Read tetala 2 Khumi ya Dikanga 4 Bible Online

2 Khumi ya Dikanga 4 - tetala bible

2 Khumi ya Dikanga 4

¹Umuntu omotshi lʼatei a wadi wʼana wʼamvutshi akayi le Elisha, akayuwutela ati: Ukambi aye umemi, ambuvo. We mbeyaka uku akukaka ukambi aye Latuyalaka woma, ku kakiane one lakukuli dibasa ambuya dia ndjosa anʼami ahendi dia ndi mbaete fumbi.

²Elisha akawumbula ati: Alangaye dimi nkutshela na? Kakona keli la ye lu luudu? Ndi akûkaluya diui ati: Dimi ukambi aye a umuntu kema la engo lu luudu, tshikima pamba kʼiso.

³Ndi akûkaluya diui ati: Tshoka, utambi pamba ya hwe uma le asukanyi aye tshe, tuyosaki tshitshe.

⁴Lamʼayuyoto lu luudu, kuyadihi lukuki, we la anʼaye wʼapami, kudji iso lu pamba yako tshe, kukitsha pamba tshe yambulula laandi.

⁵Ku umuntu akamo la le ndi, akayadihi lukuki ndi la anʼandi wʼapami. Vo wakawelaka pamba, ku ndi akayidjaka iso.

⁶Lamʼakaluli pamba, ndi akatela onʼandi omotshi ati: Umumbela pamba kemotshi. Ku ndi akukaluya diui ati: Pamba yambushila. Ku iso konkela ntu.

⁷Ndi akayutela umvutshi a Unyashungu, ku ndi akûkaluya diui ati: Tshoka, utusundja iso, kufuti dibasa; kanyuli kene kayutshikala, we la anʼaye.

⁸Lushi lomotshi Elisha aketi la Shunema, lene akadjashi umuntu kanga ongonyi. Ku ndi akosengasenga dia ndi ntali ma. Okone tena tshe lamʼakandetaka leko, ndi akalekaka ma.

⁹Ndi akatela umendi ati: Mete, dimi lambeya nti: Untu one latetaka lakasu nshi tshe, ukilami a Unyashungu mbendi.

¹⁰Tutsheli yindju ya ladiku la peli, katukitshiya tangi, mesa, kiti la tala loko, dia ndi ndjudjaseka loko lamʼayunduyakaka le su.

¹¹Okone lamʼakandetetaka, ndi akayotoka lu yindju yako, aketamaka.

¹²Ndi akatela ukambi andi Ngehazi ati: Uteti umuntu one, usi Shunema. Lamʼakandaweti, ndi akayemala la ntundu kandi.

¹³Ku ndi akatela ukambi andi ati: Uwuteli wati: Mete, we atenaka pa dia ntulungula, alangaye untu nkutshela? We nangaka untu nkoteketela le khumʼekanga kana le olombodi wʼalimbi? Ndi ak ikaluya diui ati: Lʼatei a wudja asu kudjashimi.

¹⁴Ndi akambula ukambi andi ati: Kakona kukukisu mbutshela? Ngehazi akûkaluya diui ati: We henyi, ndi kema la ona, ndu umendi aya usumbi.

¹⁵Ndi akawutela ati: Uweti. Ngehazi akaweti, ku ndi akayemala la suku.

¹⁶Elisha akawutela ati: Lu etena kene, lʼeleku kʼuyuyu we ayolela ona pami. Ndi akûkaluya diui ati: Kema, khumemi, we umvutshi a Unyashungu, tunyimbiyaki, dimi ukambi aye a umuntu.

¹⁷Umuntu ako akatshu diemi, akuti ona pami lʼetena kako lʼeleku kako, uku akawutela Elisha.

¹⁸Lamʼakuli ona, ndi akatshu lushi lomotshi dia ntenda shi utsha le amunyi.

¹⁹Ndi akatela shi ati: Dimi la kandji lʼote! dimi la kandji lʼote! Ku shi akatela ukambi andi ati: Uwembe utsha le nyangu.

²⁰Ukambi akawembe, akotole le nyangu. Ona akatshikala lu dihelo dia nyangu edja ndu unya lʼatei ote, ku ndi akavu.

²¹Nyangu akambela la ndi, akatuwetamia lu tangi ka umvutshi a Unyashungu, akudihi lukuki, akatumbi.

²²Ndi aketi umendi, akosengasenga ati: Utumeli ukambi aye omotshi la punda ka wadi; dimi nangaka ntsho esadi utsha le umvutshi a Unyashungu, keli kankaluli.

²³Ku umendi akawumbula ati: Okoko wana walangaye ntsho elo utsha le ndi? Elo kema hyane ya ngondo kana lushi lʼekila. Wadendi akûkaluya diui ati: Ayuyali ololo.

