Read tetala 1 Khumi ya Dikanga 22 Bible Online

1 Khumi ya Dikanga 22 - tetala bible

1 Khumi ya Dikanga 22

¹Suriya la Isariyele wakatshikala deku satu, kondo ta.

²Lʼeleku ka satu Jehoshafata, khumʼekanga ka Juda, akatshu le khumʼekanga ka Isariyele.

³Khumʼekanga ka Isariyele akambula ekambi andi ati: Nyu hanyeyi nyati: Ramota-Ngiliyade kasu keto? Ku shu ntshikalaka paka ki ketu, aha nkinya uma lʼanya wa khumʼekanga ka Suriya.

⁴Ndi akambula Jehoshafata ati: We ayulanga ntsho la mi la ntohotola Ramota-Ngiliyade? Jehoshafata akûkaluya diui ati: Katutshu. Dimi leli uku we, wudja ami weli uku wudja aye, ndu falasa yami yeli uku falasa yaye.

⁵Jehoshafata akasengasenga khumʼekanga ka Isariyele ati: Utambudi diui dia Latuyalaka.

⁶Khumʼekanga ka Isariyele akasanganya amvutshi lasuki la kama nyei kame, akawambula ati: Ololo dimi ntsho la ntohotola Ramota-Ngiliyade, kana tshiki dikambu? Vo wakûkaluya diui vati: Tshoka, ne dia khumeye ayakimo lʼanya aye, we khumʼekanga.

⁷Keli Jehoshafata akawumbula ati: Nduku umvutshi ukina wa Latuyalaka wekiko, wukukisu mumbula?

⁸Khumʼekanga ka Isariyele akûkaluya diui ati: Untu omotshi lukukisu mumbula uma le Latuyalaka eko, lukumbu landi Mikaya, onʼa Imila. Keli dimi mbuhetshaka, ne dia ndi hatoteketaka akambu wahatayi ololo lu dikambu diami, paka kolo ketu. Keli Jehoshafata akûkaluya diui ati: Khumʼekanga, tutaki osoku!

⁹Khumʼekanga ka Isariyele aketi usi mbalasa omotshi, akawutela ati: Tshoka esadi utuyi la Mikaya, onʼa Imila.

¹⁰Laso ku khumʼekanga ka Isariyele la Jehoshafata, khumʼekanga ka Juda, wudjashi untu lʼuntu lu kiti ka diulelu lʼeotwelo ka suku dia Samariya, wolote ahondo wa diulelu. Amvutshi tshe wakataka akambu wahatayi la ntundu kawo.

¹¹Zedekiya, onʼa Kenana, akayatshulela seki ya mbulu, akati ati: Latuyalaka kata ati: La seki nye mbayuyutshutshiya asi Suriya edja ndu we ambalanya.

¹²Amvutshi tshe wakataka akambu wahatayi pupu vati: Utshu la Ramota-Ngiliyade. We ayutuhumo lukulu Volo, ne dia Latuyalaka ayukimo lʼanya aye, we khumʼekanga.

¹³Dikendji diakatshu la nteta Mikaya akatuwutela ati: Ulungi, amvutshi wambuta aui wʼololo atu le khumʼekanga. Okone lambukosengasenga nti: Aui aye wayali uku aui awo! Uti aui wʼololo atu!

¹⁴Mikaya akûkaluya diui ati: Uku eli Latuyalaka la lumu! kene kayumvutela Latuyalaka, kayumutaka.

¹⁵Lamʼakandakumi la ntundu ka khumʼekanga, khumʼekanga akawumbula ati: Mikaya, ololo shu ntsho la ntohotola Ramota-Ngiliyade, kana ntutshiki dikambu? Ndi akûkaluya diui ati: Utshu, we ayutuhumo lukulu Volo! Latuyalaka ayukikimo Tanya aye, we khumʼekanga.

¹⁶Khumʼekanga akawutela ati: Tena dingana diakamakutshibia dia we mvutelami paka aui wa mete lu lukumbu la Latuyalaka?

