Read tetala 1 Khumi ya Dikanga 20 Bible Online

1 Khumi ya Dikanga 20 - tetala bible

1 Khumi ya Dikanga 20

¹Bene-Hadada, khumʼekanga ka Suriya, akasanganya alimbi andi tshe. Khumi ya dikanga akumi asatu la hyendi waki Kame la ndi ndu falasa, la pusupusu ya ta. Ndi akatshu, akatudinga Samariya, akalo la wo.

²Ndi akatumi akendji lʼatei wʼusumba le Ahaba, khumʼekanga ka Isariyele, dia vo ntuwutela vati: Bene-Hadada kata ati:

³Fesa yaye la paunyi yaye, yami mbeyo; wadieye la anʼaye wuleki amena, wami mbewo.

⁴Khumʼekanga ka Isariyele akûkaluya diui ati: Uku wataye mbedio, we khumemi khumʼekanga. Laye kemi, dimi la kene tshe keli la mi.

⁵Ku akendji wakakalula le Ahaba ntu, wakayuwutela vati: Bene-Hadada kata ati: Dimi lakakutumela diui nti: Umbisha fesa yaye, paunyi yaye, wadieye la anʼaye.

⁶Keli layutuma ekambi ami le ye lʼetena kene lui. Vo wayuyangiayangia lu luudu laye ndu lu mvudu yʼekambi aye. Vo wayosa engo tshe kalekaye nanga, wayukitola.

⁷Ku khumʼekanga ka Isariyele aketi dihangamendi tshe dia kete yandi, akawatela ati: Lambunyosengasenga nti Nyuki ololo, nyulimbiteli wuhu walanga pami kene ntutshela kolo. Ndi akantumela diui dia dimi mbutumela wadiemi, anʼami, fesa yami la paunyi yami, dimi kuntuna.

⁸Dihangamendi tshe la wudja tshe wakawutela vati: Tuwukelaki, tetawoki.

⁹Okone ndi akatela akendji wa Bene-Hadada ati: Nyututeli khumemi khumʼekanga nyati: Kene tshe kakayanombe, dimi ukambi aye, etena ka ntundu ketawomi, keli kene kambuyonomba lʼokongo, kahametawo. Ku akendji wakunela, wakatuwutela aui ako.

¹⁰Bene-Hadada akutumela diui ati: Ditemolatemola kadiundjaki naka ditshu dia Samariya diayukuka dia antu tshe wayuya la mi ndudia awambu awo!

¹¹Khumʼekanga ka Isariyele akûkaluya diui ati: Nyutuwuteli nyati: Untu lalota eloto wa ta, tasemaki uku one lekulula!

¹²Lamʼakuki Bene-Hadada aui aso, laso ku ndi la khumi ya dikanga yaki lu no wanu lu tundju tawo. Ndi akatela ekambi andi ati: Nyuyalonge, ku vo wakayalonge dia ndosha usumba.

¹³Ku umvutshi akayi le Ahaba, khumʼekanga ka Isariyele, kawutela ati: Latuyalaka kata ati: We henyi ului a wuki uku wʼantu? Dimi lutsha mbakimo lu anya aye, dia we mbeya wati: Dimi keli Latuyalaka.

¹⁴Ahaba akawumbula ati: Uma le na? Ndi akûkaluya diui ati: Latuyalaka kata ati: Uma lʼekambi wʼambuledi wa beke dia wudja aye. Ku ndi akawumbula ntu ati: Wana wayutatela ta? Ku ndi mbukaluya diui ati: We.

¹⁵Ku ndi akasanganya ekambi wʼambuledi wa beke dia wudja. Vo waki kama hyendi la akumi asatu la ahendi. Lʼokongo diku ndi akasanganya utundu a wudja tshe, ee, usi Isariyele tshe. Vo waki antu nunu esambeli.

¹⁶Vo wakunela unya lʼatei ote. Laso ku Bene-Hadada aki lu mbidjo wanu lu tundju ndi la khumi ya dikanga akumi asatu la hyendi yakayi dia ndjukimanyia.

¹⁷Ekambi wʼambuledi wa lu beke wakatumbi ntundu. Bene-Hadada akatumi akendji dia ntushihudia dikambu. Ku vo wakatuwutela vati: Antu mbayatumbi uma la Samariya.

¹⁸Ndi akati ati: Naka vo wambuya la ki, nyuwandi lunda, kana lu ta kayawayi, nyuwandi lunda.

¹⁹Ekambi wʼambuledi wa lu beke wakatumbi uma lʼusumba la alimbi wakatayelaka.

²⁰Vo tshe untu lʼuntu akadiaki untu hikalo la ndi. Ku asi Suriya wakalawo. Ku asi Isariyele wakayelana la wo. Bene-Hadada, khumʼekanga ka Suriya, akalawo lu falasa ndi la ambahemi andi wa falasa.

²¹Khumʼekanga ka Isariyele akatumbi, akadiaki asi Suriya efula, akatetshatetsha falasa yawo la pusupusu yawo.

²²Umvutshi akasukana le khumʼekanga ka Isariyele, akawutela ati: Utshu, utuyakikitsha. Ukani yimba, endi kene kahumbaye ntsha, ne dia lʼeleku kʼuyuyu, khumʼekanga ka Suriya ayukalula dia ndjokolosha.

²³Ekambi wa khumʼekanga ka Suriya wakawutela vati: Ditemolatemola diawo dieko ditemolatemola dia lʼakuna, diako mbakawatuleki wulu. Keli katalosha lʼusui wa bamubamu, mete tayaleka wulu.

