Read tetala 2 Khumi ya Dikanga 10 Bible Online

2 Khumi ya Dikanga 10 - tetala bible

2 Khumi ya Dikanga 10

¹Ana apami wʼAhaba waki akumi esambeli la Samariya. Jehu akafundi mikanda, akatumi la Samariya le ewandji wʼusumba, le dihangamendi, ndu le waku wakudiaka ana apami wʼAhaba, ati:

²Lamʼayunyulungula mukanda one nyendi ana apami wa khumenyu weko la nyu, ndu pusupusu la falasa, usumba weli la lukumu la wulu, la dihumo dia ta.

³Okone nyosonole ona pami omotshi a khumenyu luleki ololo ndu lukuki, nyukitsha lu kiti ka diulelu ka shi. Nyolwele khumbu ka khumenyu ta.

⁴Keli vo wakuki woma efula, wakambwana vati: Nyulungi, khumi ya dikanga hyendi kumbeya nsemanela la ndi, ukundi ayuteya nsemanela la ndi?

⁵Ote wa khumbu kawo, uwandji wʼusumba, dihangamendi ndu waku wakudiaka anʼako, wakatumela Jehu diui vati: Shu teko ekambi aye, shu tayutsha kene tshe kayuyututela. Shu hatudji nduku untu khumʼekanga, utshi uku alangaye.

⁶Ku ndi akafu-ndela mukanda a hendi ati: Naka wami mbenyu, ndu naka nyu nkitanyiaka diui diami, nyuhimbuli ana apami wa khumenyu ete. Kanyuyi le mi la Jezerele lʼetena kene lui. Laso ana apami akumi esambeli wa khumʼekanga waki laka elombodi wʼusumba, wane wakawaudiaka.

⁷Lamʼakawalungula mukanda, vo wakandi anʼako akumi esambeli wakhumʼekanga, wakahimbula ete, wakadji ete awo lu asaka, wakumelawo la Jezerele.

⁸Dikendji diakatuwutela ati: Vo wambela ete wʼana apami wa khumʼekanga. Ndi akawutela ati: Nyekitsha lu elui ehendi lʼeotwelo kʼusumba edja ndu la pindju.

⁹La pindju, ndi akatumbi, akatemala la ntundu ka wudja tshe; akawatela ati: Nyu nyeli ololo, nyendi, dimi lakadjela khumemi sheki, lakudiaki; keli akona akadiaki wane tshe?

¹⁰Nyeyi nyati: Nduku diui dia Latuyalaka diakandati lu dikambu dia khumbu ka Ahaba diayoko la kete, ne dia Latuyalaka ambutsha kene kakandati lʼunyo wa ukambi andi Elidja.

¹¹Okone Jehu akadiaki waku wakatshikala lu khumbu ka Ahaba la Jezerele.[15] Antu andi a waki tshe, engenyi andi, la elombodi andi, ndi kumpandja nduku otoi.

¹²Jehu akunela, akatshu utsha la Samariya. Lamʼakandakumi lu luudu lʼalami wʼekoko, lene akawahimbulaka ekoko diosa,

¹³ndi akahumana la anangu Ahaziya, khumʼekanga ka Jude, akawambula ati: Nyu wa na? Vo wakûkaluya diui vati: Anangu Ahaziya mbesu. Shu tambutsho la ntemula ana apami wa khumʼekanga, la ana apami a wadi aki khumʼekanga.

¹⁴Jehu akati ati: Nyuwandi, ku vo wakawandi, wakadiaki lasuki la difuku dia luudu lʼehimbwelo ka diosa. Apami akumi anei la ahendi, ndi kumpandja nduku otoi.

¹⁵Jehu akunela uma leko, akahumana la Jonadaba, onʼa Rekabe, lakayayakaka dia ndjuhumana la ndi. Ndi akawemula, akawumbula ati: Undi, utema aye weko ololo le mi uku eli utema ami le ye? Jonadaba akakaluya diui ati: Elu, osoku mbewo. Ku Jehu akati ati: Naka osoku, umbisha lunya. Ndi akawusha lunya, ku Jehu akawotshiya lasuki la ndi lu pusupusu kandi.

¹⁶Ndi akawutela ati: Yeti tutshu, utendi saki kami le Latuyalaka. Okone ndi akatshu la ndi lu pusupusu kandi.

