Read tetala 2 Khumi ya Dikanga 13 Bible Online

2 Khumi ya Dikanga 13 - tetala bible

2 Khumi ya Dikanga 13

¹Lʼeleku kʼakumi ahendi lʼasatu ka diulelu dia Jehoashi, onʼa Ahaziya, khumʼekanga ka Juda, Jehoahaza, onʼa Jehu akayala khumʼekanga ka Isariyele lu Samariya. Ndi akulela deku dikumi lʼesambeli.

²Ndi akatshaka kene kaki kolo lu ashu wa Latuyalaka; akatshi kolo yakatshaka Jeroboama, onʼa Nebate, yakandanganyia Isariyele; ndi kunkadimo uma loko.

³Ku Latuyalaka akuki Isariyele kele ka wulu, akakimoka tena tshe lʼanya wa Hazaele, khumʼekanga ka Suriya, ndu lʼanya wa onʼandi Bene-Hadada.

⁴Keli Jehoahaza akasengasenga Latuyalaka; ku Latuyalaka akawukela, ne dia ndi akenyi wengiya wakengiyaka khumʼekanga ka Suriya asi Isariyele.

⁵(Latuyalaka akasha Isariyele utshungudi. Ku asi Isariyele wakatshungo uma lʼanya wʼasi Suriya, wakadjase lu mvudu yawo yʼapema uku nshi ya ntundu.

⁶Keli vo kunkadimo uma lu kolo ya khumbu ka Jeroboama yakandanganyia Isariyele; vo wakakendakenda loko, ndu ekishi ka Ashera kakatshikala la Samariya.)

⁷Latuyalaka akatshikela Jehoahaza paka ambahemi wa falasa akumi atanu, pusupusu dikumi, la alimbi watokendakendaka lʼekulu nunu dikumi uma lu wudja tshe, ne dia khumʼekanga ka Suriya akadiaki, akawaete uku ditshu diatuwukamelaka lʼekulu.

⁸Undi, etsha ekina wa Jehoahaza la akambu tshe wakandatshaka ndu wulu andi hawufundami lu Buku diʼEkondo wa Khumi ya dikanga ya Isariyele?

⁹Jehoahaza akayeli washi, wakukhunde la Samariya. Ku onʼandi Joashi akulela lu dihuli diandi.

¹⁰Lʼeleku kʼakumi asatu lʼesambeli ka diulelu dia Joashi, khumʼekanga ka Juda, kakatatela Jehoashi, onʼa Jehoahaza, mbulela Isariyele lu Samariya. Ndi akulela deku dikumi la samalu.

¹¹Ndu ndi akatshaka kene kaki kolo lu ashu wa Latuyalaka; ndi kunkadimo uma lu kolo tshe ya Jeroboama, onʼa Nebate, yakandanganyia Isariyele; ndi akakendakendaka loko.

¹²Undi, etsha ekina wa Joashi la akambu tshe wakandatshaka, wulu andi, la ata andi wakandalosha Amaziya, khumʼekanga ka Juda, hawufundami lu Buku diʼEkondo wa Khumi ya dikanga ya Isariyele?

¹³Joashi akayeli washi. Ku Jeroboama akadjase lu kiti kandi ka diulelu, wakakhunde Joashi la Samariya la le khumi ya dikanga ya Isariyele.

¹⁴Elisha akandama la kandji kako kakandavu. Joashi, khumʼekanga ka Isariyele, akayi le ndi, akayulelela lʼelundji ati: Papa li! papa li! Pusupusu ka Isariyele la ambahemi awo wa falasa![19]

¹⁵Elisha akatela khumʼekanga ka Isariyele ati: Ose uta la pitu, ku ndi akose uta la pitu.

¹⁶Ndi akawutela ati: Oleme uta, ku ndi akoleme. Ku Elisha akahe anya andi ladiku diʼanya wa khumʼekanga.

¹⁷Ndi akati ati: Udihuli didishi diʼutsha lʼehutwelu, ku ndi akadidihula. Ndi akawutela ati: Uki luhita, ku ndi akaluki. Elisha akati ati: Luhita lʼetshungwelu lone uma le Latuyalaka, luhita la tshungo uma le asi Suriya. We ayolembia asi Suriya la Afeka edja ndu lamʼayuyashila ushiki.

¹⁸Ndi akatela khumʼekanga ka Isariyele ntu ati: Ose pitu ku ndi akayose. Ndi akawutela ati: Uyikomole la kete, ndi akayikomola tena satu, ku akakimo.

¹⁹Umvutshi a Unyashungu akawuki kele; akawutela ati: Utuyuyikomola tena samalu kana tanu, tshiki we utolembia Suriya edja ndu lamʼutuyashila ushiki, keli kakiane, we ayalembia paka tena satu tu.

²⁰Elisha akavu, wakukhunde. Lʼetatelu kʼeleku, alimbi wʼasi Moaba wakayi dia ndjolosha wudja.

²¹Lamʼakatatshokaka antu la ntukhunde pami kemotshi, wenyi ku ului omotshi wʼalimbi one wayayi, ku vo wakakadja udu lu diumbu dia Elisha. Lamʼakatusakana udu la weka wa Elisha, pami kako akulo, akemala ndame.

²²Hazaele, khumʼekanga ka Suriya, akasuyaka Isariyele lu nshi tshe ya lumu la Jehoahaza.

²³Keli Latuyalaka akukaka Isariyele ngandji ka mamba, akawaukaka ketshi, ndu ndi akawaukaka ashu, dikambu dia daka diandi le Abarahama, Isaka la Jakoba. Ndi kunanga mbashila ushiki kuyanga mbakadja uma la ntundu kandi edja ndu elo.

²⁴Hazaele, khumʼekanga ka Suriya akavu, ku onʼandi Bene-Hadada akulela lu dihuli diandi.

²⁵Jehoashi, onʼa Jehoahaza, akahotola esumba uma lanya wa shi Jehoahaza lu ta. Joashi akolembia tena satu, ku ndi akakaluya esumba wa Isariyele.