Read tetala 2 Khumi ya Dikanga 3 Bible Online

2 Khumi ya Dikanga 3 - tetala bible

2 Khumi ya Dikanga 3

¹Jehorama, onʼa Ahaba, akatatela mbulela Isariyele lu Samariya, lʼeleku ka dikumi lʼenanei ka diulelu dia Jehoshafata, khumʼekanga ka Juda. Ndi akulela deku dikumi la pendi.

²Ndi akatshi kene kaki ololo lu ashu wa Latuyalaka, keli aha uku akatshaka shi la nyangu. Ne dia ndi akanya ekishi ka Bala kakatatshi shi;

³keli ndi akayakimo lu kolo yakatshaka Jeroboama, onʼa Nebate, yakandanganyia Isariyele. Ndi kumumo uma leko.

⁴Mesha, khumʼekanga ka Moaba, aki la nyimba yʼekoko. Ndi akafutaka khumʼekanga ka Isariyele ulambu wa diosa diʼuma lu ana wʼekoko nunu lukama la dia uma lʼekoko a waumi nunu lukama.

⁵Keli lamʼakavu Ahaba, khumʼekanga ka Moaba, akatombokwela khumʼekanga ka Isariyele.

⁶Etena kako Jehorama akatumbi uma la Samariya, akasanganya asi Isariyele tshe.

⁷Ndi akatumela Jehoshafata, khumʼekanga ka Juda diui ati: Khumʼekanga ka Moaba akantombokwela. We ayetawo ntsho la mi dia ntolosha asi Moaba? Ku ndi akûkaluya diui ati: Dimi layutsho: Dimi leli uku we, wudja ami weli uku wudja aye, ndu falasa yami yeli uku falasa yaye.

⁸Ndi akawumbula ati: Lu mbuka kakona kayututsho? Jehorama akûkaluya diui ati: Lu mbuka ka lʼusui wa shenga wa Edome.

⁹Okone khumʼekanga ka Isariyele akatshu, ndi la khumʼekanga ka Juda la khumʼekanga ka Edome. Lamʼakawakendakenda lokendo la lʼutshimba nshi esambeli, vo wakahumbi ashi wʼalimbi la nyama yakatatshokaka la wo no.

¹⁰Khumʼekanga ka Isariyele akayatshumuya ati: Ye! Latuyalaka akateti, shu khumi ya dikanga shatu nye dia ndjutukimo lʼanya wʼasi Moaba.

¹¹Jehoshafata akawumbula ati: Undi umvutshi a Latuyalaka kema lindu dia shu mumbula diui uma le Latuyalaka? Ukambi omotshi wa khumʼekanga ka Isariyele akûkaluya diui ati: Elisha, onʼa Shafata, lakatelaka Elidja ashi lu anya eko lane.

¹²Jehoshafata akati ati: Diui dia Latuyalaka dieko le ndi. Ku khumʼekanga ka Isariyele, Jehoshafata, la khumʼekanga ka Edome wakatshu le ndi.

¹³Elisha akambula khumʼekanga ka Isariyele ati: Kakona keli lʼasa mi la ye? Tshoka le amvutshi wa sho, ndu le amvutshi wa nyo. Khumʼekanga ka Isariyele akûkaluya diui ati: Kema, ne dia Latuyalaka akateti shu khumi ya dikanga shatu nye, dia ndjutukimo lʼanya wʼasi Moaba.

¹⁴Elisha akûkaluya diui ati: Uku eli Latuyalaka, Kanga lulimbilimbi, latumukambelaka ulimu la lumu! mete, utunduyala dimi halalemia Jehoshafata, khumʼekanga ka Juda, tshiki dimi ntutukukela kuyanga nkenda.

¹⁵Kakiane nyumbuli uhumi a losese. Lamʼakahumaka uhumi losese, lunya la Latuyalaka lakayala le Elisha.

¹⁶Ndi akati ati: Latuyalaka kata ati: Nyutshimi afuku, afuku lʼukidi one tshe!

¹⁷Latuyalakakata ati: Nyu hanyuka lopepe kuyanga mena mvula, keli ukidi one ayulula la ashi, ku nyu nyayono, ndu nyu ndu dungalunga dianyu.

¹⁸Dikambu ne dieli dikambu dia tshitshe lu ashu wa Latuyalaka. Ndi ayukimo ndu asi Moaba lu anya anyu.

¹⁹Nyu nyayulanya esumba tshe wa wulu ndu esumba tshe wuleki amena, nyayunyukula etamba wʼololo tshe, nyayutedia teko diʼashi, ndu nyayulanya dikambo tshe diuʼeki amena lʼave.

²⁰La pindju, lʼetena ka nambula ulambu, wenyi ku ashi wayakele uma lu leke la Edome, ku kete yako yakaluli la ashi.

²¹Lamʼakuki asi Moaba tshe lukumu vati: Khumi ya dikanga yambuya dia ndjutolosha, vo wakasanganya antu tshe, ndu elongo wʼapami ndu dikumanyi, wakakuki memba dihumo dia ta, wakayemala lʼulelu.

²²Asi Moaba waketo kolomo la pindju, lamʼakahete yanyi ladiku dia ashi, wakenyi ashi ako tilili uku dikila.

²³Vo wakati vati: Dikila diku, khumi ya dikanga yamboloshanya vame, yambudiakana. Kakiane njii asi Moaba nyutose diango dia dimbu.

²⁴Lamʼakawakumi lu pangu ka Isariyele, asi Isariyele wakunela, wakalo la wo, ku asi Moaba wakalawo. Asi Isariyele wakatshana la wo, watadiaka.

²⁵Vo wakalanya esumba awo, vo tshe untu lʼuntu akuki dikambo diawo diuleki ololo ave, ku dio diakaluli lʼave. Vo wakatedia teko tshe diʼashi, wakakote etamba wʼololo tshe. Ambuki wʼave wakadingi Kire-Haresete, wakalo la wo wulu, ku dihuli diako tshe diakayala ave atu.

²⁶Lamʼakenyi khumʼekanga ka Moaba ati: Ta diambutuleka wulu, ndi akose alimbi kama esambeli, akahimbi mbata mbuka utsha le khumʼekanga ka Edome, keli wulu awo kunkuka.

²⁷Ku ndi akose onʼandi a pami lʼenundu, akulambula ulambu wa lutshumba ladiku diʼeheli. Ku yenyi ya wulu yakayala le Isariyele, edja ndu vo wakahumbi mbutshika la nkalula lakawo.