Read tetala 1 Khumi ya Dikanga 21 Bible Online

1 Khumi ya Dikanga 21 - tetala bible

1 Khumi ya Dikanga 21

¹Nabota, usi Jezerele, aki la ekambo ka vinyo la Jezerele lasuki la luudu la Ahaba, khumʼekanga ka Samariya.

²Ahaba akalombe Nabota ati: Umbisha ekambo kaye ka vinyo dia to ndjala ekambo kami kʼelua, ne dia to nsukana la luudu lami. Ku dimi layukusha ekambo ka vinyo kuleki ololo. Kana we nangaka, dimi layukisumba uma le ye la falanga.

³Nabota akakaluya Ahaba diui ati: Latuyalaka ansike dia dimi nkusha ukito waki wapapa!

⁴Ahaba akoto lu luudu landi la lunyangu la kele, ne dia diui diakawutela Nabota, usi Jezerele, ati: Dimi halukusha ukito waki wapapa. Ku ndi aketama lu tangi kandi, akediya elundji amʼakina, kumbetawo nde.

⁵Wadendi Jezebele, akayi le ndi, akawumbula ati: Katshutshumalaye na? la okoko wana wahayali ma?

⁶Ku ndi akûkaluya diui ati: Dimi lakalombi Nabota, usi Jezerele, nti: Unsundja ekambo kaye ka vinyo, kana naka we nangaka umbishato kakusha ekambo kekina kuleki ololo. Keli ndi akakalusha diui ati: Dimi halukusha ekambo kami ka vinyo.

⁷Wadendi Jezebele akawumbula ati: Undi, aha we keli khumʼekanga ka Isariyele, uneli, uli, ongenengene. Dimi layukusha ekambo ka vinyo ka Nabota, usi Jezerele.

⁸Okone ndi akafundi mikanda lu lukumbu la Ahaba, wakandamati ematelu ka Ahaba, aketumi le dikumanyi la dihangamendi diakadjashi Nabota lʼusumba andi.

⁹Ndi akafundi mikanda ako ati: Nyuteli antu dia vo nkila ma; nyudji Nabota olombodi wa wudja.

¹⁰Kanyukitsha apami ahendi wa kolo la ntundu kandi. Kawumamanyia vati: We kakadji Unyashungu la khumʼekanga mananu. Kanyutundja lʼandja, kanyuwuki ave, ndi kavu.

¹¹Antu wa lʼusumba wa Nabota, dikumanyi la dihangamendi diakadjashi lʼusumba, wakatshi uku akatumela Jezebele aui wakafundami lu mikanda wakandatumela.

¹²Vo wakatela antu dia vo nkila mbu ya nde, wakadji Nabota olombodi wa wudja.

¹³Apami ahendi wa kolo wakayi, wakayudjase la ntundu kandi. Ku vo wakamamanyia Nabota la ntundu kʼantu vati: Nabota akadji Unyashungu la khumʼekanga mananu! Ku vo wakatshu la ndi lʼandja wʼusumba, wakatuwuka ave, ku ndi akavu.

¹⁴Vo wakatumela Jezebele diui vati: Wakuki Nabota ave, ku ndi akavwi.

¹⁵Lamʼakuki Jezebele lukumu ati: Wakuki Nabota ave, ndi akavwi, ndi akatela Ahaba ati: Uneli, utose ekambo ka vinyo kaki Nabota, usi Jezerele, kakandatuni nkusundja, ne dia Nabota kema la lumu ntu, ndi kavwi.

¹⁶Lamʼakuki Ahaba lukumu ati: Nabota akavwi, ndi akunela, akatshu lʼekambo ka vinyo kaki Nabota, usi Jezerele, dia to ndjala kandi hita.

¹⁷Diui dia Latuyalaka diakayi le Elidja, usi Tishibe, ati:

¹⁸Uneli, utshu dia ntuhumana la Ahaba, khumʼekanga ka Isariyele, ludjashi la Samariya, ndi uku udjashi lʼekambo ka vinyo kaki Nabota lene akandatshwi dia ntukiosa.

¹⁹Kutuwuteli wati: Latuyalaka kata ati: Aha undjakanyi la opotodi mbeye? Kutuwuteli ntu wati: Latuyalaka kata ati: Lu dihuli diku diakalombola fo dikila dia Nabota, mbayolombola fo dikila diaye.

²⁰Ahaba akambula Elidja ati: We utunyi ami, ambumbishula? Ndi akûkaluya diui ati: Ee, lambukushula, ne dia we akayasundja dia ntsha kene kaki kolo lu ashu wa Latuyalaka.

²¹Ulungi, dimi lutsha nkela elanyelu. Dimi layukomombia, layushila usika pami a lu khumbu kaye, we Ahaba, ushiki, one leli lu fumbi kana one luyadjasedi lu Isariyele.

²²Dimi layete khumbu kaye uku khumbu ka Jeroboama, onʼa Nebate, ndu uku khumbu ka Basha, onʼa Ahidja, ne dia we akambutsha kele ndu akalombola Isariyele utsha lu kolo.

²³Latuyalaka akati ndu dikambu dia Jezebele ati: Fo yayole Jezebele lʼatei wʼusumba wa Jezerele.[72]

²⁴Usika Ahaba layuvo lʼusumba, fo yayuwole; la one layuvo lʼusui, fudu ya lʼulungu yayuwole.

²⁵Nduku untu lakayasundja dia ntsha kene kaki kolo lu ashu wa Latuyalaka uku Ahaba, ako laki wadendi Jezebele lu ntshutshiyaka wulu.

²⁶Ndi akatshi dikambu diuleki wononyi dia ndjela dikishi, uku akatshaka asi Amora wakatshanya Latuyalaka la ntundu kʼasi Isariyele.

²⁷Lamʼakuki Ahaba aui wa Elidja, ndi akatshatsha ahondo, akalote akutu. Ndi akakili ma, aketamaka lu dikutu, akakendakendaka kyoke.

²⁸Diui dia Latuyalaka diakayi le Elidja, usi Tishibe, ati:

²⁹We menaka uku ambuyakitshakitsha Ahaba la ntundu kami? Ne dia ndi ambuyakitshakitsha la ntundu kami, dimi halela elanyelu lu nshi ya lumu landi. Paka lu nshi ya onʼandi, mbayumela elanyelu lu khumbu kandi.