Read tetala 2 Khumi ya Dikanga 5 Bible Online

2 Khumi ya Dikanga 5 - tetala bible

2 Khumi ya Dikanga 5

¹Namana, olombodi wʼalimbi wa khumʼekanga ka Suriya, aki untu awuki le khumendi, la nemo efula. Ne dia uma le ndi kakatshungula Latuyalaka asi Suriya. Keli pami kako ka wulu ndu dihunga aki la sudi.

²Alimbi wʼasi Suriya wakatumbaka elui, ku vo wakatunda dikenda dimotshi dia umuntu fumbi uma lu kete yʼasi Isariyele, diakakambelaka wadi a Namana ulimu.

³Ndi akatela khumendi a umuntu ati: Utunduyala khumemi ayali lasuki la umvutshi weli la Samariya, tshiki ndi utokonoya sudi kandi!

⁴Untu omotshi akatshu dia ntutela khumendi ati: Dikenda dia umuntu diʼuma lu kete ya Isariyele akatshi wuhu one la wuhu one.

⁵Ku khumʼekanga ka Suriya akawutela ati: Uneli, utshu la Samariya, dimi layutumela khumʼekanga ka Isariyele mukanda. Ndi akatshu kame la talata ya fesa dikumi, la toshekele ta paunyi nunu samalu, la ahondo dikumi wa ndota.

⁶Ndi akatolela khumʼekanga ka Isariyele mukanda; akafundama ati: Ulungi, lamʼayukuma mukanda one le ye, keyi wati: Dimi kambutuma ukambi ami Namana le ye, dia we mbokonoya sudi kandi.

⁷Lamʼakali khumʼekanga ka Isariyele mukanda, ndi akati ahondo andi, akati ati: Undi, dimi kaya Unyashungu dia ndjaka la mbulula, mbutumedindi pami kene dia dimi mbokonoya sudi kandi? Nyeyi ndu nyulimbiteli nyati: Ndi eko lu nyanga dikambu dimotshi dia mama la mi!

⁸Lamʼakuki Elisha, umvutshi a Unyashungu, ati: Khumʼekanga ka Isariyele akatshi ahondo andi, ndi akatumi untu dia ntumbula khumʼekanga ka Isariyele ati: Okoko wana wakayatshi ahondo aye? Okimo ayi lakami, ku ndi ayeya ati: Umvutshi omotshi eko lu Isariyele.

⁹Namana akatshu, ndi la falasa yandi la pusupusu kandi, akayemala la suku dia luudu la Elisha.

¹⁰Elisha akutumela diui le dikendji ati: Utshu, utoke tena esambeli lu ashi wa Jorodana, ku dimba diaye diayokolongona uku akidio ntundu, ku we ayuyala pudipudi.

¹¹Namana akuki kele, akunela, atari ati: Dimi lakatshi lʼutema nti: Ndi ayutumba uya le mi, ayuyemala idame, ayeta lukumbu la Latuyalaka, Unyashungu andi, ayetshetsha lunya landi lu ahuli weli kandji, ku ndi ayokonoya sudi.

¹²Undi, ndjali ya la Damaseke: Abana la Ferepare, hawuleki ashi tshe wa lu Isariyele amena? Dimi tutoka leko, ku dimi ndjaia pudipudi? Ku ndi akakadimo, akako la kele ka wulu

¹³Keli ekambi Midi wakayi uya le ndi, wakawutela vati: Papa, utunduyala umvutshi akuteli dia ntsha dikambu dimotshi dia wuki, undi, we tutuditsha? Na dikambu dieli laso diahumbaye ntsha, lamʼakandakutedi ati: Toke, ku we ayuyala pudipudi?

