Read tetala 1 Khumi ya Dikanga 8 Bible Online

1 Khumi ya Dikanga 8 - tetala bible

1 Khumi ya Dikanga 8

¹Khumʼekanga Solomona akasanganya dihangamendi, ete tshe a wauhu ndu ewandji wa mvudu ya washewo wʼasi Isariyele la le ndi la Jerusalema, dia ntela oshete wa sheki wa Latuyalaka uma lu usumba wa Davidi,[28] watuwetaka vati: Siona.

²Apami tshe wa Isariyele wakamote la ntundu ka khumʼekanga Solomona lu dambu lu ngondo ka Etanima, ketawo vati: Ngondo kʼesambeli.

³Lamʼakakumi dihangamendi tshe dia Isariyele, elombedi wakembe oshete.

⁴Vo wakatole oshete wa Latuyalaka lu luudu lʼesanganelu la dipema, diango tshe diʼulimu diʼekila diaki lu luudu. Elombedi lʼasi Lewi atu mbakayadiembaka.

⁵Khumʼekanga Solomona la ului tshe wa Isariyele wakandeti la le ndi, wakemala la ntundu kʼoshete walambula ekoko la ngombe efula yaki kumbeyama mbala, ne dia efula kayo.

⁶Elombedi wakela oshete wa sheki wa Latuyalaka uya lu dihuli diawo, lʼetemwelo ka lʼetei a luudu, lu dihuli diuleki ekila, la tshina diʼahafu wa akeruba.

⁷Ahafu wa akeruba wakasembemadi ladiku dia dihuli diʼoshete wakukumbi vo la esimbi awo.

⁸Esimbi ako waki etali. Okone kuma yawo yakemamaka uma lu dihuli diʼekila, la ntundu ka etemwelo ka lʼetei. Keli vo komenamaka uma lʼandja. Vo weko laawo edja ndu elo.

⁹Nduku engo kaki lʼoshete, tshikima pasi pendi diʼave, diakatandji Mose la Horeba[29] lamʼakadji Latuyalaka lʼasi Isariyele sheki, lamʼakawatumbi uma lu kete ya Edjibitu.

¹⁰Lamʼikatumbi elombedi uma lu dihuli diʼekila, lingi diakaluli lu luudu la Latuyalaka,

¹¹edja ndu elombedi kumbeya ntsha ulimu dikambu dia dingi, ne dia lutumbu la Latuyalaka lakaluli lu luudu landi.[30]

¹²Solomona akati ati: Latuyalaka akakitsha unya lʼulungu, Keli ndi akati ati: Ndi mbeyaka mbidjase lu udjima a hito.

¹³Dimi lambukuhikela luudu la lutumbu, dihuli dia we mbidjase pundju!

¹⁴Khumʼekanga akakadimo, akatshokola ului tshe wa Isariyele, ku uiui tshe wakemala.

¹⁵Ndi akati ati: Latuyalaka, Unyashungu wa Isariyele, lakateketa le papa Davidi, atumbwami! La wulu andi mbakandashidiya daka, diakandalaki ati:

¹⁶Umaka lushi lamʼakamatundja wudja ami Isariyele uma lʼEdjibitu, dimi konsonola usumba uma lʼatei a wudja tshe wa Isariyele dia mpika luudu lami dia lukumbu lami ndjala loko. Keli dimi lakasonola Davidi dia mbulela wudja ami Isariyele![31]

¹⁷Nyulungi, papa Davidi aki la saki ka mpikela lukumbu la Latuyalaka, Unyashungu wa Isariyele, luudu.

¹⁸Keli Latuyalaka akawutela ati: We akatshi ololo lamʼakayayala la saki ka mpikela lukumbu lami luudu.[32]

¹⁹Keli paka onʼaye, lakayuti uma lʼutema aye, kayuhikela lukumbu lami luudu.[33]

²⁰Latuyalaka akashidiya diui diakandati, ne dia dimi lambukita papa Davidi, lambudjase lu kiti ka Isariyele, uku akati Latuyalaka ntundu. Ndu dimi lambuhikela lukumbu la Latuyalaka, Unyashungu wa Isariyele, luudu.

²¹Dimi lakatshikela oshete dihuli, lone eli sheki ya Latuyalaka, yakandadji la washesu lamʼakandatundja uma lu kete ya Edjibitu.

²²Solomona akemala la ntundu kʼediakelu ka Latuyalaka, la ntundu kʼului tshe wʼasi Isariyele, akeme anya utsha lʼulungu;

²³akalombe ati: We Latuyalaka, Unyashungu wa Isariyele! Nduku Unyashungu ukina weko uku we ladiku diʼulungu kana la tshina dia kete. We katulamaka daka la ngandji ka shikaa le ekambi aye, watokendakendaka lu ashu aye lʼetema tshe!

