Read tetala 2 Khumi ya Dikanga 14 Bible Online

2 Khumi ya Dikanga 14 - tetala bible

2 Khumi ya Dikanga 14

¹Lʼeleku ka hendi ka diulelu dia Joashi, onʼa Jehoahaza, khumʼekanga ka Isariyele, kakatatela Amaziya, onʼa Joashi, khumʼekanga ka Juda, mbulela.

²Ndi aki la deku akumi ahendi la tanu lamʼakandayala khumʼekanga. Ndi akulela deku akumi ahendi la divwa la Jerusalema. Lukumbu la nyangu laki Jehoadina, usi Jerusalema.

³Ndi akatshaka akambu wʼusimbwi lu ashu wa Latuyalaka, keli aha tena tshe uku Davidi tshendi. Ndi akatshaka akambu tshe uku akatshaka Joashi, shi.

⁴Keli vo kunanya alunga, ku antu wakatetemalaka nambula elambu, la ntshumba elambu wa malashi lu alunga.

⁵Lamʼakashikikala diulelu lu anyʼandi, ndi akadiaki ekambi andi wakadiaki khumʼekanga, shi.

⁶Keli ndi kundjaka ana wʼandjakanyi ako, uku akafundama lu buku diʼelembe wa Mose, wakadjanga Latuyalaka ati: Tawudiakaki washi lu dikambu diʼana awo, kuyanga ana lu dikambu dia washewo. Keli kawudiaki untu lʼuntu lu dikambu dia kolo kandi hita.[20]

⁷Ndi akadiaki asi Edome nunu dikumi lʼukidi a Leho. Lamʼakawalokaka ta, ndi akose Sela, akakiole Joketele, lukumbu latuwukietaka edja ndu elo.

⁸Ku Amaziya akatumi akendji le Jehoashi, onʼa Jehoahaza, onʼa Jehu khumʼekanga ka Isariyele ati: Yaka, tenani shu ahendi, elundji lʼelundji!

⁹Jehoashi, khumʼekanga ka Isariyele, akatumela Amaziya, khumʼekanga ka Juda, diui ati: Dihangulakoi dia Lebanona akatumela usasi wa la Lebanona diui ati Usha onʼami a pami onʼaye wadi! Ku nyama kemotshi ka lʼukunda wa la Lebanona aketi laawo, akahotshahotsha dihangulakoi.

¹⁰Mete, we akalembia asi Edome, ku we ambuyambiya lʼutema. Utshikali lakaye, ongenangenaki dia lutumbu laye. Okoko wana walangaye ndjakutwela elanyelu dia we nanyema, we la Juda kame?

¹¹Keli Amaziya kumbukela. Okone Jehoashi, khumʼekanga ka Isariyele, akatshu, ku ndi la Amaziya, khumʼekanga ka Juda, wakenana vo ahendi elundji lʼelundji la Bete-Shemeshe keli lu leke la Juda.

¹²Isariyele wakalembia Juda, ku vo tshe wakalawo untu lʼuntu utsha lakandi.

¹³Jehoashi, khumʼekanga ka Isariyele, akandi Amaziya, khumʼekanga ka Juda, onʼa Jehoashi, onʼa Ahaziya, la Bete-Shemeshe. Ndi akayi la Jerusalema, akalanya eheli ka lukumbu lʼusumba yediko ya kubita kama nyei uma lʼeotwelo ka Efarayima edja ndu lʼeotwelo ka la tshuku.

¹⁴Ku ndi akose paunyi la fesa tshe, diango tshe diʼulimu, diakawatani lu luudu la Latuyalaka ndu lu waumbelu wa lu luudu la khumʼekanga; akose ndu esungi, ku ndi akakalula la Samariya.

¹⁵Undi, etsha ekina wa Jehoashi wakandatshaka, wulu andi, ndu ta diakandalo la Amaziya, khumʼekanga ka Juda, hawufundami lu Buku diʼEkondo wa Khumi ya dikanga ya Isariyele?

¹⁶Jehoashi akayeli washi, wakukhunde la Samariya la le khumi ya dikanga ya Isariyele. Ku onʼandi Jeroboama akulela lu dihuli diandi.

¹⁷Amaziya, onʼa Joashi, khumʼekanga ka Juda, akalumbi deku dikumi la tanu lʼokongo wa nyoi ka Jehoashi, onʼa Jehoahaza, khumʼekanga ka Isariyele.

¹⁸Undi, etsha ekina wa Amaziya hawufundami lu Buku diʼEkondo wa Khumi ya dikanga ya Juda?

¹⁹Antu wakawudjela sheki la Jerusalema, ku ndi akalawo utsha la Lakishi. Keli vo wakatumi antu dia mbuyela la Lakishi, ku vo wakatudiaka leko.

²⁰Vo wakawahe lu falasa, wakayukhunde la Jerusalema la le washi, lʼusumba wa Davidi.

²¹Ku asi Juda tshe wakose Azariya laki la deku dikumi la samalu, wakawudji khumʼekanga lu dihuli dia Amaziya, shi.

²²Lʼokongo a lamʼakayeli khumʼekanga washi, Azariya akahiki Elate, akakikaluya la Juda.

²³Lʼeleku ka dikumi lʼatanu ka diulelu dia Amaziya, onʼa Joasha, khumʼekanga ka Juda, Jeroboama, onʼa Joashi, khumʼekanga ka Isariyele, akatatela mbulela la Samariya, ndi akulela deku akumi anei la otoi.

²⁴Ndi akatshaka kolo lu ashu wa Latuyalaka; kunkadimo uma lu kolo ya Jeroboama, onʼa Nebate, lakanganyia Isariyele.

²⁵Ndi akashikike elelu wa Isariyele ntu uma lʼeotwelo ka la Hamata edja ndu lʼuduwa wa Araba, uku diui diakati Latuyalaka, Unyashungu wa Isariyele, lʼunyo wʼukambi andi Jonasa,[21] onʼa Amitai, umvutshi wa Ngata-Hefere.

²⁶Latuyalaka akenyi toshoko ta Isariyele ati: To tambuleka wulu, ne dia nduku lakatshikala kana fumbi kana luyadjasedi, ndu lakiko dia nkimanyia Isariyele.

²⁷Latuyalaka kunsanguya dia nyimula lukumbu la Isariyele la tshina diʼulungu, keli ndi akashimbela uma lu lunya la Jeroboama, onʼa Joashi.

²⁸Undi, etsha ekina wa Jeroboama la akambu tshe wakandatshaka, wulu andi lu ta, ndu uku akandakaluya Damaseke la Hamata waki le asi Juda le Isariyele, hawufundami lu Buku diʼEkondo wa Khumi ya dikanga ya Isariyele?

²⁹Jeroboama akayeli washi, khumi ya dikanga ya Isariyele. Ku onʼandi Zakariya akulela lu dihuli diandi.