Read tetala 2 Khumi ya Dikanga 25 Bible Online

2 Khumi ya Dikanga 25 - tetala bible

2 Khumi ya Dikanga 25

¹Lʼeleku ka divwa ka diulelu diandi lu nshi dikumi lu ngondo ka dikumi, Nebukadineza, khumʼekanga ka Babilona, akayi, ndi lʼalimbi andi tshe dia ndjolosha Jerusalema. Vo wakayudinga usumba,[59] wakatshimi ngeli ya ta lʼutshimba tshe.

²Okone usumba akadingama edja ndu lʼeleku ka dikumi la otoi ka diulelu dia Zedekiya.

³Lu lushi la divwa lu ngondo ka nei, ndjala ka kasha kakayala wulu lʼusumba; asi wudja kunkundja ma dia nde.

⁴Asi usumba wakatundula wushu lu lukumbu lʼusumba,[60] ku khumʼekanga la alimbi tshe wakatumbi lʼutshu lu mbuka ka la suku lʼasa peli pendi, lasuki lʼekambo ka khumʼekanga, wakalawo. Etena kako asi Kaladiya wakadingi usumba tshe. Ku andawi wakakime mbuka kʼutsha lʼusui wa Araba.

⁵Keli ului wʼalimbi wʼasi Kaladiya wakayelana la khumʼekanga, wakatuwunda lʼesui wa la Jeriko, ku ului andi tshe wʼalimbi wakudiangana.

⁶Vo wakandi khumʼekanga, wakatshu la ndi la Ribila, le khumʼekanga ka Babilona, wakatulumbuya.

⁷Vo wakadiaki ana apami wa Zedekiya la ntundu kandi, wakutundula ashu, wakukeleka molola wʼohotela, wakatshu la ndi la Babilona.[61]

⁸Lu lushi lʼesambeli, lu ngondo ka tanu, lʼeleku ka dikumi la divwa ka diulelu dia Nebukadineza, khumʼekanga ka Babilona, kakayi Nebuzaradana, olombodi wʼalami, ukambi wa khumʼekanga ka Babilona uya la Jerusalema.

⁹Ndi akayutshumba luudu la Latuyalaka,[62] luudu la khumʼekanga, la mvudu tshe ya la Jerusalema; mvudu tshe ya waki mbakandatshumbi.

¹⁰Ului tshe wʼalimbi wʼasi Kaladiya waki kame la olombodi awo, wakahandjula peli dia lukumbu dia lʼutshimba wa Jerusalema.

¹¹Nebuzaradana, olombodi wʼalami, akatole wane wakatshikala lʼusumba fumbi, wane wakotwela khumʼekanga ka Babi-Iona, ndu atshikadi wa lʼului.

¹²Keli olombodi wʼalami akatshiki asi wudja amotshi wuleki wula, dia ndjala alami wa dikambo dia vinyo la akambi wa dikambo.

¹³Asi Kaladiya wakatshatsha dikoho diʼehotela[63] lu luudu la Latuyalaka, dikitshelu, la puki ka wuki kʼohotela[64] kaki lu luudu la Latuyalaka, wakembe ehotela utsha la Babilona.

¹⁴Wakatole puki, kasu, tosholo ta nyimaka atala, akoho, la diango tshe diʼohotela diakawatshaka ulimu.[65]

¹⁵Olombodi wʼalami akembe pusu ya membaka akalanga, la alonga: kene kakatshama la paunyi lʼului wa paunyi, la kene kakatshama la fesa lʼului wa fesa.

¹⁶Ehotela wʼuma lu dikoho pendi, puki ka wuki, la uma lu dikitshelu diakatatshi Solomona dikambu dia luudu la Latuyalaka, waki wutshu wakiwo kumbeya mbala.

¹⁷Utali wʼekoho kemotshi aki kubita dikumi la enanei, ladiku diato kaki ote wʼohotela waki la utali wa kubita shatu, lʼutshimba wʼote wʼekoho kaki ukalamandji la dikomi diʼutamba, tshe ohotela utu. Osoku mbaki ndu lʼekoho ka hendi kame la ukalamandji.

¹⁸Olombodi wʼalami akandi olombedi a wuki Seraya, olombedi a hendi Zefaniya, kame la alami asatu wa suku dia luudu la Latuyalaka.

¹⁹Ndi akandi ndu usi mbalasa, olombodi wʼalimbi, apami atanu wa lʼusumba waki andaki wa khumʼekanga, ufundji wʼolombodi wʼalimbi wakasanganyaka wudja, la apami akumi asamalu wa wudja wakatanema lʼusumba.

²⁰Ndi akatshu la wo la Ribila le khumʼekanga ka Babilona.

²¹Khumʼekanga ka Babilona akakomola, akadiaki la Ribila, lu kete ya Hamata. Osoku mbakatolama Juda fumbi uma lu wudja awo.

²²Nebukadineza, khumʼekanga ka Babilona, akadji Ngedaliya, onʼa Ahikame, onʼa Shafana umbuledi wʼatshikadi a wudja, wakandatshiki lu kete ya Juda.

²³Lamʼakuki elombodi wʼalimbi lʼantu awo lukumu ati: Khumʼekanga ka Babilona ambudja Ngedaliya umbuledi, vo wakayi le ndi la Mizipa. Ishamele, onʼa Netaniya, Johanana, onʼa Kareya, Seraya, onʼa Tanumeta, usi Netofa, la Jazaniya, onʼa usi Maka, vo lʼantu awo mbakayi le ndi.

²⁴Ngedaliya akatshibela, vo lʼantu awo, akawatela ati: Tanyukaki woma lu dikambu diʼekambi wʼasi Kaladiya. Nyudjase lu kete, nyulambulaki khumʼekanga ka Babilona, ku nyu nyayuhumo lukulu lʼolo.[66]

²⁵Keli lu ngondo kʼesambeli, Ishamele, onʼa Netaniya, onʼa Elishama, uma lu diuhu dia khumʼekanga, akayi, ndi lʼantu dikumi, akayokomola Ngedaliya, akudiaki ndi la asi Juda, la asi Kaladiya waki kame la ndi la Mizipa.[67]

²⁶Ku antu tshe ndu wa tshitshe ndu a waki, ndu elombodi wʼalimbi wakunela, wakatshu utsha lʼEdjibitu,[68] ne dia vo wakuki asi Kaladiya woma.

²⁷Lʼeleku kʼakumi asatu lʼesambeli ka lohombo la Jehoyakina, eleku ka ntundu ka diulelu dia Evile-Merodaka, khumʼekanga ka Babilona, lu lushi lʼakumi ahendi lʼesambeli lu ngondo ka dikumi lʼahendi, kakutundja Evile-Merodaka, khumʼekanga ka Babilona, uma lu lukanu.

²⁸Evile-Merodaka akasawulaka la ndi ololo, akedia kiti kandi ka diulelu ladiku dia kiti ya waulelu ya khumi ya dikanga yaki kame la ndi la Babilona.

²⁹Ndi akukulula ahondo andi wa lukanu, akolotsha ahondo akina. Ku Jehoyakina akalekaka ma laka khumʼekanga, nshi tshe ya lumu landi.

³⁰Khumʼekanga akawushaka ehumba andi la lushi la lushi, nshi ya lumu landi.