²⁴We akalamela ukambi aye, papa Davidi, daka diakayati lʼunyo aye. We ambudishidiya elo la wulu aye.

²⁵Latuyalaka, Unyashungu wa Isariyele li! ulamaki daka diakayalaki ukambi aye, papa Davidi, wati: Naka anʼaye wayuyakimela, ndu wayukendakendaka la ntundu kami uku akayakendakendaka, we hahumbaki ukito wa mbidjase lu kiti ka diulelu dia Isariyele pundju.[34]

²⁶Kakiane lambukosengasenga nti: We Unyashungu wa Isariyele, diui diakayatatedi ukambi aye, papa Davidi, diashidiyami!

²⁷Mete, we Unyashungu, ayetawo mbidjase la kete? Enda, ulungu la ulungu weli ladiku diʼulungu hawukuki le ye, kete luudu lone lambumuhika![35]

²⁸Latuyalaka, Unyashungu ami li! uki dombelo diami, lʼosengosengo ami, dimi ukambi aye. Uhukami delu diami la dombelo diami diamumukolomba elo.

²⁹Dia ashu aye wendaki luudu lone ndu la yanyi ndu lʼutshu, dihuli diakayati wati: Leko kayuyala lukumbu lami![36] kukaki dombelo diayumukolombaka lu dihuli ne, dimi ukambi aye.

³⁰Ketawoki esengosengo ami, dimi ukambi aye, la wa wudja aye Isariyele, lamʼayutukolombaka lu dihuli ne! Kulungaki umi lʼedjaselu kaye lʼulungu, kukaki, kutudimanyiaki!

³¹Naka untu ambutshela unyandi kolo, ku vo wambutshibia, ku ndi ambuyutshiba la ntundu kʼediakelu kaye lu luudu lone,

³²kuwukeli lʼulungu, kutshi, kusambuli ekambi aye. Kudji one leli la unungu mananu; kahe kolo kandi lʼote andi. Kuyindja one laha la unungu; kutsheli uku eli ololo andi!

³³Lamʼayolembiama wudja aye Isariyele le utunyi, ne dia wakakutshela kolo, naka vo wambukadimo le ye ndu wambolemia lukumbu laye, wambukolomba ndu wambukosengasenga lu luudu lone,

³⁴kuwaukeli lʼulungu. Kudimanyia wudja aye Isariyele kolo kawo. Kakaluya ntu lu kete yakayasha washewo!

³⁵Lamʼayudihama ulungu diaha mvula ndo, ne dia kolo kakawakutshela, naka vo wayolomba lu dihuli ne, wayolemia lukumbu laye, ndu wayukadimo uma lu kolo yawo lamʼayuyasuya,

³⁶kuwaukeli lʼulungu. Kudimanyia ekambi aye, wudja aye Isariyele kolo kawo. Kuwaetsha mbuka kʼololo kayuwuhumba nkendakenda. Kolosha mvula lu kete yakayasha wudja aye ukito.

³⁷Lamʼayuyala ndjala ka kasha, sui dia wulu, elanyelu ka mbu ya nde, endjo kana eto, ndu lamʼayuwadinga utunyi lʼesumba awo, kana wehu tshe wʼasui kana kandji;

³⁸naka untu otoi, kana wudja aye wa Isariyele tshe, leya sui dia utema andi, ambeme anya lu luudu lone lu dombelo,

³⁹kuwaukeli lʼulungu uma lu dihuli diudjashiye, kuwadimanyia. Kutsheli untu lʼuntu uku ditshelu diandi, ne dia we mbeyaka utema andi (ne dia we weme kalimbitela etema wʼantu tshe),

⁴⁰ku vo wayukukaka woma nshi tshe yudjashiwo lu kete yakayasha washesu.

⁴¹Naka ongendangenda waha usi Isariyele ayuya uma lu kete yʼetali dikambu dia lukumbu laye

⁴²(ne dia vo wayuka dia lukumbu laye la wuki, dia lunya laye la wulu, ndu dia lunya laye lusimbwi), lamʼayunduya dia ndjolomba lu luudu lone,

⁴³kuwukeli lʼulungu lu dihuli diudjashiye. Kutshaki akambu tshe wambukolomba ongendangenda, dia wedja tshe wa la kete mbeya lukumbu laye la nkukaka woma uku wudja aye Isariyele, la dia vo mbeya vati: Watetaka luudu lone lakamahiki lukumbu laye!

⁴⁴Lamʼayutsho wudja aye la ntolosha utunyi lu mbuka tshe kayuyatuma, ku vo wayukolomba we Latuyalaka, weledi utsha lʼusumba wakayasonola ndu utsha lu luudu lakamahikela lukumbu laye,

⁴⁵kuki dombelo diawo la osengosengo awo lʼulungu.

