Read tetala 2 Khumi ya Dikanga 16 Bible Online

2 Khumi ya Dikanga 16 - tetala bible

2 Khumi ya Dikanga 16

¹Lʼeleku ka dikumi la esambeli ka o diulelu dia Peka, onʼa Remaliya, kakatatela Ahaza, onʼa Jotama, khumʼekanga ka Juda, mbulela.

²Ahaza aki la deku akumi ahendi lamʼakandayala khumʼekanga. Ndi akulela deku dikumi la samalu la Jerusalema. Ndi kuntshaka akambu wʼusimbwi lu ashu wa Latuyalaka, Unyashungu andi, uku akatshaka Davidi, tshendi.

³Ndi akakendakendaka lu mbuka ya khumi ya dikanga ya Isariyele, aketsha anʼandi wʼapami lʼatei a dja, uku akambu wa wononyi wakatshaka wedja wakatatshanyaka Latuyalaka la ntundu kʼasi Isariyele.[24]

⁴Ndi akalambulaka elambu, akatshumbaka malashi lu alunga, lu akuna, ndu la tshina diʼutamba tshe wʼuyuyu.

⁵Rezina, khumʼekanga ka Suriya, la Peka, onʼa Remaliya, khumʼekanga ka Isariyele, wakayi dia ndjolosha Jerusalema. Vo wakayudinga Ahaza, keli vo kumbeya mbolembia.[25]

⁶Lʼetena keso, Razina, khumʼekanga ka Suriya, akakaluya Elate lu anya wʼasi Suriya, akatshanya asi Juda waki leko. Asi Suriya wakayi la Elate, wakayudjase leko edja ndu elo.

⁷Okone Ahaza akatumela Tingilate-Pilesere, khumʼekanga kʼAsuriya, akendji dia ntuwutela vati: Dimi leko ukambi aye, ndu leko onʼaye; yaka uyuntshunguli uma lʼanya wa khumʼekanga ka Suriya ndu wa khumʼekanga ka Isariyele wambuya dia ndjondosha.

⁸Ahaza akose fesa la paunyi yakandatani lu luudu la Latuyalaka ndu lu waumbelu wa luudu la khumʼekanga, akayitumela khumʼekanga kʼAsuriya ushasha.

⁹Ku khumʼekanga kʼAsuriya akawulela, akayi dia ndjolosha Damaseke, akalembia, akatole antu lu fumbi utsha la Kire, akadiaki Rezina.

¹⁰Khumʼekanga Ahaza akatshu la Damaseke dia ntuhumana la Tingilate-Pilesere, khumʼekanga kʼAsuriya. Lamʼakenyi khumʼekanga Ahaza ediakelu kaki la Damaseke, ndi akatumela olombedi Uridja djimbitelu ya ediakelu la yediko yato pupu uku akito.

¹¹Olombedi Uridja akatshi ediakelu uma lu tediko tshe takutumela khumʼekanga Ahaza uma la Damaseke. Ndi akakishidiya la ntundu ka khumʼekanga Ahaza atakalula uma la Damaseke.

¹²Lamʼakakumi khumʼekanga uma la Damaseke, ndi akenyi ediakelu, akasukana, akambela utsha leko.

¹³Ndi akatshumbi ulambu andi wa lutshumba, ulambu andi wa shima, akatela ulambu andi wa lutela, akamonge dikila dia elambu andi wa ki lu ediakelu.

¹⁴Ndi akasekola ediakelu kʼohotela[26] kaki la ntundu ka Latuyalaka uma lu welelo wa luudu, ne dia to atukuyala lʼasa ediakelu kandi la luudu la Latuyalaka. Ndi akakikitsha lʼumamu wʼediakelu kandi utsha lu leke la ngelʼa kushi.

¹⁵Khumʼekanga Ahaza akatela olombedi Uridja ati: Kutshumbaki ulambu wa lutshumba wa pindju, ulambu wa shima wa dikolo, ulambu wa lutshumba wa khumʼekanga, ulambu andi wa shima, ulambu wa lutshumba wa wudja tshe, ulambu awo wa shima, ndu elambu awo wa lutela ladiku diʼediakelu ka wuki. Komongaki dikila diʼulambu wa lutshumba la dikila tshe diʼuma lʼelambu ladiku diato, kulamaki ediakelu kʼohotela, ne dia loko kayumendjaka.

¹⁶Olombedi Uridja akatshi akambu tshe wakawutela khumʼekanga Ahaza.

¹⁷Khumʼekanga Ahaza akanya emamu uma lu dikitshelu, ku ndi akanya donga uma ladiku diadio, akahuluya puki ka wuki uma ladiku dia ngombe yʼehotela yaki la tshina diato,[27] akakikitsha lʼudihi wʼave,

¹⁸Ndi akanya mbalasa ka mumuya kakawahiki lu luudu la Latuyalaka ndu eotwelo ka lʼandja ka khumʼekanga uma lu luudu la Latuyalaka dikambu dia khumʼekanga kʼAsuriya.

¹⁹Undi, etsha ekina wakatshaka Ahaza hawufundami lu Buku diʼEkondo wa Khumi ya dikanga ya Juda?

²⁰Ahaza akayeli washi,[28] wakukhunde la le washi lʼusumba wa Davidi. Ku onʼandi Hezekiya akulela lu dihuli diandi.