

³⁶Khumʼekanga akatumi akendji dia nteta Shimei; akawutela ati: Uyahikeli luudu la Jerusalema. Udjase loko, tutumbaki dia mbeteta.

³⁷Eyi wati: Lushi layuyutumba dia nteho okedi wa Kiderona, we ayudiakema. Dikila diaye diayuyala lʼote aye weme.

³⁸Shimei akakaluya khumʼekanga diui ati: Kawo, uku ambuyuta we khumemi, khumʼekanga mbayumutsha, dimi ukambi aye. Ku Shimei akadjase nshi efula la Jerusalema.

³⁹Lamʼakeu deku satu, fumbi hyendi ya Shimei yakulawo, yakatshu le Akishi, onʼa Maka, khumʼekanga ka Ngata. Ku wakatutela Shimei vati: Enda, fumbi yaye yeko la Ngata.

⁴⁰Shimei akunela, akahe edie lu punda kandi, akatshu le Akishi la Ngata dia ntuyanga fumbi yandi. Ndi akatuya la wo uma la Ngata.

⁴¹Wakatutela Solomona vati: Shimei dkatumbi uma la Jerusalema, akatshu la Ngata, ambukalula.

⁴²Khumʼekanga akatumi untu dia nteta Shimei, akayuwumbula at Dimi kunkutshibela le Latuyalaka, ndu dimi kunkutela diui dia wulu nti: Lushi layuyutumba, layuyengola lʼandja, we ayudiakema? We kunkaluyami diui wati: Kawo, lambetawo?

⁴³Ukundi akiye kunama etshibelu kaye le Latuyalaka, ndu olembe wakamakudjangela?

⁴⁴Khumʼekanga akatela Shimei ati: Weme mbeyaka lʼutema aye akambu tshe wakayatshela papa Davidi. Okone Latuyalaka utsha nkaluya kolo kaye lʼote aye.

⁴⁵Keli khumʼekanga Solomona ayotshokwama, la kiti ka diulelu ka Davidi kayushikikala pundju la ntundu ka Latuyalaka.

⁴⁶Okone khumʼekanga akatumi Benaya, onʼa Jehoyada. Ndi akatshu, akatokomola Shimei, ku ndi akavu. Osoku mbakashikikala diulelu lu anya wa Solomona.