Read tetala 2 Khumi ya Dikanga 19 Bible Online

2 Khumi ya Dikanga 19 - tetala bible

2 Khumi ya Dikanga 19

¹Lamʼakuki khumʼekanga Hezekiya aui aso, ndi akatshatsha ahondo andi, akalote akutu, akoto lu luudu la Latuyalaka.

²Ndi akatumi Eliyakima, uwandji wa luudu landi, ufundji Shebina, la elombedi wa dikumanyi wolote akutu utsha le umvutshi Isaya, onʼa Amoza.

³Vo wakatuwutela vati: Okone mbata Hezekiya ati: Lushi lone, leli lushi la pa, lʼasui, ndu la dionyo, ne dia etena ka ana mbuto ambukuka keli wulu wa mbauta kema.

⁴Undu, Latuyalaka, Unyashungu aye, akuki aui wa Rabishake lakatumi khumʼekanga kʼAsuriya dia monyola Unyashungu a lumu. Latuyalaka, Lʼnyashungu aye, ayuhangwela ne dia aui wakanduki undu. Osoku olombele atshikadi ane Unyashungu.

⁵Okone ekambi wa khumʼekanga Hezekiya wakakumi le Isaya.

⁶Ku Isaya akawatela ati: Kanyututeli khumenyu okone nyati: Latuyalaka kata ati: Tukaki woma dia aui wakayuki, wakantenge ekambi wa khumʼekanga kʼAsuriya.

⁷Enda, dimi layukadimula yimba ku lamʼayunduka kumu, ndi ayukalula lakawo. Ndi ayutudiakema la yombo lu wudja andi.

⁸Rabishake akuki lukumu ati: Khumʼekanga kʼAsuriya ambunela uma la Lakishi. Okone ndi akakalula, akatutana alo la Libina.

⁹Lamʼakuki khumʼekanga kʼAsuriya lukumu ati: Tirihaka, khumʼekanga ka Etiyopia, lu ndjayi dia ndjolo la ye, ndi akatumi akendji ntu le Hezekiya ati:

¹⁰Kanyututeli Hezekiya, khumʼekanga ka Juda, nyati: Tetawoki Unyashungu aye watuyekamaka nkukesa ati: Jerusalema huyala lʼanya wa khumʼekanga kʼAsuriya.

¹¹Mete, we akuki uku akatshela khumi ya dikanga wʼAsuriya wedja tshe, ndu uku akawashili ushiki, ku we utu kayuhanda uka?

¹²Washesu wakalanya wedja wa Ngozana, Harana, Rezefu, ndu asi Edena waki la Telasara. Undi, ditemolatemola diawo diakeyi mbashimbela uka?

¹³Lendʼeli khumʼekanga ka Hamata, khumʼekanga ka Arapada, ndu khumʼekanga kʼusumba wa Sefaravayima, ka Hena, ndu ka Iva?

¹⁴Hezekiya akose mukanda uma Tanya wʼakendji, akawali. Ku ndi akatshu utsha lu luudu la Latuyalaka, akatuwombola la ntundu ka Latuyalaka.

¹⁵Ndi akolombe ati: We Latuyalaka, Unyashungu wa Isariyele, ludjashi ladiku dia akeruba,[36] weme keli Unyashungu a waulelu tshe wa la kete; we kakatungi ulungu la kete.

¹⁶We Latuyalaka, uhuke tui, umbukeli! Latuyalaka li! udihuli ashu aye, endi, uki aui wa Senakeriba wakandatumi dia ndjukotenga, we Unyashungu la lumu.

¹⁷Latuyalaka li! mete, khumi ya dikanga yʼAsuriya wakalanya wedja la kete yawo,

¹⁸wakatambiya ditemolatemola diawo lu dja. Ne dia dio diaki paka ditemolatemola diakatshi antu uma lʼetamba, lʼave, diako mbakaweyi dilanya.

¹⁹Latuyalaka, Unyashungu asu, lambukosengasenga nti: Utushimbeli kakiane uma lʼanya andi, dia waulelu tshe weyi vati: We, Latuyalaka, weme utu keli Unyashungu.

