Read tetala 2 Khumi ya Dikanga 20 Bible Online

2 Khumi ya Dikanga 20 - tetala bible

2 Khumi ya Dikanga 20

¹Lu nshi sho Hezekiya akuki kandji, aki lasuki la nyoi. Ku umvutshi Isaya, onʼa Amoza, akayi le ndi, akayuwutela ati: Latuyalaka kata ati: Olongosole akambu wa luudu laye, ne dia we ayuvo, hayuka ntu.

²Hezekiya akakadimula elundji utsha lʼeheli, akalombe Latuyalaka ati:

³Latuyalaka li, lambukosengasenga nti: Uho uku akamakendakendaka la ntundu kaye lu mete, lʼutema wʼusimbwi, ndu uku akamatshaka akambu waki ololo lu ashu aye, ku Hezekiya akaleli wulu.

⁴Diui dia Latuyalaka diakayi le Isaya ndi eki kʼatei usumba ati:

⁵Ukaluli, ututeli Hezekiya, uwandji a wudja ami, wati: Latuyalaka, Unyashungu wa sho Davidi, kata okone ati: Dimi lakuki dombelo diaye, lakenyi asoi aye. Ulungi, layukokonoya, ku lushi la satu we ayutsho utsha lu luudu la Latuyalaka.

⁶Dimi layukahela deku dikumi la tanu; layukutshungula, we la usumba one, uma lʼanya wa khumʼekanga kʼAsuriya. Dimi layulamaka usumba one lu dikambu diami ndu lu dikambu diʼukambi ami Davidi.

⁷Isaya akati ati: Nyela ukama wʼelua wa fingu. Vo wakawela, wakumami lu tshutshu, ku ndi akakono.

⁸Hezekiya akambula Isaya ati: Lu djimbitelu yakona yayumulimbitela nti: Latuyalaka ayonkonoya, ndu dimi layutsho lu luudu la Latuyalaka lushi la satu?

⁹Ku Isaya akûkaluya diui ati: Lu djimbitelu nye yʼuma le Latuyalaka mbayuyulimbitela wati: Ndi ayushidiya diui diakandati. Undi, dedi kadiutalo bandelu dikumi, kana kadiukaluli ekongokongo bandelu dikumi?

¹⁰Hezekiya akûkaluya diui ati: Kema dikambu dia wuki dia dedi ntalo bandelu dikumi, keli dio kadiukaluli bandelu dikumi.

¹¹Umvutshi Isaya akalombe Latuyalaka, ku ndi akakaluya dedi ekongokongo bandelu dikumi uma lene akadiatalo lu bandelu dia Ahaza.

¹²Lʼetena keso, Berodaka-Baladana, onʼa Balada, khumʼekanga ka Babilona, akatumela Hezekiya mukanda la ushasha, ne dia ndi akuki lukumu ati: Ndi aki la kandji.

¹³Hezekiya akalungula ololo, akawaenya diango diandi tshe diʼushinga a wulu diaki lu luudu: fesa, paunyi, diango diʼepumu, iso kʼushinga a wulu, ndu luudu landi la diango dia ta, diango tshe dia ongonyi andi. Nduku engo kaki lu luudu la Hezekiya kana kaki lu diulelu diandi tshe kakindi kumbaenya.

¹⁴Ku umvutshi Isaya, akayi le khumʼekanga Hezekiya, akayuwumbula ati: Kakakutedi antu ane, la uma lendi akawayi na? Ku Hezekiya alukaluya diui ati: Vo wakayi le mi uma lu kete yʼetali, la Babilona.

¹⁵Ku Isaya akawumbula ntu ati: Kakawenyi lu luudu laye na? Hezekiya akûkaluya diui ati: Vo wakenyi diango tshe dieli lu luudu lami, nduku engo lʼatei a waumbelu ami kakimi kumbaenya.

¹⁶Ku Isaya akatela Hezekiya ati: Ulungi diui dia Latuyalaka!

¹⁷Ulungi, etena kukuyala, kayuwemba diango tshe dieli lu luudu laye, la kene tshe kakatakumbedi wa sho edja ndu elo utsha la Babilona. Nduku engo kayutshikala, mbata Latuyalaka.[37]

¹⁸Vo wayotola ndu anʼaye wʼapami wambuyuta, dia ntuwaete elenga lu luudu la diulelu dia khumʼekanga ka Babilona.[38]

¹⁹Ku Hezekiya akatela Isaya ati: Diui diakati Latuyalaka lʼunyo aye dieli ololo. Ku ndi akayambula ati: Ukundi ahayala ololo, naka eko la lutui tshitshi mbayuyalaka lu nshi yami?

²⁰Undi, etsha ekina wa Hezekiya, wulu andi tshe, ndu uku akandatshi uduwa la kungi, ndu uku akandela ashi uya lʼusumba, hawufundami lu Buku diʼEkondo wa Khumi ya dikanga ya Juda?

²¹Hezekiya akayeli washi, ku onʼandi Manase akulela lu dihuli diandi.