Read tetala 2 Khumi ya Dikanga 24 Bible Online

2 Khumi ya Dikanga 24 - tetala bible

2 Khumi ya Dikanga 24

¹Lu nshi ya Jehoyakima, Nebukadineza, khumʼekanga ka Babilona, akayi dia ndjolosha.[53] Ku Jehoyakima akayala lʼokongo andi deku satu. Lʼokondo diku, ndi akakadimo akuhindwela.

²Latuyalaka akatumi elui wʼalimbi wʼasi Kaladiya, wʼasi Suriya, wʼasi Moaba, la wʼasi Amona, dia vo ndjolosha Juda la mbalanya, uku diui diakati Latuyalaka lʼenyo wʼekambi andi amvutshi.

³Akambu ane wakayi uma lu diui dia Latuyalaka, lakalangi minya Juda uma la ntundu kandi, ne dia kolo tshe yakatshaka Manase,

⁴ndu ne dia dikila diaha la unungu diakandadianganya, diakandaludia Jerusalema la dio. Okone Latuyalaka kumbetawo nyimanyia dikambu so.

⁵Undi, etsha ekina wa Jehoyakima, la akambu tshe wakandatshaka, hawufundami lu Buku diʼEkondo wa Khumi ya dikanga ya Juda?

⁶Jehoyakima akayeli washi. Ku onʼandi Jehoyakina akulela lu dihuli diandi.

⁷Khumʼekanga ka Edjibitu kundja ntu uma lu kete yandi, ne dia khumʼekanga ka Babilona akohotola wedja tshe waki lʼokongo andi, uma lʼokedi wa Edjibitu pulu ndu ndjali ka Eyufarate.

⁸Jehoyakina aki la deku dikumi la enanei lamʼakandayala khumʼekanga. Ndi akulela ngondo shatu la Jerusalema. Lukumbu la nyangu laki Nehushita, onʼa Elenatana, usi Jerusalema.

⁹Jehoyakina akatshaka kene kaki kolo lu ashu wa Latuyalaka uku tshe akakatshaka shi.

¹⁰Lʼetena keso ekambi wa Nebukadineza, khumʼekanga ka Babilona, wakayi dia ndjolosha Jerusalema, wakayudinga usumba.

¹¹Nebukadineza, khumʼekanga ka Babilona, akayi lamʼakadingi ekambi andi usumba.

¹²Jehoyakina khumʼekanga ka Juda, akatumbi, ndi la nyangu, ekambi andi, ewandji andi, la elohe andi, utsha le khumʼekanga ka Babilona. Ku khumʼekanga ka Babilona akawundi lu lukanu lʼeleku kʼenanei ka diulelu diandi.[54]

¹³Ndi akatundja diango tshe uma lu waumbelu wa lu luudu la Latuyalaka, la uma lu waumbelu wa luudu la khumʼekanga. Ndi akudiudia diango diʼulimu tshe wa paunyi wakatatshi Solomona, khumʼekanga ka Isariyele, lu luudu la Latuyalaka, uku akati Latuyalaka.

¹⁴Ndi akatole Jerusalema tshe lu fumbi: ewandji tshe, ahuka a wulu; yediko yʼantu nunu dikumi wakatolama, kame la etshudi wʼabaya la wa mbulu. Paka asi wula atu mbakatshikala lu wudja.

¹⁵Ndi akasekola Jehoyakina utsha la Babilona.[55] Ndi akatole ndu nyangu khumʼekanga, wadi wa khumʼekanga, elohe andi, la dihangamendi dia wudja, fumbi uma la Jerusalema utsha la Babilona.

¹⁶Apami tshe akanga a wulu nunu esambeli, la etshudi wʼabaya la wa mbulu kinunu; vo tshe waki akanga a wulu ndu alimbi. Ku khumʼekanga ka Babilona akatole fumbi utsha la Babilona.

¹⁷Khumʼekanga ka Babilona akadji Mataniya, onangu shi Jehoyakina, khumʼekanga lu dihuli diandi, ndi akakadimula lukumbu landi dia lo ndjala Zedekiya.[56]

¹⁸Zedekiya aki la deku akumi ahendi la otoi lamʼakandayala khumʼekanga.[57] Ndi akulela deku dikumi la otoi la Jerusalema. Lukumbu la nyangu laki Amutala, onʼa Jeremiya, usi Libina.

¹⁹Zedekiya akatshaka kene kaki kolo lu ashu wa Latuyalaka, uku tshe kakatshaka Jehoyakima.

²⁰Uma lu kele ka Latuyalaka mbakayala akambu aso la Jerusalema ndu la Juda, diako mbakandawatshanya uma la ntundu kandi. Zedekiya akahindwela khumʼekanga ka Babilona.[58]