Read tetala 1 Khumi ya Dikanga 9 Bible Online

1 Khumi ya Dikanga 9 - tetala bible

1 Khumi ya Dikanga 9

¹Lamʼakashidiya Solomona mpika luudu la Latuyalaka, luudu la khumʼekanga la kene tshe kakandalangi ntsha,

²Latuyalaka akene le Solomona etena ka hendi, uku akandene le ndi la Ngibeyona.[38]

³Latuyalaka akawutela ati: Dimi lakuki dombelo la osengosengo wakayalombe la ntundu kami. Dimi lambukidia luudu lone dia nkitsha lukumbu lami loko pundju. Ashu ami la utema ami wayuyalaka loko pundju.

⁴Naka we ayokendakendaka la ntundu kami, uku akakendakendaka sho Davidi lʼutema wa mete ndu wusimbwi dia ntsha kene tshe kakamakutela dia nama elembe ami la adjangu ami,

⁵ku layushikike kiti ka diulelu diaye lu Isariyele.[39]

⁶Keli naka nyu nyayukadimo uma le mi, nyu kana anʼanyu, naka hanyulami elembe ami la adjangu wakamanyudjela, naka nyu nyayuyela ditemolatemola, nyayuditemola,

⁷ku dimi layunya Isariyele uma lu kete yakamawasha, ndu layunya luudu lone lamumukidia dikambu dia lukumbu lami uma lu ashu ami. Ku Isariyele ayuyala engo ka dionyo ndu ka tola lʼatei a wedja tshe.

⁸Luudu lone layuyala elanyelu ka wuki.[40] Untu tshe layeta laawo ayukashimo, ayusemala ati: Dikambu kuna diakatshela Latuyalaka kete nye la luudu lone okone?

⁹Wayakaluya diui vati: Ne dia vo wakaseke Latuyalaka, Unyashungu awo, lakatundja washesu uma lu kete ya Edjibitu, ndu wakekama ditemolatemola, wakadikusela adui, la wakaditemola. Diako mbakatumela Latuyalaka asui ane tshe.

¹⁰Lamʼaketi deku akumi ahendi diakahikaka Solomona mvudu hyendi, luudu la Latuyalaka ndu luudu la khumʼekanga,

¹¹Hirame, khumʼekanga ka Tura, akatumelaka Solomona etamba wʼesasi la wa weoto ndu paunyi uku akandalangi. Ku khumʼekanga Solomona akasha Hirame esumba akumi ahendi wa lu leke la Ngalili.

¹²Hirame akunela uma la Tura dia ntenda esumba wakawusha Solomona, keli ndi kumbengenangena.

¹³Okone ndi akawumbula ati: Onalingu, na wuhu wʼesumba eku wakayambisha? Ndi aketi esumba ako ati: Kete ya Kabula (kitshimudi ati: Anyanya). Osoku mbatuwuyetaka edja ndu elo.

¹⁴Hirame akatumela khumʼekanga paunyi yediko ya talata luitama la akumi ahendi.

¹⁵Onʼeli okondo wʼulimu wakakambisha khumʼekanga antu la khudu dia mpika luudu la Latuyalaka, luudu landi, Milo, lʼeheli ka lukumbu la Jerusalema, Hazora, Mengido, la Ngezere.

¹⁶Farayo, khumʼekanga ka Edjibitu, akatshu, akamlembia Ngezere, akakitshumbi, akadiaki asi Kanana waki lʼusumba ako. Ndi akasha onʼandi la umuntu, wadi a Solomona, usumba ako uku dongi.

¹⁷Solomona akahiki Ngezere la Bete-Horona ka lʼesi,

¹⁸Balata, la Tamara lʼusui wa shenga, lu kete ya Juda.

¹⁹Ndi akahiki esumba andi wʼeumbelu tshe, esumba ne dia pusupusu yandi ya ta, esumba wʼambahemi andi wa falasa, la kene tshe kakangenangena Solomona mpika la Jerusalema, la Lebanona ndu lu kete tshe yakanduledi.

²⁰Antu tshe wakatshikala lʼatei wʼasi Amora, asi Hiti, asi Perizi, asi Hiwi, asi Jebuse waki kundjala asi Isariyele;

²¹la anʼawo wakatshikala lʼokongo awo lu kete, ndu waki asi Isariyele kumbeya nshila ushiki, vo mbakosaka Solomona uku fumbi dia nkamba elimu a wulu. Osoku mbatuwukambaka edja ndu elo.

²²Keli Solomona kumbete asi Isariyele uku fumbi, ne dia vo waki alimbi, ekambi andi, elohe andi, elombodi andi wa ta, elombodi wa pusupusu yandi ndu wʼambahemi andi wa falasa.

²³Solomona akadji tupita kama tshanu la akumi atanu, dia mendaka ulimu wakatshaka antu wakawakambiaka la wulu.

²⁴Ona umuntu a Farayo akatumbi uma lʼusumba a Davidi, akatoto lu luudu landi lakuhikela Solomona. Lʼokongo diku, Solomona akahiki Milo.

²⁵Solomona akalambula elambu wa lutshumba ndu wa ki tena satu lʼeleku lʼeleku[41] lʼediakelu kakandatshela Latuyalaka. Ndi akatshumbaka ndu malashi lʼediakelu kako kaki la ntundu ka Latuyalaka. Osoku mbakandashidiya luudu.

²⁶Khumʼekanga Solomona akatshi mashua la Eziyona-Ngebere keli la Elote, lʼemamu wʼUduwa a Tilili lu kete ya Edome.

²⁷Ku Hirame akatumi ekambi andi hita wa mashua wakeyaka ulimu a waki kame lʼekambi wa Solomona.

²⁸Vo wakakumi la Ofira, wakatosa paunyi yediko ya talata kama nyei la akumi ahendi, wakayela le khumʼekanga Solomona.