²⁴Utshi okone; unya khumi ya dikanga untu lʼuntu uma lu dihuli diandi. Ukitsha ambuledi wʼalimbi lu ahuli awo.

²⁵Usanganya ului wʼalimbi kame la falasa la pusupusu uku wakayashisha. Katalosha lʼusui wa bamubamu. Mete, shu tayaleka wulu. Ndi akawaukela, akatshi osoku.

²⁶Lʼetatelu kʼeleku, Bene-Hadada akasanganya asi Suriya, ku vo wakatshu utsha la Afeka dia ntolosha asi Isariyele.

²⁷Ndu asi Isariyele wakayasanganya, wakalungula mbu ya nde, wakatshu dia ntuhumana la wo. Asi Isariyele wakatuhanga welanedi la wo uku nyimba hyendi ya tshitshe ya tana ta mbudi. Keli asi Suriya wakaluli too too lu kete.

²⁸Umvutshi a Unyashungu akasukana le Khumʼekanga ka Isariyele, akawutela ati: Latuyalaka kata ati: Ne dia asi Suriya wakati vati: Latuyalaka eko etemolatemola ka lʼakuna, aha etemolatemola ka lʼekidi, dimi layukimo ului a wuki uku tshe wʼantu lʼanya aye, ku nyu nyayeya nyati: Dimi keli Latuyalaka.

²⁹Ku vo wakahangi nshi esambeli welanedi. Lu lushi lʼesambeli, ta diakayala. Asi Isariyele wakadiaki asi Suriya nunu lukama lushi otoi.

³⁰Wane wakatshikala, wakalawo utsha lʼusumba wʼAfeka. Eheli ka lukumbu lʼusumba kakanyukwela antu nunu akumi ahendi la esambeli wakatshikala. Ndu Bene-Hadada akalawo utsha lʼusumba, akatushama lu luudu lomotshi la lʼatei.

³¹Ekambi wa Bene-Hadada wakawutela vati: Ulungi, shu takuki lukumu ati: Khumi ya dikanga ya lu khumbu ka Isariyele weli akanga a ketshi, Shu tambukosengasenga shati: Tolote akutu lu kindi, la elambela lu ete, tutshu le khumʼekanga ka Isariyele, undu ndi ayukutshika la lumu.

³²Ku vo wakalote akutu lu kindi, la elambela lu ete, wakayi le khumʼekanga ka isariyele. Vo wakayuwutela vati: Ukambi aye Bene-Hadada ambukosengasenga ati: Untshiki la lumu! Ndi akawambula ati: Undi, ndi eki la lumu? Onalingu kendi.

³³Antu ako waki lu nyanga djimbitelu yʼololo, okone vo wakûkaluya diui esadi vati: Elu, Bene-Hadada onanyo kendi. Ku ndi akawatela ati: Nyutshu, nyutuyi la ndi. Bene-Hadada akayi uya le ndi, ku Ahaba akayuwahemia kame la ndi lu pusupusu.

³⁴Bene-Hadada akawutela ati: Dimi layukukaluya esumba wakatahodi papa sho. Kuyateli esese la Damaseke uku akatayatedi papa esese lu Samariya. Ku Ahaba akûkaluya diui ati: Dimi layukukimo lu dikambu dia daka ne. Ku ndi akakote la ndi lusalu, akukimo.

³⁵Untu omotshi uma lʼatei wʼana wʼamvutshi akasengasenga unyandi uma lu diui dia Latuyalaka ati: Onkote puta! Keli unyandi akatuni mbokota puta.

³⁶Ku ndi akawutela ati: Ne dia we hakitanyisha diui dia Latuyalaka, enda, lamʼayuyumo uma la le mi, tambwe ayukudiaka. Lamʼakandamo uma la le ndi, tambwe akahumana la ndi, akudiaki

³⁷Ku ndi akahumana la untu ukina, akosengasenga ati: Onkote puta, ku pami kako akokote, akuhumuya puta.

³⁸Umvutshi ako akatshu, akatukunga khumʼekanga lu mbuka, akayakeleka dihondo lu ashu dia nfana lʼuntu ukina.

³⁹Lamʼaketi khumʼekanga, ndi akulelela ati: Dimi ukambi aye laki lʼatei a ta. Ulungi, dimbi dimotshi aketodi uya le mi, akayumbisha pami kemotshi ati: Olami, naka ndi ayushisho, lumu laye layuyala lu dihuli dia lumu landi. Naka aha osoku, ku we nfuta talata otoi ka fesa.

⁴⁰Lamʼakimi lu ntsha ulimu lane la lene, ndi akashishwi. Ku khumʼekanga ka Isariyele akûkaluya diui ati: Oso eli unungu aye, ne dia weme kakayatungediwo.

⁴¹Ndi akanya dihondo esadi uma lu ashu, ku khumʼekanga ka Isariyele akulimbitela ati: Otoi omotshi wʼamvutshi mbendi.

⁴²Ndi akatela khumʼekanga ati: Latuyalaka kata ati: Ne dia we akakimo untu lakamakimo lu anya aye dia we mbudiaka, okone lumu laye layutsho lu dihuli dia lumu landi, la wudja aye lu dihuli dia wudja andi.

⁴³Khumʼekanga ka Isariyele akatshu la lunyangu la kele, akatukuma lakandi la Samariya.