Read tetala 1 Khumi ya Dikanga 7 Bible Online

1 Khumi ya Dikanga 7 - tetala bible

1 Khumi ya Dikanga 7

¹Solomona akayahikela luudu, lakawahiki deku dikumi la satu, vo wakalushidiya.

²Ndi akatahiki Luudu lʼUkunda a Lebanona ntundu, utali alo kubita lukama, wekeki kubita akumi atanu, la wemema kubita akumi asatu. Lo lakahemi ladiku dia enongo enei wa dikoho diʼesasi. Vo wakahe esimbi wʼesasi ladiku dia dikoho diako.

³Lo lakakumbama ladiku dia tundju taki ladiku dia dikoho akumi anei la tanu, dikumi la tanu lu yindju la yindju.

⁴Aki tundju tusatu tahatanyi, taki la adidishi welanedi.

⁵Asuku tshe la adidishi tshe wakatshama la esimbi waki la beke nei diedimi. Asuku wakelanedi lu yindju la yindju, lu tundju tako tusatu.

⁶Ndi akatshi mbalasa la dikoho. Utali ato waki kubita akumi atanu, wekeki kubita akumi asatu, la mbalasa kekina utsha la ntundu kame la dikoho, ndu esimbi ladiku dia dio.

⁷Ndi akahiki mbalasa ka kiti ka diulelu, lene akandalaka akambu, mbalasa kʼalelu kʼakambu. Ndi akakikumbi la esasi uma lʼudihi pulu ndu lʼudiku.

⁸Ndi akahiki ndu luudu lukina lakandetamaka lu wedi ukina wa seke wuhu ako. Ndi akahikela ndu ona Farayo lakandatshuki[22] luudu wuhu ako.

⁹Mvudu sho tshe yakahikama lʼave wʼushinga a wulu, wakawati lu tediko takawahumbi. Vo wakawati la so, lʼokongo ndu la ntundu, uma lʼetshina pulu ndu lʼote, uma lu seke dia luudu la Latuyalaka edja ndu lu seke dia wuki.

¹⁰Atshina wakahikama lʼave a waki wʼushinga a wulu. Ave amotshi waki lʼutali wa kubita dikumi, akina kubita enanei.

¹¹Vo wakakitsha ave wʼushinga a wulu wakawakolonga uku tediko takawahumbi, ndu etamba wʼesasi ladiku dia atshina.

¹²Lukumbu la seke dia wuki lakahikama la enongo esatu wʼave wa lokolonga, la onongo otoi wa esimbi wʼesasi, uku lukumbu la seke dia lʼatei dia luudu la Latuyalaka, ndu uku mbalasa ka luudu.

¹³Khumʼekanga Solomona aketi Hirame uma la Tura.

¹⁴Ndi aki onʼa wadi aki udu a lu wudja wa Nafetali. Shi aki usi Tura, utshudi wʼehotela. Hirame aki kanga yimba la ewu. Ndi akeyaka ntsha wehu tshe wʼelimu wʼehotela. Ndi akakumi lasuki la khumʼekanga Solomona, ku ndi akutshela elimu andi tshe.

¹⁵Ndi akatshi dikoho pendi diʼehotela. Otoi lʼotoi aki la kubita dikumi la enanei lu wemema, ndu okodi wa kubita dikumi la hyendi wakedikama utshimba wʼekoho lʼekoho.

¹⁶Ndi akalelola ehotela dia ntsha ete ehendi wa mbahe ladiku dia dikoho. Utali wʼote wa ntundu aki kubita tshanu lu wemema, ndu wa hendi kubita tshanu pupu.

¹⁷Vo wakatshi kala yakawadingi molola ladiku diʼete wa dikoho, lukala lʼote wʼekoho kemotshi, la lukala lʼote wʼekoho kekina.

¹⁸Okone ndi akadji enongo ehendi wa difanelu dia dikomi diʼutamba lu lukala la lukala, dia nkumba ote wʼekoho lʼekoho.

¹⁹Wakasangi difanelu diʼalembo diaki utali wa kubita nyei lu ete ako waki ladiku dia dikoho dia lu mbalasa.

²⁰Wakakitsha ete ladiku dia dikoho pendi lasuki la uhenga waki ladiku dia lukala. Wakatshi difanelu dia dikomi diʼutamba kama hyendi lʼenongo lʼutshimba wʼote ukina.

²¹Ndi akeme dikoho lu mbalasa ka tempelo. Ndi akeme ekoho ka lunya la pami, akakiole ati: Jakina (kitshimudi ati: Ndi ayukikitsha). Ndi akeme ekoho ka lu lunya la lomoso, akakiole ati: Boaza (kitshimudi ati: Loko keli wulu).

²²Difanelu diʼalembo diaki ladiku. Osoku mbakawashidiya ulimu wa dikoho.

²³Ndi akatshi puki ka wuki ka lolelola kʼohotela, kʼutshimbedi. Wuki ato aki kubita dikumi, ohongo ato kubita tshanu, utshimbedi ato akedikama la okodi a kubita akumi asatu.

²⁴Enongo ehendi wʼekama wufanyi la sele waki lʼesi a unyo ato. Sele yaki lu enongo ehendi. Yo yakalelwama kame la utundu.

²⁵Wakahe puki kako ladiku dia difanelu dia ngombe dikumi la hyendi. Shatu yakeledi utsha la ngelʼa kushi, shatu utsha lʼedjelu, shatu utsha ladiku dia kushi, la shatu utsha lʼehutwelu. Ekongo wa difanelu dia ngombe waki tshe utsha lʼetei.