²⁴Ndi akakitsha edie ladiku dia punda kandi, akatela ukambi andi ati: Ukilombole, utshu; temalaki lu mbuka, tshikima lambukutela.

²⁵Ndi akatshu le umvutshi a Unyashungu lʼUkungu a Karamele. Lamʼakawenyi umvutshi a Unyashungu uma lʼetali, ndi akatela ukambi andi Ngehazi ati: Umuntu one, usi Shunema, uku ayayi.

²⁶Ulawo esadi, utuhumani la ndi, utuwumbuli wati: We la wulu? Umeye la onʼaye weko la wulu? Ndi akûkaluya diui ati: Shu tshe teko la wulu.

²⁷Lamʼakandakumi la le umvutshi a Unyashungu lʼukungu, ndi akudingama lʼekulu. Ngehazi akayi dia ndjusukula. Keli umvutshi a Unyashungu akawutela ati: Okimo, ne dia utema andi weko la lokonyo, keli Latuyalaka akambishe dikambu diako; ndu kunimbitshiyamidio.

²⁸Umuntu akawumbula ati: Khumemi, dimi kakakolombe ona pami? Dimi kumvuta nti: Tunyimbiyaki?

²⁹Ku Elisha akatela Ngehazi ati: Olote uya lu lukindi, ukimeli danga diami lu lunya, utshu. Naka we ayuhumana lʼuntu, tuwemulaki. Ndu naka untu ayukemula, tukaluyaki diui. Kutahe danga diami lʼelundji kʼona.

³⁰Nyangu ona akawutela ati: Uku eli Latuyalaka la lumu, ndu uku weye la lumu! Dimi halukutshika. Ku Elisha akunela, akuyeli.

³¹Ngehazi akatshu la ntundu kawo, akatahe danga lʼelundji kʼona, ku nduku diui kuyanga djimbitelu yʼeulwelu. Ku ndi akakalula dia ntuhumana la Elisha, akatusanyia dikambu, ati: Ona hulwi.

³²Lamʼakakumi Elisha lu luudu, atani ku ona akavwi, etami lu tangi kandi.

³³Ndi akoto, akayadihi la ndi lu luudu, ku ndi akalombe Latuyalaka.

³⁴Ndi akambela, aketama ladiku diʼona; akakitsha unyo ladiku diʼunyo andi, ashu ladiku dia ashu andi, anya ladiku dia anya andi; ku ndi akayasimbe ladiku diandi. Dimba diʼona diakahetaheta.

³⁵Elisha akangana, aketeta lu luudu; ku ndi akayumbela, akasimbimala ladiku diʼona. Ku ona akakashiya tena esambeli, akadihula ashu.

³⁶Elisha aketi Ngehazi, akawutela ati: Eta umuntu usi Shunema uku. Ngehazi akaweti, ndi akayi le Elisha. Ku Elisha akawutela ati: Ose onʼaye a pami!

³⁷Umuntu akayahumanya lʼekulu andi akukhusamela la kete. Ku ndi akose onʼandi, akatumbi.

³⁸Elisha akakalula la Ngilingala. Ndjala ka kasha kaki lu kete yako. Ana wʼamvutshi wakadjashi la ntundu kandi, ku ndi akatela ukambi andi ati: Ukitsha puki ka wuki, ukateli ana wʼamvutshi usawu.

³⁹Omotshi akatshu lʼusui dia ntuka adiyu, ndi akatutana okodi wʼusulula, akaki esulula uma loko, akeludia to lu dihondo diandi. Lamʼakandakalula, ndi akayihimbula tenyi tenyi lu puki kaki usawu, ne dia vo kumbelimbitela.

⁴⁰Vo wakasha antu ako dia vo nde; keli lamʼakawali, vo wakahangohango vati: Umvutshi a Unyashungu li, nyoi lu puki! Vo kumbeya mbole ntu.

⁴¹Elisha akawatela ati: Nyose shima, ndi akakidji lu puki, akati ati: Usha antu ane keli wali. Nduku engo ka kolo kakayala lu puki ntu.

⁴²Lʼetena kako pami kemotshi akayi uma la Bala-Shalisha. Ndi akela umvutshi a Unyashungu ma diʼolonga, ekama wʼepunga akumi ahendi, la washa wʼepunga lu paya kandi, Elisha akati ati: Usha antu ane keli wali.

⁴³Ukambi andi akûkaluya diui ati: Ukundi ayumeya ndesha antu ane lukama? Keli Elisha akawutela ati: Udisha antu ane keli wali, ne dia Latuyalaka kata ati: Vo wayudile, ku dimotshi diayutshikala.

⁴⁴Ndi akakitsha ma la ntundu kawo. Vo wakali, ku wakatshiki dimotshi uku diui dia Latuyalaka.