¹⁴Ndi akahulo akatoto tosoke tena esambeli lu Jorodana, uku diui dia umvutshi a Unyashungu, ku dimba diandi diakayala uku dimba dia ona ashashi; ndi akayala pudipudi.[5]

¹⁵Namana akakalula le umvutshi a Unyashungu, ndi la wane wakatatshokaka la ndi tshe. Lamʼakandakumi, ndi akemala la ntundu kandi, akawutela ati: Mete, dimi lambulimbitela nti: Nduku Unyashungu weli la kete, naka aha one weli lu Isariyele. Kakiane, dimi lambukosengasenga nti: Etawo nungula ushasha omotshi uma le mi, dimi ukambi aye.

¹⁶Elisha akûkaluya diui ati: Uku eli Latuyalaka lakambelami ulimu la lumu! dimi haletawo nungula nduku engo. Namana akosengasenga wulu dia ndi nungula, keli ndi akatuni.

¹⁷Ku Namana akati ati: Ne dia we ambutuna, etawo dia vo mbishami kete, dimi ukambi aye, wutshu wukuki punda hyendi memba; ne dia dimi ukambi aye handjulanga nambula ulambu a lutshumba kara ulambu le ditemolatemola. Dimi layelambulaka paka le Latuyalaka.

¹⁸Oso eli dikambu diasengasengami Latuyalaka tena tshe, dia ndi nyimanyiami, dimi ukambi aye. Lamʼatotoka khumemi lu luudu la Rimona dia ntukhusama loko ndu lamʼatundekamaka lu lunya lami, ndu dimi latukhusamaka lu luudu la Rimona. Latuyalaka etawo nyimanyiami, dimi ukambi aye, lamʼayumukhusama lu luudu la Rimona!

¹⁹Elisha akawutela ati: Kutshu la ki. Lamʼakandayala Namana tshalula,

²⁰Ngehazi, ukambi wa Elisha, umvutshi a Unyashungu, akati ati: Nyendi, khumemi ambukimo Namana, usi Suriya one. Aha nungula nduku engo uma lu anya andi, lʼatei a diango diakandela. Uku eli Latuyalaka la lumu! dimi lutsha mbuyela la luwangu, keli katose engo kemotshi.

²¹Osoku Ngehazi akayeli Namana la luwangu, Namana akawenyi ayuyeli la luwangu, akakiti uma lu pusupusu kandi, akatshu, akatuhumana la ndi, akawumbula ati: Tshe ki leku?

²²Ndi akûkaluya diui ati: Tshe ki. Khumemi kuntumi le ye ati: Elongo wʼapami ehendi, wʼuma lʼatei wʼana wʼamvutshi wambukuma kakiane uma lu leke lʼakuna wa Efarayima mbakosengasengami nti: Uwasha talata otoi ka fesa, la ahondo ahendi wa ndota.

²³Namana akawutela ati: Etawo nungula talata hyendi. Ndi akosengasenga wulu, akadji talata hyendi ya fesa lu atapa ahendi, akakimo ahondo ahendi wa ndota. Ndi akembia ekambi andi ehendi, waketi la ntundu ka Ngehazi lu dikuna,

²⁴ndi akose diango diako uma lʼanya awo, akadikitsha lu luudu. Ndi akakaluya antu ako, ku vo wakatshu.

²⁵Ndi akoto, akatemala la ntundu ka khumendi Elisha. Ku Elisha akawumbula ati: Ngehazi, uma lendi akiye? Ndi akûkaluya diui ati: Dimi ukambi aye hatshwi nduku mbuka.

²⁶Keli Elisha akawumbula ati: Undi, nyuma kami hatshwi kame la ye lamʼakakadimwi pami keku uma lu pusupusu kandi, dia ndjuhumana la ye? Oso aki etena ka nungula falanga ndu ka nungula ahondo, eweli, ekodi wa vinyo, ekoko, ngombe, ekambi wʼapami la ekambi wʼamantu?

²⁷Okone sudi ka Namana kayukumamema we la tukanula taye pundju. Ku Ngehazi akamo uma la ntundu ka Elisha la sudi kasaa uku pembe.