Read tetala 2 Khumi ya Dikanga 15 Bible Online

2 Khumi ya Dikanga 15 - tetala bible

2 Khumi ya Dikanga 15

¹Lʼeleku kʼakumi ahendi lʼesambeli ka diulelu dia Jeroboama, khumʼekanga ka Isariyele, kakatatela Azariya, onʼa Amaziya, khumʼekanga ka Juda, mbulela.

²Ndi aki la deku dikumi la samalu lamʼakandayala khumʼekanga. Ndi akulela deku akumi atanu la pendi la Jerusalema. Lukumbu la nyangu laki Jekoliya, usi Jerusalema.

³Ndi akatshaka akambu wʼusimbwi lu ashu wa Latuyalaka, uku tshe wakatshaka Amaziya, shi.

⁴Keli vo kunanya alunga: antu wakakolamelaka nambula elambu la ntshumba malashi lu alunga.

⁵Latuyalaka akasuya khumʼekanga, ku ndi akayala la sudi edja ndu lushi landi la nyoi. Ndi akadjase ndame lu luudu la dieta. Jotama, onʼandi, aki olombodi wa khumbu kandi, akasambulaka akambu wʼantu wa lu wudja.

⁶Undi, etsha ekina wa Azariya, la akambu tshe wakandatshaka, hawufundami lu Buku diʼEkondo wa Khumi ya dikanga ya Juda?

⁷Azariya akayeli washi;[22] wakukhunde la le washi lʼusumba wa Davidi. Ku onʼandi Jotama akulela lu dihuli diandi.

⁸Lʼeleku kʼakumi asatu lʼenanei ka Azariya khumʼekanga ka Juda, kakatatela Zekariya, onʼa Jeroboama, mbulela Isariyele lu Samariya; ndi akulela ngondo shamalu.

⁹Ndi akatshaka kene kaki kolo lu ashu wa Latuyalaka uku akatshaka washi, ndi kunkadimo uma lu kolo ya Jeroboama, onʼa Nebate, yakandanganyia Isariyele.

¹⁰Shaluma, onʼa Jabeshe, akawudjela sheki, akokomola la Ibiliyame, akudiaki, akulela lu dihuli diandi.

¹¹Etsha ekina wa Zekariya wambufundama lu Buku diʼEkondo wa Khumi ya dikanga ya Isariyele.

¹²Osoku mbakashidiyama diui diakatela Latuyalaka Jehu ati: Anʼaye wayudjase lu kiti ka diulelu ka Isariyele edja ndu lolonga la nei.[23]

¹³Shaluma, onʼa Jabeshe, akayala khumʼekanga lʼeleku kʼakumi asatu la divwa ka diulelu dia Uziya, khumʼekanga ka Juda. Ndi akulela la Samariya ngondo otoi.

¹⁴Menahema, onʼa Ngadi, akunela uma la Tiriza, akatshu la Samariya, akatokomola Shaluma, onʼa Jabeshe, akudiaki, ku ndi akulela lu dihuli diandi.

¹⁵Etsha ekina wa Shaluma kame la sheki yakandadji wambufundama lu Buku diʼEkondo wa Khumi ya dikanga ya Isariyele.

¹⁶Menahema akalo la Tapua lʼantu tshe waki loko, kame la kete yawo uma la Tiriza. Ndi akalo la wo ne dia vo kumbudihwela usumba awo. Ndi akati akundju wʼamantu tshe waki la waemi.

¹⁷Lʼeleku kʼakumi asatu la divwa ka diulelu dia Azariya, khumʼekanga ka Juda, kakatatela Menahema, onʼa Ngadi, mbulela Isariyele. Ndi akulela deku dikumi la Samariya.

¹⁸Ndi akatshaka kene kaki kolo lu ashu wa Latuyalaka lu nshi tshe ya lumu landi, ndi kunkadimo uma lu kolo ya Jeroboama, onʼa Nebate, yakandanganyia Isariyele.

¹⁹Pulu, khumʼekanga kʼAsuriya, akayi dia ndjolosha wudja. Ku Menahema akawusha talata ya fesa kinunu ya mbukimanyia dia nshikike diulelu diandi.

