Read tetala 1 Khumi ya Dikanga 3 Bible Online

1 Khumi ya Dikanga 3 - tetala bible

1 Khumi ya Dikanga 3

¹Solomona akekesanela la Farayo, khumʼekanga ka Edjibitu. Ndi akose onʼandi wadi, akayi la ndi lʼusumbu wa Davidi, edja ndu lamʼakandashidiya mpika luudu landi, luudu la Latuyalaka, la eheli ka lukumbu la Jerusalema.

²Antu wakatemola lu ahuli wa ladiku, ne dia laso ku watahiki luudu lu lukumbu la Latuyalaka.

³Solomona akalangaka Latuyalaka, akayelaka elembe wakatadji Davidi, shi. Keli dikambu otoi, ndi akalambula elambu la elambu wa lutshumba lu ahuli wa ladiku.

⁴Khumʼekanga akatshu la Ngibeyona dia ntulambula elambu, ne dia leko kaki dihuli dia ladiku diakaleki wuki. Solomona akatulambula elambu wa lutshumba kinunu lʼediakelu kako.

⁵Latuyalaka akene le Solomona lu do lʼutshu la Ngibeyona. Ndi akawutela ati: Onombe kene kalangaye keli nkushato.

⁶Solomona akûkaluya diui ati: We akenyaka papa Davidi, ukambi aye ngandji kaye ka mamba, ne dia ndi akakendakendaka la ntundu kaye la kolamelu, la sambu kʼololo ndu lʼutema wusimbwi le ye. We akulamela ngandji kene ka ma mba, dia mbusha ona pami ludjashi lu kiti kandi ka diulelu elo.

⁷Latuyalaka, Unyashungu ami li! we akambete, dimi ukambi aye, khumʼekanga lu dihuli dia papa Davidi, Keli dimi leki dikenda; lateyi nombola antu ololo.

⁸Dimi ukambi aye ludjashi lʼatei a wudja wakayasonola, ee, wudja a wuki wuki waheyama mbala, ne dia efula kawo.

⁹Umbisha, dimi ukambi aye, utema wa lutui wa nsambulaka wudja aye, la ewu ka ntshikitanya ololo la kolo. Akona ukuki nsambulaka akambu wa wudja aye a wuki one?

¹⁰Aui wa Solomona aso wakangenyangenya Khumadiondjo.

¹¹Ku Unyashungu akawutela ati: Ne dia dikambu ne mbakayanombi, we hanombi lulumbi, ongonyi, kuyanga nyumu yʼatunyi aye, keli we ambolomba ewu ka nsambulaka akambu ololo.

¹²Enda, dimi layutsha uku diui diaye. Dimi layukusha utema wa yimba la wʼewu, wuhu waki kundjala le untu la ntundu kaye ndu wahawenaki untu lufanyi la ye pundju.

¹³Ladiku diʼakambu aso, dimi layukusha ndu kene kakiye nkonomba, ekundji la lutumbu, wuhu wahayalaki le khumʼekanga kekina uku we lu nshi ya lumu laye tshe.

¹⁴Naka we ayokendakendaka lu mbuka yami, lu nama adjangu ami la elembe ami uku akatshaka Davidi, sho, dimi layufudia nshi yaye.

¹⁵Solomona akemo, akeyi ati: Lu do onʼenami. Ndi akakalula la Jerusalema. Ndi akayemala la ntundu kʼoshete wa sheki wa Latuyalaka, akalambula elambu wa lutshumba ndu elambu wa ki. Ndi akakatela ekambi andi tshe dambu.

¹⁶Amantu ahendi akanga a luseka wakayi, wakayemala la ntundu ka khumʼekanga.

¹⁷Umuntu omotshi akawutela ati: Khumemi li! dimi la umuntu one mbudjashi luudu otoi. Dimi lakuti ona la le ndi.

¹⁸Lʼokongo a nshi shatu, ndu umuntu one akuti. Shu takadjaseka kame, nduku untu laki la su lu luudu tshikima dimi la ndi atu.

¹⁹Onʼa umuntu one akavwi lʼutshu, ne dia ndi akawukamedi lu tangi.

²⁰Ndi aketwi lʼasa ndeki, akayosa onʼami uma lasuki la mi lamʼakimi, dimi ukambi aye, lu djo. Ndi akayetamia udu wa onʼandi la le mi, ku ndi ntetama la onʼami.

²¹Lamʼakametwi la pindju dia nomia ona, menyi ku ndi akavwi. Keli lamʼakamushishimi la pindju, lakenyi nti: One aha onʼami lakamuti.

²²Umuntu ukina akati ati: Aha osoku, ona lasena keli onʼami, ona luvwi keli onʼaye. Keli umuntu akûkaluya diui ati: Kema, onʼaye kuvwi, onʼami kasena. Osoku mbakawateketaka la ntundu ka khumʼekanga.

²³Ku khumʼekanga akati ati: Omotshi ambuta ati: Onʼami keli la lumu, ku onʼaye kakavwi. Keli ukina ati: Kema, onʼaye kakavwi, onʼami keli la lumu.

²⁴Khumʼekanga akati ati: Nyumbela yombo, ku vo wakela yombo la ntundu ka khumʼekanga.

²⁵Ndi akati ati: Nyati ona kʼatei atei, nyusha omotshi etshi, la ukina etshi kekina.

²⁶Keli umuntu lukanga ona laki la lumu, akuki kandji ka onʼandi lʼutema; akatela khumʼekanga ati: Khumemi li! uwusha ona leli la lumu, tanyudiakaki. Keli ukina akati ati: Kema, ndi tayalaki onʼami kana onʼaye, nyuhimbuli kʼatei.

²⁷Ku khumʼekanga akawatela ati: Nyusha umuntu la ntundu ona leli la lumu, tanyudiakaki. Ndi keli nyangu.

²⁸Isariyele tshe wakuki lukumu la esambwelu kakasambula khumʼekanga. Ku vo wakawuki woma, ne dia wakenyi vati: Yimba ya Unyashungu mbeli la ndi, dia ndi nsambula ololo.