Read tetala 2 Khumi ya Dikanga 21 Bible Online

2 Khumi ya Dikanga 21 - tetala bible

2 Khumi ya Dikanga 21

¹Manase aki la deku dikumi la pendi lamʼakandayala khumʼeka nga. Ndi akulela la Jerusalema deku akumi atanu la tanu. Lukumbu la nyangu laki Hefiziba.

²Ndi akatshaka kene kaki kolo lu ashu wa Latuyalaka,[39] akayeli akambu a wononyi a wedja wakatatshanyaka Latuyalaka la ntundu kʼasi Isariyele.

³Ndi akalongosola alunga wakalanya Hezekiya, shi, ntu Ndi akeme diakelu dia Bala, akatshi ekishi ka Ashera, uku akatshi Ahaba, khumʼekanga ka Isariyele. Ndi akatemolaka ului tshe wa diango dia lʼulungu, akadikhusamelaka.

⁴Ndi akatshi diakelu lu luudu la Latuyalaka, kuyanga mbakati Latuyalaka ati: La Jerusalema kayumushikike lukumbu lami.[40]

⁵Ndi akatshela ului tshe wa diango dia lʼulungu diakelu lʼatei a kumbu hyendi yʼaseke wa luudu la Latuyalaka.

⁶Ndi aketsha onʼandi a pami lu dja dia ndjala ulambu, akatshaka aloho, akendjaka, akadji antu amotshi dia nteketshaka djimu, la dia ndjala akanga wʼaloka. Ndi akatatekoyaka ntsha kolo lu ashu wa Latuyalaka dia mbukia kele.

⁷Ndi akandji ekishi ka Ashera kakandasele lu luudu lakatela Latuyalaka Davidi la onʼandi Solomona ati: Lu luudu lone, ndu lu Jerusalema, kakamasonola lʼatei a wedja tshe wa Isariyele, kayumushikike lukumbu lami pundju.

⁸Dimi halekekuyaki akaka wa Isariyele ntu lʼandja wa kete yakamasha washewo, naka vo wayutshaka akambu tshe wakamawadjangela ndu wayuyelaka elembe tshe wakatawadjedi ukambi ami Mose.[41]

⁹Keli vo kunkitanyia; la Manase akawanganyia dia ndeka wedja wakatatshanyaka Latuyalaka la ntundu ka Isariyele ntsha kolo.

¹⁰Ku Latuyalaka akati aui ane le ekambi andi amvutshi ati:

¹¹Ne dia Manase, khumʼekanga ka Juda, akatshi akambu ane wa wononyi, akaleki asi Amora waki la ntundu kandi ntsha kolo, ndu ne dia ndi akanganyia asi Juda lu dikishi diandi,

¹²ulungi, dimi lutsha mbela elanyelu la Jerusalema la Juda wuhu wayukashimula atui wʼuntu tshe layuka.

¹³Dimi layusimbula ushinga wʼelumbwelu ka Samariya la okodi wʼedimielu wa luudu la Ahaba ladiku dia Jerusalema. Dimi layomombia Jerusalema uku atuwomombiaka donga lʼetei ndu lʼandja.

¹⁴Dimi layunya atshikadi wʼetenyi kami kʼukito, layakimo lʼanya wʼatunyi awo. Vo wayuyala uku nyama kakandami ndu uku diango dia dimbu lʼanya wʼatunyi awo,

¹⁵ne dia vo wakatshaka kene kaki kolo lu ashu ami, wakambukiaka kele uma lu lushi lakatumbi washewo uma lʼEdjibitu edja ndu elo.

¹⁶Ndu Manase akatshulula dikila efula diaha la unungu, edja ndu ndi akadiludia Jerusalema uma la kuma pulu ndu la kuma kekina, ladiku dia kolo kakandanganyia Juda dia ntsha kene kaki kolo lu ashu wa Latuyalaka.

¹⁷Undi, etsha ekina wa Manase la akambu tshe wakandatshaka, la kolo kakandatshaka, hawufundami lu Buku diʼEkondo wa Khumi ya dikanga ya Juda?

¹⁸Manase akayeli washi, wakukhunde lʼekambo kaki lasuki la luudu landi, lʼekambo ka Uza. Ku onʼandi Amona akulela lu dihuli diandi.

¹⁹Amona aki la deku akumi ahendi la pendi lamʼakandayala khumʼekanga. Ndi akulela deku pendi la Jerusalema. Lukumbu la nyangu laki Meshulemete, onʼa Haruza, usi Jotiba.

²⁰Ndi akatshaka kene kaki kolo lu ashu wa Latuyalaka uku akatshaka Manase, shi.

²¹Ndi akakendakendaka lu mbuka tshe kakakendakendaka shi, ndi akatemolaka dikishi diakatemolaka shi, akadikhusamelaka.

²²Ndi akaseke Latuyalaka, Unyashungu a washi, konkendakenda lu mbuka ka Latuyalaka.

²³Ekambi wa khumʼekanga Amona wakawudjela sheki, ku wakudiaki lu luudu landi.

²⁴Keli asi wudja wakadiaki antu tshe wakadjela khumʼekanga Amona sheki, ku vo wakadji Josiya, onʼandi, khumʼekanga lu dihuli diandi.

²⁵Undi, etsha ekina wa Amona, wakandatshaka, hawufundami lu Buku diʼEkondo wa Khumi ya dikanga ya Juda?

²⁶Wakukhunde lu wuku andi wa diumbu lʼekambo ka Uza. Ku onʼandi Josiya akulela lu dihuli diandi.