Read tetala 2 Khumi ya Dikanga 18 Bible Online

2 Khumi ya Dikanga 18 - tetala bible

2 Khumi ya Dikanga 18

¹Lʼeleku ka satu ka diulelu dia Hoshea, onʼa Ela, khumʼekanga ka Isariyele, kakatatela Hezekiya, onʼa Ahaza, khumʼekanga ka Juda, mbulela.

²Ndi aki la deku akumi ahendi la tanu lamʼakandayala khumʼekanga. Ndi akulela deku akumi ahendi la divwa la Jerusalema. Lukumbu la nyangu laki Abi, onʼa Sekariya.

³Hezekiya akatshaka akambu wʼusimbwi lu ashu wa Latuyalaka, uku tshe wakatshaka Davidi, tshendi.

⁴Ndi akalanya alunga, akahandjula dimeta diawo, akatshatsha dikishi dia Ashera, akahimbuhimbuya ului wʼohotela wakatshi Mose,[35] ne dia edja ndu shi sho asi Isariyele wakutshumbelaka malashi, wakawetaka vati: Nehushitana (kitshimudi ati: Engo kʼohotela).

⁵Ndi akekamaka Latuyalaka, Unyashungu wa Isariyele; lʼatei a khumi ya dikanga tshe ya Juda, nduku khumʼekanga kaki la ntundu kana lʼokongo andi kaki uku ndi.

⁶Ndi akamamema le Latuyalaka, kunkimo mbuyela, ndu akalamaka elembe wakadjela Latuyalaka Mose.

⁷Latuyalaka aki kame la ndi; lu ahuli tshe wakandatatshokaka, ndi akatahumoka lukulu Polo. Ndi akahendwela khumʼekanga kʼAsuriya, kumbetawo ndjala lʼokongo andi ntu.

⁸Ndi akalo la asi Lilistiya pulu ndu la Ngaza, akalanya kete yawo, tusamba la esumba awo a wulu.

⁹Lʼeleku ka nei ka diulelu dia khumʼekanga Hezekiya, kaki eleku kʼesambeli ka diulelu dia Hoshea, onʼa Ela, khumʼekanga ka Isariyele, kakayi Shalamanesere, khumʼekanga kʼAsuriya, la ndjolosha Samariya, akayadinga.

¹⁰Lʼokongo wa deku satu, lu eleku ka samalu ka diulelu dia Hezekiya, kaki eleku kaki eleku ka divwa ka diulelu Hoshea khumʼekanga ka Isariyele; vo wakalembia Samariya.

¹¹Khumʼekanga kʼAsuriya akatole Isariyele fumbi utsha lʼAsuriya akataladia la Hala, ndu lʼumamu wa Habora, ndjali ka la Ngozana, ndu lʼesumba wʼasi Mediya,

¹²ne dia vo kunkitanyia diui dia Latuyalaka, Unyashungu awo, wakalanya sheki yandi; ndu ne dia vo kununga ndu kumbetawo ntsha kene tshe kakawadjangela Mose, ukambi wa Latuyalaka.

¹³Lʼeleku ka dikumi lʼanei ka diulelu dia khumʼekanga Hezekiya, Senakeribe, khumʼekanga kʼAsuriya, akayi dia ndjolosha esumba a wulu tshe wa Juda, akelembia.

¹⁴Ku Hezekiya, khumʼekanga ka Juda, akatumi akendji le khumʼekanga kʼAsuriya la Lakishi ati: Dimi lakangi, omo uma le mi. Wutshu tshe wayuyumbahe, dimi layuwemba. Ku khumʼekanga kʼAsuriya akalombe Hezekiya, khumʼekanga ka Juda talata kama shatu ya fesa la talata akumi asatu ya paunyi.

¹⁵Hezekiya akawusha fesa tshe yakawatani lu luudu la Latuyalaka ndu lu waumbelu wa lu luudu la khumʼekanga.

¹⁶Lʼetena kako, Hezekiya akanya paunyi uma la kuki ya lu luudu la Latuyalaka, ndu uma lu dikoho dia la suku diakakumbi Hezekiya, khumʼekanga ka Juda, la paunyi. Ndi akayisha khumʼekanga kʼAsuriya.

¹⁷Khumʼekanga kʼAsuriya akatumi Taratana, Rabisarisi, la Rabishake uma la Lakishi kame la ului a wuki wʼalimbi utsha le khumʼekanga Hezekiya la Jerusalema. Ku vo wakunela, wakayukuma la Jerusalema. Lamʼakawakumi, vo wakayemala lu kungi ka lʼuduwa wa la diku, lʼosese wʼutsha lʼekambo kʼuminyudi wʼahondo lu alangi.

¹⁸Lamʼakaweti khumʼekanga; Eliyakima, onʼa Hilikiya, uwandji wa luudu la khumʼekanga, akatshu le wo; ndi la ufundji Shebena, la okondodi wʼekondo Joa, onʼa Asafu.