¹⁷Ndi akûkaluya diui ati: Lakenyi Isariyele tshe wadiangana vwa lʼekungu uku ekoko waha la ulami.[73] Latuyalaka akati ati: Antu ane kema la uwandji. Vo tshe untu lʼuntu akaluli utsha lakandi la ki.

¹⁸Khumʼekanga ka Isariyele akatela Jehoshafata ati: Dimi kunkutela nti: Ndi hatutaka akambu wahatayi ololo lu dikambu diami, paka kolo ketu?

¹⁹Mikaya akati ntu ati: Ulungi diui dia Latuyalaka: dimi lakenyi Latuyalaka udjashi lu kiti kandi ka diulelu la ului tshe wa lʼulungu wemadi lasuki la ndi, lu lunya la pami ndu la lomoso.

²⁰Latuyalaka akawambula ati: Akona ayukesa Ahaba, dia ndi ntsho la Ramota-Ngiliyade, dia ndi ntudiakema leko? Ku vo wakûkaluya diui, omotshi wuhu one, omotshi wuhu ukina.

²¹Nyuma kemotshi akemala la ntundu ka Latuyalaka, akati ati: Dimi layukesa.

²²Latuyalaka akawumbula ati: Wuhu akona? Nyuma akûkaluya diui ati: Dimi layutsho, layutuyala nyuma ka kashi lu enyo wʼamvutshi andi tshe. Ku Latuyalaka akawutela ati: We kayutukesa, ndu we kayutolembia. Kutshu, kututshi osoku.

²³Okone nyulungi, Latuyalaka akadji nyuma ka kashi lu enyo wʼamvutshi aye ane tshe; Latuyalaka akati kolo lu dikambu diaye.

²⁴Zedekiya, onʼa Kenana, akasukana, akakomola Mikaya luwala lu tama. Ndi akawumbula ati: Wuhu akona akatumbi nyuma ka Latuyalaka uma le mi dia ntoteketa la ye?

²⁵Mikaya akûkaluya diui ati: Ulungi, we ayena dikambu ne lushi luku lamʼayuyoto lu luudu la lʼatei dia ntuyashe.

²⁶Khumʼekanga ka Isariyele akati ati: Nyundi Mikaya, nyutshu la ndi le Amona, umbuledi wa lʼusumba, la le Joashi, onʼa khumʼekanga.

²⁷Nyutuwateli nyati: Khumʼekanga kata ati: Nyudji untu one lu lukanu, kanyuwushaki ma la ashi wʼasui edja ndu lamʼayumukalula la ki.

²⁸Mikaya akati ati: Naka we ayukalula la ki, keti Latuyalaka konteketa uma le mi. Ku Mikaya akati ntu ati: Nyu antu tshe aso wuka diui diami so!

²⁹Ku khumʼekanga ka Isariyele, la Jehoshafata, khumʼekanga ka Juda, wakatshu utsha la Ramota-Ngiliyade.

³⁰Khumʼekanga ka Isariyele akatela Jehoshafata ati: Dimi layuyafanya la untu kʼuntu, ku layutsho lu ta, keli we kolote ahondo aye wa khumʼekanga. Okone khumʼekanga ka Isariyele akayafanya lʼuntu kʼuntu, akatshu lu ta.

³¹Khumʼekanga ka Suriya akadjangela elombodi akumi asatu la ehendi wa pusupusu yandi ati: Tanyolokaki la antu wa tshitshe kuyanga a waki, kanyolo paka la khumʼekanga ka Isariyele.

³²Lamʼakenyi elombodi wa pusupusu Jehoshafata, vo wakati vati: Mete, khumʼekanga ka Isariyele uku! Ku vo wakayi uya le ndi dia ndjolo la ndi. Jehoshafata akaleli.

³³Lamʼakenyi elombodi wa pusupusu vati: Ndi kema khumʼekanga ka Isariyele, vo wakakimo ndjelana la ndi.

³⁴Keli untu omotshi akuki dikuwa wukuka, ku dio diakatoto lu sambi dia eloto wa ta wa Ahaba, diakuhumuya. Ndi akatela one lakatasukuyaka pusupusu kandi ati: Ukadimo, untundja uma lʼului wʼasi ta, ne dia lambuhumo wulu.

