Read tetala 2 Khumi ya Dikanga 6 Bible Online

2 Khumi ya Dikanga 6 - tetala bible

2 Khumi ya Dikanga 6

¹Ana apami wʼamvutshi wakatela Elisha vati: Enda, dihuli diudjashisu lasuki la ye, diambuleka pika le su.

²Shu tambukosengasenga shati: Utukimo, tutshu la Jorodana dia ntokota untu lʼuntu usimbi, dia ndjuhika luudu la shu mbidiase. Ndi akakaluya diui ati: Nyutshu.

³Keli omotshi akosengasenga ati: Utshu la su, shu ekambi aye. Ku ndi akûkaluya diui ati: Kawo, dimi layutsho.

⁴Okone ndi akatshu la wo. Lamʼakawakumi la Jorodana, vo wakatokota etamba.

⁵Keli lamʼakakotaka omotshi usimbi, kenge yakungo, yakatambela lu ashi. Ndi akadi kuku ati: Yee! khumemi li! kenge ya diambu mbeyo!

⁶Umvutshi a Unyashungu akawumbula ati: Lendi utambeyo? Ku ndi akawenya dihuli. Umvutshi akakote tshamba, akayitambiya lu dihuli diako, ku yo yakatupula kenge.

⁷Ndi akawutela ati: Uyose! Ku ndi akasimbula lunya, akayose.

⁸Lu nshi sho, khumʼekanga ka Suriya akalokaka la Isariyele. Ndi akatela ekambi andi ati: Lu dihuli dia kapanda kayumutuhanga.

⁹Umvutshi a Unyashungu akatumela khumʼekanga ka Isariyele diui ati: Ewo, tetaki lu dihuli so, ne dia asi Suriya wambuhulo leko.

¹⁰Khumʼekanga ka Isariyele akatumi antu lu dihuli diakawewula umvutshi a Unyashungu. Ehandelu ka wuhu oso kundjala etena otoi kana tena pendi ntu.

¹¹Ku khumʼekanga ka Suriya aki la ohenyohenyo lʼutema lu dikambu so. Ndi aketi ekambi andi, akawambula ati: Nyu hanyetawo mvutelami usikasu leli kame la khumʼekanga ka Isariyele?

¹²Ukambi andi omotshi akûkaluya diui ati: Khumemi khumʼekanga li, nduku untu; keli umvutshi Elisha ludjashi lu Isariyele katusanyiyaka khumʼekanga ka Isariyele aui watuyutaka lu luudu laye la mbetama.

¹³Ndi akawutela ati: Tshoka, utendi dihuli diendi, kantumi antu dia vo ntuwunda. Wakûkaluya diui vati: La Dotana kendi.

¹⁴Khumʼekanga ka Suriya akatumi falasa, pusupusu la alimbi efula. Vo wakatukuma lʼutshu, wakadingi usumba ako.

¹⁵Ukambi wʼumvutshi a Unyashungu aketo la hyutshihutshi, akatumbi, akatani ku alimbi ane wakadingi usumba, vo la falasa la pusupusu yawo. Ku ukambi wʼumvutshi a Unyashungu akadi kuku ati: Yee! Khumemi, kayututsha na?

¹⁶Ku ndi akûkaluya diui ati: Tukaki woma, ne dia wane weli la su, ndeka waku weli la wo efula.

¹⁷Ku Elisha akalombe ati: Latuyalaka li, lambukosengasenga nti: Udihuli ashu wʼukambi dia ndi mena. Latuyalaka akadihula ashu wʼolongo ako, ku ashu andi wakadiho. Enyi ku ukungu wambulula to la falasa la pusupusu ya dja lʼutshimba wa Elisha.

¹⁸Lamʼakahulo asi Suriya uya le Elisha, ndi akalombe Latuyalaka ati: Ete wudja one tutshungu. Ku ndi akawaete tutshungu uku dombelo dia Elisha.

¹⁹Elisha akawatela ati: Aha mbuka kene, ndu aha usumba one, nyundjeli keli nyolombole utsha le pami kayanganyu. Ku ndi akalombola utsha la Samariya.

²⁰Lamʼakawakumi la Samariya, Elisha akalombe ati: Latuyalaka li, udihuli ashu wʼantu ane, wasene. Latuyalaka akadihula ashu awo, ku vo wakasene, wayendi ku waya kʼatei a Samariya.

²¹Lamʼakawaenyi khumʼekanga ka Isariyele, ndi akambula Elisha ati: Papa, mbadiaki, mbadiaki?

²²Ndi akûkaluya diui ati: Kema, tadiakaki. Undi, we mbeyaka ndjaka wane wakayadji lu fumbi la yombo yaye, lʼuta aye uka? Uwasha ma la ashi, wali, wano, wakaluli le khumewo.

²³Khumʼekanga ka Isariyele akakatela dambu dia wuki. Lamʼakawashili nde la no, ndi akakendja. Ku vo wakakalula le khumewo. Alimbi wa Suriya kunkalula ntu lu kete ya Isariyele.

²⁴Lʼokongo diku Bene-Hadada, khumʼekanga ka Suriya, akasanganya alimbi andi, wakatshu, wakatudinga Samariya.

²⁵Lʼetena kako ndjala ka kasha kaki wulu la Samariya; asi Suriya wakadingi usumba edja ndu ushinga wʼote wa punda akayala toshekele ta fesa akumi enanei, la etenyi ka nei ka dikaka dia khudumba kakayala toshekele ta fesa tutanu.

²⁶Lamʼakatetaka khumʼekanga ka Isariyele ladiku diʼeheli ka lukumbu lʼusumba, umuntu omotshi akulelela ati: Khumemi khumʼekanga li, unkimanyia!

²⁷Ndi akûkaluya diui ati: Naka Latuyalaka hakukimanyia, la na ayumukukimanyia? lʼengo uma lu dihuli diʼesuswelu kana kʼuma lu dihuli diʼehinelu?

²⁸Khumʼekanga akawumbula ati: Kanyangaye na? Ndi akûkaluya diui ati: Umuntu one akamvutela ati: Umbisha onʼaye a pami, tule elo, katuli onʼami a pami lui.

²⁹Okone shu takakati onʼami, takuli.[6] La wedi a pindju lakawutela nti: Ela onʼaye, katuli, keli ndi akashi onʼandi.

³⁰Lamʼakuki khumʼekanga aui wa umuntu ako, ndi akatshatsha ahondo andi. (Ndi aki lu mbeteta ladiku diʼeheli ka lukumbu.) Antu wakenyi vati: Dikutu mbolotendi la tshina diʼahondo andi.

³¹Ku ndi akati ati: Unyashungu kadjaki, naka ote wa Elisha, onʼa Shafata, ayutshikala lu dimba diandi elo.

³²Etena kako Elisha akadjashi lu luudu landi, ndi la dihangamendi. Khumʼekanga akatumi dikendji, keli ntundu ndi atakumi le Elisha, ndi akatela dihangamendi ati: Nyu menaka uku ambutumela undjakanyi one untu dia ndjumpimbula ote? Nyulungi, lamʼayuya dikendji, kanyudihi lukuki, kanyumamanya la lukuki. Aha kindu ya khumemi sho yayi lʼokongo andi?

³³Kama akandateketaka la wo, ku khumʼekanga ambukuma. Ndi akati ati: Enda, kolo kene kambuya uma le Latuyalaka; kakamalungamela ntu uma le Latuyalaka?