²⁰Menahema akakongola falanga yako lu Isariyele uma le akanga wʼengonyi, akafutsha vo tshe untu lʼuntu toshekele akumi atanu ta fesa dia mbisha khumʼekanga kʼAsuriya. Okone khumʼekanga kʼAsuriya akakalula, kuntshikala lu wudja.

²¹Undi, etsha ekina wa Menahema, la akambu tshe wakandatshaka, hawufundami lu Buku diʼEkondo wa Khumi ya dikanga ya Isariyele?

²²Menahema akayeli washi, ku onʼandi Pekahiya akulela lu dihuli diandi.

²³Lʼeleku kʼakumi atanu ka diulelu dia Azariya, khumʼekanga ka Juda, kakatatela Pekahiya, onʼa Menahema, mbulela Isariyele lu Samariya; ndi akulela deku pendi.

²⁴Ndi akatshaka kene kaki kolo lu ashu wa Latuyalaka, ndi kunkadimo uma lu kolo ya Jeroboama, onʼa Nebate, yakandanganyia Isariyele.

²⁵Peka, onʼa Remaliya, olombodi wʼalimbi wa khumʼekanga, akawudjela sheki, akokomola lu luudu la khumʼekanga la Samariya, akudiaki kame la Arangoba la Ariye. Ndi aki la apami akumi asatu wʼasi Ngiliyade kame la ndi, akulela lu dihuli diandi.

²⁶Etsha ekina wa Pekahiya, la akambu tshe wakandatshaka, wambufundama lu Buku diʼEkondo wa Khumi ya dikanga ya Isariyele.

²⁷Lʼeleku kʼakumi atanu la ahendi ka diulelu dia Azariya, khumʼekanga ka Juda, kakatatela Peka, onʼa Remaliya, mbulela Isariyele lu Samariya. Ndi akulela deku akumi ahendi.

²⁸Ndi akatshaka kene kaki kolo lu ashu wa Latuyalaka, ndi kunkadimo uma lu kolo ya Jeroboama, onʼa Nebate, yakandanganyia Isariyele.

²⁹Lu nshi ya Peka, khumʼekanga ka Isariyele, kakayi Tingilate-Pilesere, khumʼekanga kʼAsuriya akose Idjona, Abele-Bete-Maka, Janoa, Kadeshe, Hazora, Ngiliyade la Ngalili, kete tshe ya Nafetali. Ku ndi akatole antu fumbi utsha la Asuriya.

³⁰Hoshea, onʼa Ela, akadjela Peka, onʼa Remaliya, sheki, akokomola, akudiaki. Ndi akulela lu dihuli diandi lʼeleku kʼakumi ahendi ka diulelu dia Jotama, onʼa Uziya.

³¹Etsha ekina wa Peka, la akambu tshe wakandatshaka, wambufundama lu Buku diʼEkondo wa Khumi ya dikanga ya Isariyele.

³²Lʼeleku ka hendi ka diulelu dia Peka, onʼa Remaliya, khumʼekanga ka Isariyele, kakatatela Jotama, onʼa Uziya, khumʼekanga ka Juda, mbulela.

³³Ndi aki la deku akumi ahendi la tanu lamʼakandayala khumʼekanga, ndi akulela deku dikumi la samalu la Jerusalema. Lukumbu la nyangu laki Jerusha, onʼa Zadoka.

³⁴Ndi akatshaka akambu wʼusimbwi lu ashu wa Latuyalaka; ndi akatshaka tshe uku akatshaka Uziya, shi.

³⁵Keli vo kunanya alunga; antu wakakolamelaka nambula la ntshumba malashi lu alunga. Ndi akadji lukuki la ladiku lu luudu la Latuyalaka.

³⁶Undi, etsha ekina wa Jotama, la akambu tshe wakandatshaka, hawufundami lu Buku diʼEkondo wa Khumi ya dikanga ya Juda?

³⁷Lu nshi yako Latuyalaka akatatela ntuma Rezina, khumʼekanga ka Suriya la Peka, onʼa Remaliya, dia ndjolosha Juda.

³⁸Jotama akayeli washi; wakukhunde la le washi lʼusumba wa Davidi, tshendi. Ku onʼandi Ahaza akulela lu dihuli diandi.