Read tetala 2 Khumi ya Dikanga 23 Bible Online

2 Khumi ya Dikanga 23 - tetala bible

2 Khumi ya Dikanga 23

¹Khumʼekanga Josiya akasanganya dihangamendi tshe dia Juda la dia Jerusalema la ntundu kandi.

²Ku ndi akatshu utsha lu luudu la Latuyalaka, ndi la apami tshe wa Juda, asi Jerusalema tshe, elombedi, amvutshi, la antu tshe a waki ndu wa tshitshe. Ku ndi akawalela aui tshe wakawatani, uma lu buku dia sheki diakawashula lu luudu la latuyalaka.

³Khumʼekanga akemala lasuki lʼekoho, akadji la Latuyalaka sheki, dia ndjela Latuyalaka la dia namaka elembe andi, aui andi, la adjangu andi lʼutema tshe ndu la lumu tshe, dia ntshaka aui tshe wa sheki nye wakafundama lu buku ne. Ku antu tshe wakoto lu sheki.

⁴Khumʼekanga akatela olombedi wa ladiku Hilikiya la elombedi wa lʼokongo andi ndu alami wʼasuku dia vo mundja diango diʼulimu diakatshama lu dikambu dia Bala, dia Ashera, la dia ului tshe wa diango dia lʼulungu, uma lu luudu la Latuyalaka. Ku ndi akatuditshumba lʼandja a Jerusalema lʼesui wa Kidirona; akembe utuku adio utsha la Betele.

⁵Ndi akatshanya elombedi wa dikishi, wakatadji khumi ya dikanga ya Juda dia ntshumbaka elambu wa malashi lu alunga wa lʼesumba wa Juda, ndu lʼahuli wa lʼutshimba wa Jerusalema, ndu waku wakatshumbelaka Bala, unya, ngondo, toto la ului tshe wa diango dia lʼulungu malashi.

⁶Ndi akatundja ekishi ka Ashera, akakitole lʼandja a Jerusalema, utsha la kyoko ya Kidirona. Ndi akatukitshumba leko, akakiete efushi etu, akawetela ladiku dia waumbu wʼasi wedja.[43]

⁷Ndi akahandjula mvudu yʼapami, akanga a luseka wakunanaka lʼasikawo apami, waki lu luudu la Latuyalaka, lene akelaka amantu apema wa Ashera.

⁸Ndi akela elombedi tshe uma lʼesumba wa Juda; akafutanya alunga, lene akatshumbaka elombedi malashi, uma la Ngeba pulu ndu la Bere-Sheba. Ndi akalanya alunga wakawatemolaka djimu, waki lʼeotwelo ka suku dia Jashua, uwandji wʼusumba, waki lu lunya la lomoso lʼeotwelo kʼusumba.

⁹Elombedi ako wʼalunga kundjakaka tena tshe lʼediakelu ka Latuyalaka la Jerusalema, keli vo wakalekaka ma diaha la edya lʼatei wʼanyawo.

¹⁰Ndi akafutanya Tofeta, kaki lʼukidi wʼana wa Hinome,[44] diaha untu mbetsha onʼandi a pami kana umuntu lu dja dia nemia Moleke.[45]

¹¹Ndi akanya falasa yakatshela khumi ya dikanga ya Juda unya, yaki lʼeotwelo ka luudu la Latuyalaka lasuki la luudu la mbetama la Netana-Meleke, ulami wa luudu, lakadjashi lʼekhuta. Ndi akatshumbi pusupusu ya unya lu dja.

¹²Khumʼekanga akahandjula diakelu diaki Vote a luudu la ladiku la mbetama la Ahaza, diakatatshi khumi ya dikanga ya Juda, ndu diakelu diaki lu aseke ahendi wa lu lukumbu la luudu la Latuyalaka, diakatatshi Manase.[46] Ndi akadiwediawedia, akadinya uma lu ahuli adio, akatukadja efushi adio lu kyoko ya Kidirona.

¹³Ndi akafutanya alunga waki lu welelo wa Jerusalema, waki lu leke la diku dia kushi lʼukungu wʼehondelo, wakatatshedi Solomona, khumʼekanga ka Isariyele, ekishi ka Ashera, engo ka wononyi kʼasi Sidona, Kemoshe, engo ka wononyi kʼasi Moaba, ndu Milikome, engo ka wononyi kʼasi Amona.[47]

¹⁴Ndi akanyukula dimeta, akatshatsha dikishi, ku akaludia weka wʼantu lu ahuli wakidio.

¹⁵Khumʼekanga akahandjula ndu ediakelu kaki la Betele, la dunga diakatatshi Jeroboama, onʼa Nebate,[48] lakanganyia Isariyele. Ndi akanyukula dunga, akadiete ave betshi betshi, akatshumbi Ashera.