⁴⁶Naka vo wambukutshela kolo (ne dia nduku untu leko lahatshika kolo), ku we ambuwauka kele, ambakimo lu anya wa utunyi, dia vo mbatola lu fumbi lu kete yʼatunyi, kana etali kana suki,

⁴⁷ku vo wambutukana yimba lu kete yakawatolama lu fumbi, ndu wambukadimula etema, wambukosengasenga lu kete ya waku wakatole lu fumbi, vati: Shu takatshi kolo, takayala lʼuhedia, takanganela.

⁴⁸Naka vo wayukalula le ye lʼetema awo tshe ndu la nyumu yawo tshe lu kete yʼatunyi wakatole lu fumbi, ku vo wayukolomba weledi utsha lu kete yawo yakasha washewo, utsha lʼusumba wakayasonola, la utsha lu luudu lakamahikela lukumbu laye,

⁴⁹kuki dombelo diawo la osengosengo awo lʼulungu lu dihuli diudjashiye, kushikiki dikambu diawo.

⁵⁰Kudimanyia wudja aye wakakutshela kolo ndu ehedia awo wakawakuhedia. Kuwautshamia ketshi le waku wakatole lu fumbi dia vo mbauka ketshi

⁵¹(ne dia wudja aye ndu ukito aye wakayatundja uma lʼEdjibitu, uma lʼatei a kuka ka dja ka mbulu mbewo).

⁵²Ashu aye kawendaki uku akosengasenga ukambi aye la wudja aye Isariyele, kuwaukelaki tena tshe lamʼayuwulelaka la ntundu kaye.

⁵³Khumemi, Latuyalaka li! we akatundja uma lʼatei a wedja tshe wa la kete dia ndjala ukito aye, uku akayateketa lʼunyo wʼukambi aye Mose lamʼakayatundja washesu uma lʼEdjibitu.

⁵⁴Lamʼakashidiya Solomona elombelo kandi la osengosengo andi le Latuyalaka, ndi akunela uma la ntundu kʼediakelu ka Latuyalaka, lene akandakusi adui lʼanya wemadi utsha lʼulungu.

⁵⁵Ndi akemala, akatshokola ului tshe wa Isariyele la diui dia wulu ati:

⁵⁶Latuyalaka, lakasha wudja andi Isariyele mumuya uku alaka tshe wakandalaki, atumbwami! Nduku diui diʼuma lu daka diandi tshe diakandalaki lʼunyo wʼukambi andi Mose, diahatatshama.[37]

⁵⁷Latuyalaka, Unyashungu asu, ayalaki lasu uku akindi la washesu, ndi tatutshikaki, tatosekaki.

⁵⁸Keli ndi kekamia etema asu le ndi dia shu nkendakenda lu mbuka yandi la nama aui andi, elembe andi, adjangu andi wakandatela washesu.

⁵⁹Aui ami ane wamumuta lʼosengosengo la ntundu ka Latuyalaka, kawuyalaki la ntundu ka Latuyalaka, Unyashungu asu, ndu la yanyi ndu lʼutshu dia ndi nshikike dikambu diami, dimi ukambi andi, la dia wudja andi Isariyele, uku ayuyalaka uhumba la lushi la lushi.

⁶⁰Dia wedja tshe wa la kete nimbitela vati: Latuyalaka keli Unyashungu, nduku ukina leko.

⁶¹Etema anyu kawuyalaki le Latuyalaka, Unyashungu asu, dia nyu ndjelaka elembe la nkitanyiaka adjangu andi uku elo.

⁶²Ku khumʼekanga la asi Isariyele tshe waki la ndi wakalambula elambu la ntundu ka Latuyalaka.

⁶³Solomona akalambula ngombe nunu akumi ahendi la pendi la ekoko nunu lukama la akumi ahendi elambu wa ki. Ndi akayilambula la ntundu ka Latuyalaka. Osoku mbakakidia khumʼekanga la asi Isariyele tshe luudu la Latuyalaka.

⁶⁴Lushi lako, khumʼekanga akakidia ndu seke dia lʼetei, diaki la ntundu ka luudu la Latuyalaka. Ndi akalambula elambu wa lʼutshumba, wa shima la wata wʼelambu wa ki laawo, ne dia ediakelu kʼohotela kaki la ntundu ka Latuyalaka akaleki tshitshe dia nkuka ulambu wa lutshumba, wa shima la wata wʼelambu wa ki.

⁶⁵Solomona akayala la dambu etena kako, kame la Isariyele tshe, ului a wuki wʼantu umaka eotwelo ka Hamata pulu ndu lʼokedi wa Edjibitu, la ntundu ka Latuyalaka, Unyashungu asu, nshi esambeli.

⁶⁶Lu lushi lʼenanei, ndi akadianganya antu. Vo wakatatshokodi khumʼekanga, ku vo tshe wakatshu utsha la wakawo lʼongenongeno a wuki lʼetema, ne dia akambu wʼololo tshe wakatshela Latuyalaka ukambi andi Davidi la wudja andi Isariyele.