¹⁹Rabishake akawatela ati: Nyututeli Hezekiya nyati: Khumʼekanga ka wuki, khumʼekanga kʼAsuriya, kakumbula ati: Akona eli usuko aye, le na ekamiye?

²⁰We akati wati: Ewu la wulu wa ndo ta weko, keli aui wa utata mbewo. Le na ekamiye dia we mpendwelami?

²¹Enda, we ambekama Edjibitu. Lokombe lambowele mbewo, lo layuhumuya untu tshe layulekama, layutundula lunya landi. Osoku mbatutshelaka Farayo, khumʼekanga ka Edjibitu, antu tshe watuwekamaka.

²²Undu, we ayumvutela wati: Shu tatekamaka le Latuyalaka, Unyashungu asu, keli aha lu dikambu diandi mbakalanya Hezekiya alunga ndu diakelu, atela asi Juda la asi Jerusalema ati: Kanyotemolaki paka la ntundu kʼediakelu kene keli la Jerusalema?

²³Kakiane, yaka yudji la khumemi khumʼekanga kʼAsuriya, sheki ku dimi layukusha falasa nunu pendi, naka we la antu weya ndjahema.

²⁴Ukundi atshanyaye uwandji omotshi wulek tshitshe lʼatei wʼekambi wa khumemi, dia mbekama Edjibitu dikambu dia pusupusu ya ta la ambahemi wa falasa?

²⁵Undi, dimi lambuya dia ndjulanya wudja one, aha la wulu uma le Latuyalaka? Latuyalaka ndame kakamvutela ati: Utshu, utolosha wudja one, utulanya.

²⁶Ku Eliyakima, onʼa Hilikiya, Shebena la Joa, wakatela Rabishake vati: Otekete la ekambi aye lu oteketa wʼasi Arama, ne dia shu mbeyaka. Toteketaki la su lʼoteketa wʼasi Juda, ne dia alami wa lukumbu lʼusumba watukuka.

²⁷Keli Rabishake akakaluya diui ati: Undi, le khumeye la le ye, kakantumi khumemi dia ndjunyutela aui ane? Aha le alami aku wudjashi ladiku dia lukumbu lʼusumba, wayole tumi tawo, ndu wayono wanyi awo kame la nyu, uka?

²⁸Ku Rabishake akemala, akahangohango la diui dia wulu lʼoteketa wʼasi Juda ati: Nyuki aui wa khumʼekanga ka wuki, khumʼekanga kʼAsuriya.

²⁹Khumʼekanga kata ati: Tanyetawoki Hezekiya nyukesa, ne dia ndi heyi nyushimbela uma lu lunya lami.

³⁰Tanyetawoki aui wayunyutela Hezekiya dia nyekamia le Latuyalaka ati: Mete, Latuyalaka ayunyushimbela; usumba one hawuyala lʼanya wa khumʼekanga kʼAsuriya.

³¹Tanyetawoki aui wa Hezekiya; ne dia khumʼekanga kʼAsuriya kata ati: Nyuyi le mi, nyuyudji la mi sheki, ku nyu tshe untu lʼuntu ayole elua uma lʼekambo kandi ka vinyo, ndu wʼuma lʼutamba andi wa fingu; la untu lʼuntu ayono ashi uma lʼushima andi,

³²edja ndu lamʼayumuya dia ndjunyosa. Ku layutsho la nyu utsha lu kete yufanyi la kete yanyu, kete yʼepunga la ya wanu, kete va mbu ya nde, la ya vinyo, kete yʼeweli la usanga. Nyu nyayutshikala la lumu, hanyuvo. Tanyulungaki aui wa Hezekiya lamʼayunduhimba nyukesa, ati: Latuyalaka ayututshungula.

³³Lʼatei a ditemolatemola tshe dia wedja, undi, etemolatemola kemotshi kakahandja wudja ato uma lʼanya wa khumʼekanga kʼAsuriya uka?

³⁴Ditemolatemola dia Hamata la dia Arapada lendʼedio na? Lendʼeli ditemolatemola dia Sefaravayima, dia Hena la dia Iva? Dio diakatshungula Samariya uma lʼanya ami uka?

³⁵Lʼatei a ditemolatemola dia wedja ene, diakona diakatshungula wudja adio uma lʼanya ami, diayutshungula Latuyalaka utu Jerusalema uma lʼanya ami?

³⁶Keli antu wakalembohala ki, kumbukaluya nduku diui, ne dia khumʼekanga akadjanga ati: Tanyukaluyaki nduku diui.

³⁷Eliyakima, onʼa Hilikiya, uwandji wa luudu la khumʼekanga, ndi la ufundji Shebani, la okondodi wʼekondo Joa, onʼa Asafu, wakayi le Hezekiya ahondo awo betshibetshi, wakayuwutela aui wa Rabishake.