Read tetala 2 Khumi ya Dikanga 1 Bible Online

2 Khumi ya Dikanga 1 - tetala bible

2 Khumi ya Dikanga 1

¹Lʼokongo a nyoi ka Ahaba, asi Moaba wakahindwela Isariyele.

²Ahaziya akako uma ladiku diʼukalamandji wa lu luudu landi la ladiku laki la Samariya, ku ndi akayala la kandji. Ndi akatumi akendji ati: Nyutshu, nyutumbuli Bala-Zebube, etemolatemola ka lʼEkerona, kana layokono kandji kene.

³Keli ondjelo wa Latuyalaka akatela Elidja, usi Tishibe, ati: Uneli, utuhumani la akendji wa khumʼekanga ka Samariya, utuwambuli wati: Undi, ne dia Unyashungu kema lu Isariyele mbatanyatshu dia ntumbula Bala-Zebube, etemolatemola ka lʼEkerona?

⁴Okone Latuyalaka kata ati: We hukita uma lu tangi ketamiye. Mete, we ayuvo. Ku Elidja akatshu.

⁵Akendji wakakalula le Ahaziya, ku ndi akawambula ati: Ukundi ambunyutukalula?

⁶Vo wakûkaluya diui vati: Untu omotshi akahumanyi la su, akatutedi ati: Nyukaluli, nyutshu le khumʼekanga lakanyutumi, nyutuwuteli nyati: Latuyalaka kambula ati: Undi, ne dia Unyashungu kema lu Isariyele, mbutumiye akendji la ntumbula Bala-Zebube, etemolatemola ka lʼEkerona? Uma lu dikambu ne, mbahayukita uma lu tangi ketamiye. Mete, we ayuvo.

⁷Ku khumʼekanga akawambula ati: Wuhu akona wʼuntu wakahumanyi la nyu, ndu wakanyutedi aui aso?

⁸Vo wakûkaluya diui vati: Ndi akalote dikuhu, la uya wʼekuhu lu lukindi.[1] Ku khumʼekanga akati ati: Elidja, usi Tishibe, oso.

⁹Khumʼekanga akatumi olombodi wʼalimbi la antu andi akumi atanu utsha le ndi. Ku olombodi akatshu utsha le Elidja, akutani udjashi lʼote wʼukungu, ku ndi akawutela ati: We, umvutshi a Unyashungu, khumʼekanga kata ati: Uhulo!

¹⁰Elidja akûkaluya diui ati: Naka umvutshi a Unyashungu mbemi, dja yahulo uma lʼulungu, yakutshumbi we la antu aye akumi atanu.[2] Ku dja yakahulo uma lʼulungu, yakatshumbi ndi la antu andi akumi atanu.

¹¹Ku khumʼekanga akatumi olombodi ukina wʼalimbi la antu andi akumi atanu le Elidja. Olombodi ako akatuwutela ati: We, umvutshi a Unyashungu, khumʼekanga kata ati: Uhulo esadi!

¹²Elidja akukaluya diui ati: Naka umvutshi a Unyashungu mbemi, dja yahulo uma lʼulungu, yakutshumbi we la antu aye akumi atanu. Ku dja ya Unyashungu yakahulo uma lʼulungu yakatshumbi ndi la antu andi akumi atanu.

¹³Ku khumʼekanga akayutuma olombodi wa satu wʼalimbi la antu andi akumi atanu. Ku olombodi ako akatshu, akatuhika adui la ntundu ka Elidja, akosengasenga ati: We umvutshi a Unyashungu, dimi lambukosengasenga nti: Lumu lami la nyumu ya ekambi aye ene akumi atanu yayali ushinga a wulu lu ashu aye.

¹⁴Mete, dja yakahulo uma lʼulungu, yakatshumbi elombodi ehendi wa ntundu vo la antu awo akumi atanu, atanu. Keli kakiane etawo dia lumu lami ndjala ushinga a wulu lu ashu aye.

¹⁵Ondjelo wa Latuyalaka akatela Elidja ati: Uhulo la ndi, tuwukaki woma. Okone ndi akunela, akahulo la ndi utsha le khumʼekanga.

¹⁶Ndi akatutela khumʼekanga ati: Latuyalaka kata ati: We akatumi akendji dia ntumbula Bala-Zebube, etemolatemola ka lʼEke rona, ne dia we akakani wati: Unyashungu kema lu Isariyele dia mbumbula diui diandi? Diako mbahayukita uma lu tangi ketamiye. Mete, we ayuvo.

¹⁷Okone ndi akavu uku diui dia Latuyalaka lu unyo wa Elidja. Jehorama akayala khumʼekanga lu dihuli diandi lʼeleku ka hendi ka diulelu dia Jorama, onʼa Jehoshafata, khumʼekanga ka Juda, ne dia Ahaziya taki la ona pami.

¹⁸Undi etsha ekina wa Ahaziya, wakandatshaka, hawufundami lu Buku diʼEkondo wa Khumi ya dikanga ya Isariyele?