Read tetala 2 Khumi ya Dikanga 22 Bible Online

2 Khumi ya Dikanga 22 - tetala bible

2 Khumi ya Dikanga 22

¹Josiya[42] aki la deku enanei lamʼakandayala khumʼekanga. Ndi akulela deku akumi asatu la otoi la Jerusalema. Lukumbu la nyangu laki Jedida, onʼa Adaya, usi Bozikate.

²Ndi akatshaka akambu wʼusimbwi lu ashu wa Latuyalaka, akakendakendaka lu mbuka tshe ka Davidi tshendi; kombetola lu lunya la pami kana la lomoso.

³Lʼeleku ka dikumi lʼenanei ka diulelu dia Josiya, ndi akatumi ufundji Shafana, onʼa Azaliya, onʼa Meshulama utsha lu luudu la Latuyalaka, ati:

⁴Utshu le olombedi wa ladiku Hilikiya, atali falanga yakawelaka lu luudu la Latuyalaka, yakasanganyaka antu watulamaka suku uma le antu.

⁵Kawuyikimo lʼanya a wane weli la okende wa ntsha ulimu wa nongosola luudu la Latuyalaka dia nongosola ahuli wakalana,

⁶etshudi wʼabaya, ambiki wa mvudu, anongi wʼave, ndu dia nsumba etamba la ave wa lokolonga dia nongosola luudu.

⁷Vo kumbalaka falanga la wane wakawayishaka, ne dia vo wakatshaka la mete.

⁸Olombedi wa ladiku Hilikiya akatela ufundji Shafana ati: Dimi lambushula buku diʼelembe lu luudu la Latuyalaka. Hilikiya akasha Shafana buku diako, ku ndi akadiali.

⁹Ufundji Shafana akayi le khumʼekanga, akayuwutela ati: Ekambi aye wakatundjisha falanga yaki lu luudu, wakayikimwi le wane weli la okende wa ntsha ulimu wa nongosola luudu la Latuyalaka.

¹⁰Ufundji Shafana akadiali la ntundu ka khumʼekanga ntu ati: Olombedi Hilikiya akambisha buku. Ku Shafana akadiali la ntundu ka khumʼekanga.

¹¹Lamʼakuki khumʼekanga aui wʼuma lu buku diʼelembe, ndi akatshatsha ahondo andi.

¹²Khumʼekanga akatela olombedi Hilikiya, Ahikama, onʼa Shafana, Akibore, onʼa Mikaya, ufundji Shafana, la Asaya, ukambi wa khumʼekanga, ati:

¹³Nyutshu, nyututumbweli Latuyalaka, dimi, wudja la Juda she, lu dikambu dia aui weli lu buku ne diakawashudi. Ududu wa Latuyalaka waya wuki le su, ne dia washesu kunkitanyia aui wʼuma lu buku ne ndu kuntsha kene kakafundami loko lu dikambu diasu.

¹⁴Ku olombedi Hilikiya, Ahikama, Akibore, Shafana la Asaya, wakatshu le umvutshi a umuntu Huluda, wadi a Shaluma, onʼa Tikiva, onʼa Harahasi, ulami wʼeloto (ndi akadjashi lu leke lukina lʼusumba); wakatusawula la ndi.

¹⁵Ku umvutshi a umuntu ako akawatela ati: Latuyalaka, Unyashungu wa Isariyele, kata ati: Nyututeli untu lunyutumi le mi nyati:

¹⁶Latuyalaka kata ati: Dimi lutsha mbela elanyelu lu dihuli ne, ndu le wane wudjashi loko, uku aui tshe wufundami lu buku diakadi khumʼekanga ka Juda.

¹⁷Vo wakanseke, wakatshumbela ditemolatemola malashi dia mbukiami kele uma lʼelimu tshe wakawatshi lʼanya. Diako mbambufula kolo kami wulu lu dihuli ne; to hushila.

¹⁸Nyututeli khumʼekanga ka Juda lakanyutumi dia ndjumbula le Latuyalaka nyati: Latuyalaka, Unyashungu wa Isariyele, kata okone lu aui wakayuki ati:

¹⁹Ne dia utema aye akalembe, ndu we akayakitshakitsha la ntundu kami, dimi Latuyalaka, lamʼakayuki aui wakamati lu dikambu dia dihuli ne ndu le antu wudjashi loko, dia vo ndjala engo kʼelanyelu la ka mananu; ndu ne dia we akatshatsha ahondo aye, akaleli la ntundu kami, osoku dimi lambukutela, mbata Latuyalaka.

²⁰Okone, dimi layukotola le wa sho, la we ayoto lu diumbu diaye ki, ku ashu aye hawena elanyelu kayumela lu dihuli ne. Ku vo wakayi lʼaui aso le khumʼekanga.