²⁰Ku Isaya, onʼa Amoza, akatumela Hezekiya diui ati: Latuyalaka, Unyashungu wa Isariyele, kata ati: Dimi lakuki elombelo kaye lu dikambu dia Senakeriba, khumʼekanga kʼAsuriya.

²¹Okone mbata Latuyalaka lu dikambu diandi ati: Siona, usekaseka a umuntu wʼemuma, Ambukonyola, ambukosoka, Jerusalema ona umuntu, Ambukunyinginyia ote.

²²Akona akayatenge, akayonyola na? Akayahangwela na? Akayakhundwela ashu na? Le lʼEkila la Isariyele!

²³Uma le akendji aye mbakayatenge khumesu, ndu mbakayati wati: Uma lʼefula ka pusupusu yami, Mbakamambela lʼete wʼekungu, Mbakamakumi la kuma ya Lebanona; Dimi lakakote esasi awo wuleki etali, La weoto awo wuleki amena; Dimi lakakumi kʼatei wa ngamba, Lu dihuli diuleki eteto;

²⁴Dimi lakatshimi teko, lakano ashi wa wedja, Ndu dimi lakumia ashi wa lʼEdjibitu tshe lʼakaka ami.

²⁵We kumbuka wati: Dimi lambolongosola akambu ane, Ndu lambasanguyaka umaka nshi yʼedjedja? Kakiane lambukimo wulu wʼakambu ane ntshama, Dia we nanya esumba weli la khumbu ya wulu, la mbaete atongo atu.

²⁶Okone waku wakadjashi loko kundjala la wulu, Wakuki woma ndu wakakanana. Vo wakayala uku adiyu wa lu dikambo ndu wʼomongela, Uku adiyu watomenaka lu elumbi a mvudu, Uku epunga wambuma, wahatuli.

²⁷Dimi mbeyaka edjaselu kaye, eunelu kaye, eyelu kaye, Ndu ududu watuyumbukaka.

²⁸Dimi lakuki dia ududu watuyumbukaka, La dia utaku aye. Okone layukudja shingu diami lʼohembe, la okodi lu kingu, Ku dimi layukukaluya lu mbuka kakayayi.

²⁹Dikambu ne diayuyala djimbitelu le ye. Lʼeleku kene, nyu nyayolekaka diango diatutumbaka diame, ndu lʼeleku kʼuyuyu pupu, ku lʼeleku ka satu kanyune, kanyune; kanyune ekodi wa vinyo, kanyolekaki elua awo.

³⁰Atshikadi wa lu luudu la Juda wakahandi wayudja ediu ntu, wayoto elua.

³¹Ne dia atshikandi wayutumba uma la Jerusalema le waku wambuhanda uma lʼukungu wa Siona. Saki ka Latuyalaka nambutsha dikambu ne.

³²Latuyalaka kata dia khumʼekanga kʼAsuriya ati: Ndi hukuma lʼusumba one, kuyanga mbuka luhitu landi loko. Ndi hukuma la engawu leko, kuyanga mbuhikela wumbe wa ta.

³³Ndi ayukalula lu mbuka kakandayi; ndi hukuma lʼusumba one, mbata Latuyalaka.

³⁴Dimi layulama usumba one, layushimbela lu dikambu diami ndu lu dikambu diʼukambi ami Davidi.

³⁵Ku lʼutshu, ondjelo a Latuyalaka akatumbi, akadiaki asi Asuriya nunu lukama la akumi enanei la tanu lu pangu. Lamʼaketo antu kʼolomo la pindju, wayendi ku antu ako tshe wakayadi edu etu.

³⁶Ku Senakeriba, khumʼekanga kʼAsuriya, akunela, akakalula, akatudjase la Niniva.

³⁷Keli lamʼakindi lu ntemola etemolatemola kandi lu luudu la Nisroke, anʼandi wʼapami Adarameleke, la Sharezere, wakayudiaka la yombe, wakalawo utsha lu leke la Ararata. Ku onʼandi Esare-Hadona, akulela lu dihuli diandi.