²⁶Keka kʼohotela wa puki kako aki yediko ya wuki wʼetambi. Unyo ato akatshama la kyomba la difanelu dia alembo loko. To kakotoka ashi yediko ya bata nunu pendi.

²⁷Ndi akatshi dikitshelu diʼohotela dikumi. Ekitshelu la ekitshelu kaki kubita nyei lʼutali, kubita nyei lu wekeki, la lu wemema kubita shatu.

²⁸Ulimu wa dikitshelu diako waki okone. Dio diakatshama la betshi diʼehotela diakamamanyema lu dikandja.

²⁹Difanelu dia tambwe, ngombe, la dia akeruba diaki lʼumamu ako wʼohotela waki lʼasa akandja. Lu akandja ako waki la difanelu dia tambwe ndu dia ngombe ladiku ndu lʼesi waki la dilengalenga diʼakote akote diakalendalendaka.

³⁰Ekitshelu la ekitshelu aki la etshimbi enei wʼohotela, kame la esimbi awo wʼohotela. Kata nei diʼohotela wa lolelola diaki la tshina dia donga, ndu dengalenga dia akote akote diakalendalendaka lʼemamu adio.

³¹Unyo wʼekitshelu waki la wushu wa kubita otoi utsha ladiku. Wushu ako waki utshimbedi uku akawatshaka dikitshelu dia wuhu ako, ndu waki la wuki kubita otoi la etenyi. Wakasangi asangu lʼote wʼekitshelu. Emamu ato waki la beke nei diedimi, aha etshimbedi.

³²Etshimbi enei waki la tshina dia emamu ako enei. Esimbi awo wakasamanyi lu dikitshelu. Utshimbi la utshimbi waki la diema dia kubita otoi la etenyi.

³³Wakatshi etshimbi ako uku atuwutshaka etshimbi wa pusupusu. Wakalelola esimbi awo, la puki yawo lolelola.

³⁴Ekitshelu la ekitshelu aki la dikata nei la atshuku ato. Dio diakamamanyi kame la ekitshelu.

³⁵Etenyi ka ladiku kʼekitshelu kakayukumela lʼutshimba wa kubita otoi la etenyi lu wemema ndu kaki la esuko ato ndu emamu ato wakatshama kame.

³⁶Ndi akasangi difanelu dia akeruba, tambwe, lʼatuku lu betshi diʼesuko la lu emamu awo uku aki ahuli, ndu alembo lʼutshimba tshe.

³⁷Osoku mbakandatshi dikitshelu dikumi. Dio tshe diakalelwama yediko otoi, wuhu otoi.

³⁸Ndi akatshi alonga dikumi wʼohotela:[23] donga otoi diakakuki mboto ashi yediko ya bata akumi anei. Donga la donga diaki la wuki wa kubita nyei.

³⁹Donga la donga diaki ladiku diʼekitshelu lʼekitshelu lʼatei a dikitshelu dikumi. Ndi akakitsha dikitshelu tanu lu wedi wa lunya la pami la luudu, la tanu lu wedi wa lunya la lomoso la luudu. Ndi akakitsha puki ka wuki lu leke la lunya la pami la luudu, utsha lu leke la diku dia kushi, lu wedi wʼehutwelu.

⁴⁰Hirame akatshi puki ya minyaka utuku, kasu la alonga. Okone ndi akashidiya ulimu tshe wakandatshela khumʼekanga Solomona lu luudu la Latuyalaka:

⁴¹dikoho pendi kame la ete wa ladiku diadio, kala hyendi ya nkumba ete waki ladiku dia dikoho.

⁴²Difanelu dia dikomi diʼutamba kama nyei dikambu dia kala hyendi; enongo ehendi wa difanelu dia dikomi diʼutamba lu lukala la lukala dia nkumba ete ladiku dia dikoho.

⁴³Dikitshelu dikumi, alonga dikumi wa ladiku diadio.

⁴⁴Difuku dia wuki la difanelu dia ngombe dikumi la hyendi la tshina dia puki ka wuki.

⁴⁵Puki ya minyaka utuku, kasu, la alonga. Hirame akatshela khumʼekanga Solomona diango so tshe la ohotela wa dimena dikambu dia luudu la Latuyalaka.

⁴⁶Khumʼekanga akadilelola lu kete ya diwumba, lʼasa Sukota la Zeretana, lʼukidi wa Jorodana.

⁴⁷Solomona kombedika wutshu wa diango so, ne dia dio diakaleki efula. Diako mbakiwo kombedika diango diʼohotela.

⁴⁸Solomona akatshi diango tshe diaki lu luudu la Latuyalaka: ediakelu ka paunyi[24] la mesa wa paunyi wakawakitshaka ma dia Eyalelu;[25]

⁴⁹dikitshelu dia atala[26] dia paunyi tanu lu lunya la pami, la tanu lu lunya la lomoso la ntundu ka luudu luleki ekila kame la alembo, atala la tosholo ta paunyi;

⁵⁰akoho, tosholo ta nyimaka atala, alonga, tshibi, la pusu ya membaka akalanga wa dja, ya paunyi; apapa wa paunyi wa kuki ya luudu lʼekila, ya luudu luleki ekila ndu ya tempelo.

⁵¹Osoku mbakashidiya khumʼekanga Solomona ulimu tshe wakandatshi dikambu dia luudu la Latuyalaka. Ndi akela fesa la paunyi la diango diʼulimu diakakidia Davidi shi,[27] akadikitsha lʼatei wʼekundji wa luudu la Latuyalaka.