¹⁷Lamʼakandakumi la Samariya, ndi akadiaki asika Ahaba tshe wakatshikala la Samariya, edja ndu ndi akashili tshe uku diui diakatela Latuyalaka Elidja.

¹⁸Jehu akasanganya antu tshe kame, akawatela ati: Ahaba akatemolaka Bala etenyi, keli dimi layukitemola uleki efula.

¹⁹Okone nyumbeteli amvutshi tshe wa Bala, atemodi ato, elombodi ato, aha untu ntshikala, ne dia dimi nangaka nambula Bala ulambu a wuki: untu tshe lahayi, hutshikala la lumu. Keli Jehu akatshi dikambu ne la lukesu, dia nshila atemodi wa Bala ushiki.

²⁰Jehu akati ati: Nyudianganya lukumu la lusanganya lʼekila la Bala. Ku vo wakaludianganya.

²¹Jehu akatumi akendji lu Isariyele tshe; ku atemodi tshe wa Bala wakayi, nduku otoi wakatshikala, waki kundja. Vo wakoto lu luudu la Bala, ku lo lakaluli to ndu lu kuma la kuma.

²²Ndi akatela ulami wʼahondo ati: Utundja ahondo wa mbisha atemodi tshe wa Bala. Ku ndi akatundjiya ahondo.

²³Jehu akoto, ndi la Jonadaba, onʼa Rekabe, lu luudu la Bala. Ndi akatela atemodi wa Bala ati: Nyayangi, nyendi ololo, diaha ukambi omotshi wa Latuyalaka ndjala lʼatei anyu lane, paka atemodi wa Bala atu.

²⁴Vo wakoto dia nambula elambu wa lutshumba. Laso ku Jehu akakitshisha apami akumi enanei lʼandja, akawatedi ati: One layuhandja untu omotshi lʼatei wʼantu wayumukimo lʼanya anyu, ayuvo lu dihuli diandi.

²⁵Lamʼakawashili nambula elambu wa lutshumba, Jehu akatela ulami la elombodi wʼalimbi ati: Nyoto, nyuyadiaki, aha untu ntumba. Ku vo wakadiaki la tombo. Ulami la elombodi wʼalimbi wakawakadja leko, wakatshu utsha lʼusumba waki luudu la Bala.

²⁶Vo wakatutundja luhingu laki lu luudu la Bala lʼandja, wakalutshumbi.

²⁷Vo wakanyukula luhingu la Bala, wakanyukula ndu luudu la Bala, wakete dihuli diako dihuli dia weto edja ndu elo.

²⁸Jehu akashisha Bala uma lʼatei wa Isariyele.

²⁹Ndi kunkadimo uma lu kolo ya Jeroboama, onʼa Nebate, yakandanganyiaka Isariyele. Ndu kuntuna tana ta ngombe ta paunyi la Betele ndu la Dane.[16]

³⁰Latuyalaka akatela Jehu ati: Ne dia we akatshi akambu wʼusimbwi lu ashu ami, ndu akatshela khumbu ka Ahaba uku lulangu lami, anʼaye wayudjase lu kiti ka diulelu ka Isariyele edja ndu lolonga la nei.

³¹Tena tshe, Jehu kumambalaka dia nkendakendaka lʼutema andi tshe lu elembe wa Latuyalaka, Unyashungu wa Isariyele. Ndi kunkadimo uma kolo yakanganyiaka Jeroboama Isariyele.

³²Lu nshi sho, Latuyalaka akatatela nanya beke dimotshi dia Isariyele; Hazaele akadiaki lu elelu tshe wa Isariyele.

³³Uma la Jorodana, utsha lʼehutwelu ka unya, ndi akalembia kete tshe ya Ngiliyade, asi Ngada, asi Rubena la asi Manase, uma la Aroera lu kyoko ya Aranona edja ndu la Ngiliyade, ndu la Bashana.

³⁴Undi, etsha ekina wa Jehu, kene tshe kakandatshaka la ata andi tshe, hawufundami lu Buku diʼEkondo wa Khumi ya dikanga ya Isariyele?

³⁵Jehu akayeli washi, wakukhunde la Samariya. Ku onʼandi Joahaza akulela lu dihuli diandi.

³⁶Jehu akulela Isariyele deku akumi ahendi la enanei la Samariya.