Read tetala 1 Khumi ya Dikanga 6 Bible Online

1 Khumi ya Dikanga 6 - tetala bible

1 Khumi ya Dikanga 6

¹Solomona akatatela mpika luudu la Latuyalaka lu ngondo ka Zive ketawo ngondo ka hendi, lʼeleku ka nei ka diulelu dia Solomona lu Isariyele. To kaki eleku ka kama nyei la akumi enanei uma lamʼakatumbi asi Isariyele uma lʼEdjibitu.

²Utali wa luudu lakahikela khumʼekanga Solomona Latuyalaka aki kubita akumi asamalu; wuki alo aki kubita akumi ahendi; la wemema alo aki kubita akumi asatu.

³Utali wa mbalasa kaki la ntundu ka luudu waki kubita akumi ahendi uku aki wuki wa luudu; wekeki ato utsha la ntundu ka luudu aki kubita dikumi.

⁴Ndi akatshi adidishi wa hwe hwe, uku djungo.

⁵Ndi akahiki eheli lʼutshimba tshe, dia nsukela eheli ka luudu. To kakadingi luudu ndu luudu luleki ekila. Ndi akatshiki tundju lʼasa peli lʼutshimba tshe.

⁶Yindju ya lʼesi yaki la wuki wa kubita tshanu, yindju ya lʼatei atei kubita shamalu, ndu yindju yaki ladiku kubita esambeli. Vo wakatshi ekingo lʼandja wʼeheli ka luudu lʼutshimba tshe dia mbahe esembi wa tundju, diaha vo ntundula peli dia luudu.

⁷Lamʼakawahikaka luudu, lundju la uhumo, kenge, kana dihumo dikina, kumbukema laawo, ne dia wakatakolongi ave lu dihuli dikina.

⁸Suku dia yindju ya lʼesi diaki lu leke la diku dia kushi. Wakadelaka uma lu yindju ya lʼesi lu edelu utsha lu yindju ya lʼatei, la uma leko lu edelu kekina utsha lu yindju ya ladiku.

⁹Okone Solomona akaki luudu, akalushidiya. Ndi akandji esembi, akalufufi lʼabaya wʼesasi.

¹⁰Ndi akaki tundju lʼutshimba tshe wa luudu. Yindju la yindju yaki la wemema wa kubita tshanu. Ndi akamamanya tundju tako la luudu la etamba wʼesasi.

¹¹Diui dia Latuyalaka diakayi le Solomona ati:

¹²We one ambuhika luudu lone! Naka we ayuyelaka aui ami, ayutshaka adjangu ami, ayulamaka ndu ayuyelaka elembe ami tshe, ku layushidiya daka diakamalaki Davidi sho le ye.

¹³Dimi layudjaseka lʼatei wʼasi Isariyele, haloseka wedja ami Isariyele.

¹⁴Okone Solomona akahiki luudu, akalushidiya.

¹⁵Ndi akamami abaya wʼesasi lu peli dia lʼetei a luudu; ee, ndi akamami a aya uma lʼudihi pulu ndu lʼudiku. Ndi akadji abaya wʼelungu lʼudihi.

¹⁶Ndi akahimbula luudu kubita akumi ahendi uma la kuma, akahiki eheli ka abaya wʼesasi, uma lʼudihi pulu ndu lʼudiku. Ndi akalutshi dia lo ndjala luudu luleki ekila.[19]

¹⁷Luudu, letawo vati: Luudu la la ntundu ka luudu luleki ekila, laki kubita akumi anei lʼutali.

¹⁸Abaya wʼesasi wa lʼatei a luudu wakasangema lʼesatu wa sele la alembo. Nduku dive diakenama, tshe aki paka abaya wʼesasi atu.

¹⁹Ndi akalongosola dihuli diuleki ekila lʼetei a etemwelo utsha la kuma, dia nkitsha oshete wa sheki wa Latuyalaka.

²⁰Utali wa luudu luleki ekila waki kubita akumi ahendi, wuki kubita akumi ahendi, la wemema kubita akumi ahendi. Ndi akalukumbi la paunyi ka lutshula, akakumbi ediakelu lʼabaya wʼesasi.

²¹Solomona akakumbi lʼetei a luudu lʼekila tshe la paunyi ka lutshula. Ndi akahane molola wa paunyi la ntundu ka dihuli diuleki ekila, akahane dihondo loko.

²²Ndi akakumbi lʼetei a luudu la paunyi, edja ndu lo tshe lakashili. Ndi akakumbi ndu ediakelu kaki la ntundu ka dihuli diuleki ekila la paunyi.[20]

²³Ndi akatshi akeruba ahendi lʼutamba wʼuweli, lʼatei a dihuli diuleki ekila. Diema diawo diaki kubita dikumi, dikumi.

²⁴Utali wa dihafu otoi dia okeruba aki kubita tshanu, ndu utali wa dikina kubita tshanu pupu. Okone uma la kuma ka dihafu dimotshi edja ndu la kuma ka dihafu dikina aki kubita dikumi.

²⁵Ndu okeruba ukina aki kubita dikumi pupu. Akeruba ako ahendi waki yediko otoi ndu wuhu otoi.

²⁶Diema dia okeruba la okeruba diaki kubita dikumi.

²⁷Ndi akakitsha okeruba lu dihuli diuleki ekila. Ahafu awo wakasimbo, ku dihafu dia okeruba omotshi diakakumi lʼeheli kemotshi, la dihafu dia okeruba ukina diakakumi lʼeheli kekina. Ku ahafu awo wakamamana kʼatei a luudu.

²⁸Ndi akakumbi akeruba la paunyi.[21]

²⁹Ndi akasangi esatu wa akeruba, atuku, lʼalembo, lu peli tshe dia luudu, ndu lʼandja ndu lʼetei.

³⁰Ndi akakumbi udihi a dihuli diʼekila la paunyi, ndu wa dihuli diuleki ekila.

³¹Ndi akasele kuki yʼabaya wʼuweli ya mbidja la suku dia dihuli diuleki ekila. Dikoho la ushingiti waki uku etenyi ka tanu kʼeheli.

³²Ndi akasele kuki hyendi yʼabaya wʼuweli. Ndi akasangi esatu wa akeruba, atuku, la alembo; akayikumbi la paunyi lu esatu wa akeruba la wʼatuku.

³³Ndi akatshi ndu dikoho diʼeweli dia nkitsha la suku dia luudu. Dio diaki wuki uku etenyi ka nei kʼeheli.

³⁴Ndi akatshi ndu kuki hyendi yʼulungu. Lukuki la lukuki laki la betshi pendi, diaki la asonga wʼekuhu.

³⁵Ndi akasangi esatu wa akeruba, atuku, la alembo loko. Ndi akakumbi kuki yako la paunyi, akamami paunyi lu asangu.

³⁶Ndi akahiki lukumbu la seke la enongo esatu wʼave wa lokolonga, la onongo otoi wʼesimbi wʼesasi.

³⁷Lu ngondo ka Zive, lu eleku ka nei, kakawatatela ntsha etshina ka luudu la Latuyalaka.

³⁸Lu ngondo ka Bulu, ketawo vati: Ngondo kʼenanei, lu eleku ka dikumi lʼotoi, ndi akashidiya luudu la diango dialo tshe uku akandahumbi luhika. Ndi akaluhiki yediko ya deku esambeli.