³⁵Ta diakayala wulu lushi lako. Vo wakasunguke khumʼekanga lu pusupusu kandi elanedi la asi Suriya, ku ndi akavu la dikolo. Dikila diʼuma lu puta diakakele lu pusupusu.

³⁶Lamʼakadji unya, wakahangohango lʼatei wʼalimbi vati: Nyu tshe, untu lʼuntu akaluli lʼusumba awo la lu wudja awo.

³⁷Okone khumʼekanga akavu. Vo wakembe udu andi utsha la Samariya, wakatukhunde leko.

³⁸Lamʼakawatusula pusupusu lʼuduwa wa Samariya, fo yakalombola dikila diandi. Amantu akanga a luseka wakoke leko, uku diui diakati Latuyalaka.

³⁹Undi, etsha ekina wa Ahaba, akambu tshe wakandatshaka, luudu lʼewanga lakandahiki, la esumba tshe wakandahiki, hawufundami lu Buku diʼEkondo wa Khumi ya dikanga ya Isariyele?

⁴⁰Okone Ahaba akayeli washi. Ku onʼandi Ahaziya akulela lu dihuli diandi.

⁴¹Jehoshafata, onʼa Asa, akatatela mbulela Juda lʼeleku ka nei ka diulelu dia Ahaba, khumʼekanga ka Isariyele.

⁴²Jehoshafata aki la deku akumi asatu la tanu lamʼakandayala khumʼekanga. Ndi akulela deku akumi ahendi la tanu la Jerusalema. Lukumbu la nyangu laki Azuba, onʼa Shili.

⁴³Jehoshafata akakendakendaka lu mbuka tshe kakakendakendaka Asa, shi, ndi kombetola uma loko. Ndi akatshaka akambu wʼusimbwi lu ashu wa Latuyalaka, keli ndi kunanya alunga. Ku antu wakatetemala nambulaka elambu la elambu wa malashi lu alunga.

⁴⁴Jehoshafata akayala la khumʼekanga ka Isariyele ki.

⁴⁵Undi, etsha ekina wa Jehoshafata, uku akindi la dihunga, ndu uku akandalokaka ata, hawufundami lu Buku diʼEkondo wa Khumi ya dikanga ya Juda?

⁴⁶Jehoshafata akanya atshikadi wʼapami akanga a luseka wakeyanaka la anyawo apami, wakatshikala lu nshi ya Asa shi, uma lu kete.

⁴⁷Lu nshi sho, asi Edome tawaki la khumʼekanga. Ote omotshi a wudja kakayala khumʼekanga kawo.

⁴⁸Jehoshafata akahiki mashua wa Tarashishi dia vo ntsho utsha la Ofira dia ntemba paunyi. Keli vo kuntsho, ne dia vo wakahandjo la Eziyona-Ngebere.

⁴⁹Ku Ahaziya, onʼa Ahaba, akalombe Jehoshafata ati: Etawo ekambi ami ntsho la ekambi aye lu mashua. Keli Jehoshafata kumbetawo.

⁵⁰Jehoshafata akayeli washi, wakukhunde la le washi lʼusumba wa Davidi tshendi. Ku onʼandi Jehorama akulela lu dihuli diandi.

⁵¹Ahaziya, onʼa Ahaba, akatatela mbulela Isariyele lu Samariya lu eleku ka dikumi lʼesambeli ka diulelu dia Jehoshafata, khumʼekanga ka Juda. Ndi akulela Isariyele deku pendi.

⁵²Ndi akatshi kene kaki kolo lu ashu wa Latuyalaka, akakendakendaka lu mbuka ka shi, lu mbuka ka nyangu, ndu lu mbuka ka Jeroboama, onʼa Nebate, lakanganyia Isariyele lu kolo.

⁵³Ndi akatemolaka Bala, akakikhusamela. Ndi akukiaka Latuyalaka, Unyashungu wa Isariyele, kele lu akambu tshe, uku akatshaka shi.