Read tetala 2 Khumi ya Dikanga 12 Bible Online

2 Khumi ya Dikanga 12 - tetala bible

2 Khumi ya Dikanga 12

¹Lʼeleku kʼesambeli ka Jehu, Jehoashi akayala khumʼekanga. Ndi akulela deku akumi anei la Jerusalema. Lukumbu la nyangu laki Zibiya, usi Bere-Sheba.

²Jehoashi akatshaka akambu wʼusimbwi lu ashu wa Latuyalaka lu nshi yandi tshe, ne dia olombedi Jehoyada akawetshaka.

³Tshikima alunga atu mbaki kunshisho. Lu nshi yako wudja wakalambulaka elambu, ndu wakatshumbaka malashi lu alunga.

⁴Jehoashi akatela olombedi ati: Falanga tshe yʼuma lu diango diambukidiama yatuwelaka lu luudu la Latuyalaka, falanga yatuwutshaka la yo ulimu, falanga ya etshungwelu kʼantu uma lʼushinga wakadjama, ndu falanga tshe yatuyakaka uma le untu[17] lambuyela lʼutema andi tshe lu luudu la Latuyalaka,

⁵elombedi kawosaki untu lʼuntu uma le antu weyana la ndi, kawutshaki la yo ulimu wa nongosola luudu lu ahuli tshe wayuyala uhumba wa vo nongosola.

⁶Keli edja ndu eleku kʼakumi ahendi la asatu ka diulelu dia khumʼekanga Jehoashi, elombedi konongosola luudu lu ahuli wakalahumbi nongoswama.

⁷Khumʼekanga Jehoashi aketi olombedi Jehoyada la elombedi ekina, akayuwambula ati: Dikambu kuna diakinyu konongosola ahuli wakalana lu luudu? Kakiane, tanyosaki falanga ntu uma le wane weyana la nyu, keli kanyuyikimoki lʼulimu wa nongosola luudu.

⁸Ku elombedi waketawo diaha vo mbosa falanga ntu uma le antu, ndu aha ndjala la okende wa nongosola ahuli wakalana lu luudu.

⁹Keli olombedi Jehoyada akose oshete a wuki, akatundula wushu lʼufudi awo, akukitsha lʼumamu wʼediakelu lu lunya la pami, lu dihuli diakawotoka utsha lu luudu la Latuyalaka. Elombedi wakalamaka suku, wakadjaka falanga tshe yakawelaka lu luudu la Latuyalaka loko.

¹⁰Lamʼakawenyi vati: Falanga yaya efula lʼoshete, ufundji wa khumʼekanga la olombedi a ladiku wakayi, wakali falanga tshe yakawatani lu luudu la Latuyalaka. Vo wakayidji lu atapa, wakakeleka.

¹¹Vo wakakimo falanga yakawedika lʼanya a wane wakakambaka ulimu waki la okende wa nongosola luudu la Latuyalaka. Wakayifuti etshudi wʼabaya la ambiki wakakambaka ulimu lu luudu la Latuyalaka,

¹²ambiki wa mvudu yʼave la ambatshi wʼave, ndu wakasumbi la yo etamba lʼave wa lokolonga dia nongosola ahuli wakalana lu luudu la Latuyalaka, ndu dia nfuta lu akambu tshe wakawahumbi nongosola luudu.

¹³Vo kuntsha akoho wa fesa, tosholo ta nyimaka atala, alonga, amama, nduku donga dia paunyi kuyanga dia fesa la falanga yakawelaka uya lu luudu la Latuyalaka,

¹⁴ne dia vo wakayishaka waku waka-tshaka ulimu wa nongosola luudu la Latuyalaka.

¹⁵Vo kumbalaka la waku wakafutaka wane wakakambaka ulimu falanga, ne dia vo wakatshaka la mete.

¹⁶Vo kumbela falanga yʼelambu wʼefutelu kʼenungu la falanga yʼekesanelu uya lu luudu la Latuyalaka. Yo yaki yʼelombedi.[18]

¹⁷Hazaele, khumʼekanga ka Suriya, akatshu akatolosha Ngata, akakilembia. Ku ndi akasanguya dia ntolosha Jerusalema.

¹⁸Jehoashi, khumʼekanga ka Juda, akose diango tshe diʼekila diakatakidisha washi: Jehoshafata, Jorama, la Ahaziya, khumi ya dikanga ya Juda, la ne diakandakidia ndame, ndu paunyi tshe yaki lu waumbelu wa lu luudu la Latuyalaka, ndu wa lu luudu la khumʼekanga, akayitumela Hazaele khumʼekanga ka Suriya, ku Hazaele akamo uma la Jerusalema.

¹⁹Undi etsha ekina wa Jehoashi, la akambu tshe wakandatshaka, hawufundami lu Buku diʼEkondo wa Khumi ya dikanga ya Juda?

²⁰Ekambi wa Jehoashi wakunela, wakawudjela sheki; wakudiaki lu luudu la Milo, leli lu mbuka kʼutsha la Sila.

²¹Ekambi andi Jozakara, onʼa Shimeate, la Jehozabada, onʼa Shomera, wakokomola, ku ndi akavu. Vo wakukhunde la le washi lʼusumba wa Davidi. Ku anʼandi Amaziya akulela lu dihuli diandi.