¹⁶Lamʼakakadimo Josiya, ndi akenyi weuku a waumbu lʼukungu, akatumi antu dia ntosa weka uma leko. Ku ndi akayetshumba lʼediakelu, akakiete mindu, uku diui diakati Latuyalaka lʼunyo wʼumvutshi a Unyashungu lakataka akambu ako.[49]

¹⁷Ku khumʼekanga akambula ati: Na ekoho kʼeuhwelu kenami keku? Ku asi usumba wakûkaluya diui vati: Uku eli diumbu diʼumvutshi a Unyashungu lakayi uma la Juda, lakataka akambu ane wambuyutsha lʼediakelu ka Betele.[50]

¹⁸Ndi akati ati: Utshiki. Untu tasutshasutshaki weka andi. Okone vo wakatshiki weka andi kame la weka wʼumvutshi wakayi uma la Samariya.

¹⁹Josiya akalanya ndu mvudu tshe yʼalunga waki lʼesumba wa Samariya, yakatatshi khumi ya dikanga ya Isariyele, dia mbukia Latuyalaka kele. Ndi akatshela tshe uku akandatshi la Betele.

²⁰Ndi akadiaki elombedi tshe waki leko ladiku dia diakelu, akatshumbi weka wʼantu ladiku diadio. Ku ndi akakalula la Jerusalema.

²¹Khumʼekanga akatela antu tshe ati: Kanyutshaki dambu diʼelekanelu dia nemia Latuyalaka, Unyashungu anyu, uku akafundama lu buku ne dia sheki.

²²Uma lu nshi yʼembadi wakalumbuyaka Isariyele, ndu lu nshi tshe ya khumi ya dikanga ya Isariyele kuyanga khumi ya dikanga ya Juda, nduku dambu diʼelekanelu diakatshama uku so!

²³Tshikima lu eleku ka dikumi lʼenanei ka diulelu dia Josiya mbakawatshi dambu diʼelekanelu ne, la Jerusalema dia nemia Latuyalaka.

²⁴Josiya akanya ndu waku tshe wakateketshaka djimu, akanga wʼaloka, pingu, dikishi, la diango tshe dia wononyi diakatanema la Jerusalema. Dia ndi ntshaka aui wʼuma lʼelembe wakafundama lu buku diakashula olombedi Hilikiya lu luudu la Latuyalaka.

²⁵Nduku khumʼekanga kaki la ntundu ka Josiya, kakakadimo le Latuyalaka lʼutema andi tshe, la lumu landi tshe, ndu la wulu andi tshe, uku ndi dia ndjela elembe tshe wa Mose. Ndi nduku lakene lʼokongo andi uku ndi.

²⁶Keli Latuyalaka kunkadimo uma lʼududu wa kele kandi ka wuki kakafulanela le asi Juda, ne dia akambu tshe wakatshaka Manase dia mbutsha kele.

²⁷Ku Latuyalaka akati ati: Dimi layunya ndu Juda uma la ntundu kami, uku akamanya Isariyele. Dimi layukadja usumba one wa Jerusalema wakamasonola, ndu luudu lakamataka nti: Leko kayuyala lukumbu lami.

²⁸Undi, etsha ekina wa Josiya la akambu tshe wakandatshaka hawufundami lu Buku diʼEkondo wa Khumi ya dikanga ya Juda?

²⁹Lu nshi yandi Farayo Neko khumʼekanga ka Edjibitu akatshu utsha la ndjali ka Eyufarate dia ntolosha khumʼekanga kʼAsuriya. Khumʼekanga Josiya akatumbi dia ntolosha. Ku Farayo Neko akudiaki la Mengido, kamʼakandawenyi.

³⁰Ekambi andi wakawembe udu lu pusupusu uma la Mengido, wakayi la ndi la Jerusalema, wakayukhunde lu wuku andi wa Sumbu. Asi wudja wakose Jehoahaza, onʼa Josiya, wakukiti iso, wakawudji khumʼekanga lu dihuli dia shi.

³¹Jehoahaza aki la deku akumi ahendi la satu lamʼakandayala khumʼekanga. Ndi akulela ngondo shatu la Jerusalema. Lukumbu la nyangu laki Hamutala, onʼa Jeremiya, usi Libina.

³²Ndi akatshaka kene kaki kolo lu ashu wa Latuyalaka, uku tshe wakatshaka watshendi.

³³Farayo Neko akukeleka molola la Ribila lu kete ya Hamata, diaha ndi mbulela la Jerusalema. Ndi akafutsha wudja talata lukama ya fesa, la talata otoi ka paunyi.

³⁴Farayo Neko akadji Eliyakima, onʼa khumʼekanga Josiya, lu dihuli dia Josiya shi; ndi akukadimula lukumbu dia lo ndjala Jehoyakima. Ndi akanya Jehoahaza, ku Jehoahaza akatshu lʼEdjibitu, akatuvo leko.[51]

³⁵Jehoyakima akasha Farayo fesa la paunyi. Ndi akahimbwela wudja dia vo nkimo falanga uku olembe wa Farayo. Ndi akati yediko yʼuntu lʼuntu nkimo, akalombe wudja falanga ya fesa la ya paunyi, yakandahumbi nkimo le Farayo Neko.

³⁶Jehoyakima[52] aki la deku akumi ahendi la tanu lamʼakandayala khumʼekanga. Ndi akulela deku dikumi lʼotoi la Jerusalema. Lukumbu la nyangu laki Zebida, onʼa Fedaya, usi Ruma.

³⁷Ndi akatshaka kene kaki kolo lu ashu wa Latuyalaka, uku tshe wakatshaka watshendi.