Read tetala 2 Khumi ya Dikanga 11 Bible Online

2 Khumi ya Dikanga 11 - tetala bible

2 Khumi ya Dikanga 11

¹Lamʼakenyi Ataliya, nyangu Ahaziya ati: Onʼandi a pami ambuvo, ndi akunela, akadiaki khumbu tshe ka khumʼekanga.

²Keli Jehosheba, onʼa umuntu a khumʼekanga Jorama, kadiya Ahaziya, akose Joashi, onʼa pami a Ahaziya, akawunya uma lʼatei wʼana apami wa khumʼekanga lamʼakawadiakaka: ndi akawushe lu luudu landi la mbetama, ndi la ulami andi. Okone ndi komenama lu ashu wa Ataliya, mbakindi kundjakema.

³Ndi akashama, ndi la Jehosheba deku samalu lu luudu la Latuyalaka. Ku Ataliya akulela wudja.

⁴Lu eleku kʼesambeli, Jehoyada akatumi antu dia ntuyanga elombodi wʼalimbi wʼasi Kerete ndu alami. Ku vo wakayi le ndi lu luudu la Latuyalaka. Ndi akadji la wo sheki, akatshibia lu luudu la Latuyalaka, ku ndi akawaenya onʼa khumʼekanga.

⁵Jehoyada akawadjela olembe ati: Kanyututshi okone. Wane wayutshaka ulimu lʼatei a nyu lushi la mumuya, kawutshaki okone: etenyi otoi ka satu kawumbelaki dia nama luudu la khumʼekanga,

⁶etenyi otoi ka satu kawulamaki eotwelo ka Sura, la etenyi otoi ka satu lʼeotwelo lʼokongo wʼalami. Osoku mbayunyulamaka luudu, wuhu waheya untu mboto.

⁷Elui anyu ehendi ekina, wane wayutumbaka uma lʼulimu lushi la mumuya, kawulamaki luudu la Latuyalaka lasuki la khumʼekanga.

⁸Kanyudingaki khumʼekanga kwi, untu lʼuntu la dihumo dia ta lu anya, ku untu tshe layoto lʼatei wʼenongo, kanyudiaki. Kanyuyalaki lasuki la khumʼekanga lamʼayundutumbaka ndu lamʼayundotaka.

⁹Elombodi wʼalimbi kama kama wakatshi aui tshe wakawatela olombedi Jehoyada. Vo tshe wakosaka untu lʼuntu antu andi, wane wakotoka lʼulimu, ndu wane wakatumbaka lʼulimu lushi la mumuya, wakatshokaka utsha le olombedi Jehoyada.

¹⁰Olombodi akasha elombodi wʼalimbi kama kama akonga la dingawu diaki khumʼekanga Davidi, diaki lu luudu la Latuyalaka.

¹¹Alami tshe, untu lʼuntu aki la dihumo dia ta lu anya, wakadingaka khumʼekanga uma lu leke la lunya la pami la luudu edja ndu lunya la lomoso lasuki lʼediakelu ndu lasuki la luudu.

¹²Olombedi akasukanya onʼa khumʼekanga, wakukiti iso, wakahumi saka wata vati: Khumʼekanga alumbi!

¹³Ataliya akuki lundju lʼalami ndu la wudja, ku ndi akatshu utsha le wudja la luudu la Latuyalaka.

¹⁴Lamʼakandendi, enyi ku khumʼekanga one eli ladiku dia loyenga, uku aki etshelu. Elombodi wʼalimbi la amvudi wʼamama waki lasuki la khumʼekanga. Antu tshe wa lu wudja waki la ongenongeno, ku wakadaka amama. Ataliya akatshatsha ahondo andi, akaleli ati: Fyungi! fyungi!

¹⁵Ku olombedi Jehoyada akatela elombodi wʼalimbi wakalombolaka ului wʼalimbi ati: Nyutundja lʼandja wʼenongo, nyudiaki untu tshe layuyela la yombo, ne dia olombedi akati ati: Tanyudiakaki lu luudu la Latuyalaka.

¹⁶Vo wakukimo, ku ndi akatshu utsha lu luudu la khumʼekanga, lu mbuka kʼeotwelo ka falasa. Leko kakawatudiaka.

¹⁷Jehoyada akadji sheki lʼasa Latuyalaka la khumʼekanga ndu la wudja ya vo ndjala antu wa Latuyalaka; akadji sheki ndu lʼasa khumʼekanga la wudja.

¹⁸Wudja tshe wa lu kete yako wakoto lu luudu la Bala, wakalulanya; wakahandjula diakelu diato tshe ndu difanelu diato. Vo wakadiaki Matana, olombedi wa Bala, la ntundu ka diakelu. Olombedi Jehoyada akakitsha alami lu luudu la Latuyalaka.

¹⁹Ndi akose elombodi wʼalimbi kama kama, asi Kerete, alami, ndu antu tshe wa lu wudja, ku vo wakayi la khumʼekanga uma lu luudu la Latuyalaka, wakatshu la ndi utsha lu luudu la khumʼekanga lu mbuka kʼeotwelo kʼalami. Ku Jehoashi akadjase lu kiti ka diulelu ka khumi ya dikanga.

²⁰Okone antu tshe wa lu wudja, wakangenagena; usumba wakayala ki lʼokongo a lamʼakawadiaki Ataliya la yombo lu luudu la khumʼekanga.

²¹Jehoashi aki la deku esambeli lamʼakandayala khumʼekanga.